Matiyu 3 - Mahou

Yaya Bátizelikɛbhaa é Ala yɛ́ Mansayako ó lásela

¹ Ló nɔ la, Yaya Bátizelikɛbhaa é nan Zude dhyɛ́ o lɔ tó kɛ táa a lásele kó:

² «Áa a yóo ólu yɛ́ɛman, kɛ mansɔɔ sángboo ó Mansaya ó lángɛɛnman wáati o wɛ́ɛ bhyáa sé le!»

³ Céla Ezayi é fɔ Yaya lé mán kó: Mɔɔn lɔ́ é gbáanan dhyɛ́ o kɔɔnnɔn kó: Áa Mantii ó yɛ́ sháa ó lálaa, áa a tínminnaa ólu látee.

⁴ Deeke mín ndɛ́ɛ Yaya kannan, o lálaanin ndɛ́ɛ ɲɔ́ɔnmɛɛnshe le la, tó kɛ cɛ́siigboo lɔ́ síi a soola. A bhálo ó tɛ́ɛ gɔ́tiba óni wówonin ndúu le le.

⁵ Yeluzalɛmuka ólu ní Zude mála ó ywáa bɛ́ lɔ mɔɔn ólu ní Zuludɛn bha ó lánga o mɔɔn ó bɛ́ é táa Yaya saala

⁶ kɛ táa í lálabhɔ i yɛ́ yúumu olu mán tó Yaya tɛ́ɛ i bátize Zuludɛn bha ó lɔ.

⁷ Yaya é yé mínngɛ óo Falizɛn ŋólu ní Sadusi olu táala a saala ké aa i bátize, aa fɔ i yɛ kó: «Álee santutudhye ŋólu, yɛ́ɛtii é álee lasowi kó álee a bwée Ala yɛ́ kíti nantɔ ó ɲɛn?

⁸ Aa kóbhɛɛ ólu kɛ́, kɛ́ a yáa kó a wɛ́ɛ díminsa kɛ́ fala a yɛ́ kóyoo ŋólu lá.

⁹ A kɛ́nan í míli kó Ala yáa a kísi kɛ mansɔɔ Bulaaman é a fá lé. Ni fɔ́la a yɛ́ ngó Ala é sé kɛ́ káwaguun míinnu yɛ́ɛman kɛ ólu kɛ́ Bulaaman dhyé ŋólu lé.

¹⁰ Tɛ́ɛla ŋó lɔ́bhyɛnin ɲé kɛ́ bhá kɛ yíi ólu tɛ́ɛ i díin ŋólu man. Yíi ó yíi tɛ́ dhyémɛɛ kɛ́la, ó bɛ́ yáa tɛ́ɛ kɛ́ láfii tá ó lɔ́.

¹¹ Née a bátizela jí la, kɛ a yáa kó a wɛ́ɛ a yóo ólu yɛ́ɛman; Waa mín ngáa nan né kwɔ, ó yɛ́ sebhaaya o á bwó né tá ó lé. Né yɛ́ɛ mánngan kɛ a yɛ sawaa ó bhɔ́ a se nan. Ale yáa a bátize Ní Sɛnnɛnyanin ŋóni tá ó la.

¹² A yɛ́ zɛɛ óo a bhóo. A yáa a yɛ́ maan gbasinin ŋó lɔ́fyɛ kɛ́ a dhyé ŋólu bhyáa a yɛ́ mɔɔnnin ŋó kɔɔnnɔn kɛ́ a foo ŋólu ɲɛɛn tá sábhɛɛ ó man.»

Ɛnza ŋé bátize tɛ́nmɛn

¹³ Ɛnza ŋé bhɔ́ o wáati o lé lɔ́ Galile mála ó lɔ kɛ́nan Zuludɛn bha ywáa o lɔ, kɛ́nan Yaya saala kó aa fɛ́ ké o a ale bátize.

¹⁴ Wáa Yaya é í bá kɛ fɔ kó: «Íle lé kákan kɛ né bátize, tó íle nánla né saala ko né a íle bátize kó kɛ́ díi?»

¹⁵ Ɛnza ŋé a yawi kó: «Sɔ́n ké aa kɛ́ cé ŋótun, kɛ mansɔɔ án ngákan kɛ Ala dhyáaɲɛnngo ó kɛ́ ɲán mín man ó lée wé.» Óo kɛ́ mínngɛ, Yaya e sɔ́n.

¹⁶ Ɛnza ŋé wɛɛ bátize lá, áa bhɔ́ jí ó lɔ tɛ́nmɛn. O wáati kée ŋó lɔ, sángboo óo í lá láka, tó aa Ala yɛ́ Ní sɛnnɛnyanin o yé yíila óyoo biinin ngɛ kɛ́nan í síi a ka.

¹⁷ Tó saaninkan nɔ é bhɔ́ sángboo o lɔ kɛ fɔ kó: «Nyénjɛ ó lée nin, mín ŋan dí ɲɛ́n koyoongɛ. Ale lée né tá nisɔdhyaa o le.»