Matiyu 18 - Mahou

Yɛ́nee kaamɔɔndhye ŋo bɛ́ lɔ mɔɔnba óle?

¹ O wáati kée ŋó lɔ, kaamɔɔndhye ŋolu í mángbaa Ɛnza nan kɛ a manɲaankɛ kó: «Yɛ́ɛtii é bɛ́ lɔ mɔɔnba óle sángboo ó Mansaya ó lɔ?»

² Ɛnza ŋé dhyémuu lɔ́ kíi kɛ alalɔ i cɛ́man

³ tó kɛ fɔ kó: «Tó ní fɔ a yɛ́ tínɲan in ne ngó, ni a mán yɛ́ɛman kɛ kɛ́ óyoo dhyémuu lú, a táa lo sángboo ó Mansaya ó lɔ tún.

⁴ Mɔɔn mínnu wɛ́ɛ í bhóo síi Ala yɛ́ Mansaya ó kɔɔ, mɔɔn mín ŋé fɛ́ kɛ kɛ́ o mɔɔn ó bɛ́ lɔ mɔɔnba óle, o tíi ó kákan kɛ í mányii lé kɛ kɛ́ óyoo dhyé mín ɲé nín.

⁵ O kwɔ, ni mɔɔn mín ngɛ í ɲán síi dhyémuu míin nzúu o kɔ́ɔ né tá ɲiinɲan mán, o tíi óo í ɲán síila né lé kɔ́ɔ wé.»

Ɛnza ngó kɛ í yɛ́ɛ myaan

⁶ «Dhyémuu mínnu wɛ́ɛ lá né la, ní mɔɔn mín ngɛ kɛ́ sɔ́ɔbu le kɛ o kée ngúnnɔn cáan, mín ndɛ́ɛ físaa o tíi o mán o lée kɛ káwaguun mbelebeleba le gúun o tíi o kannan kɛ a tii o bé kɔɔji o cɛ́man.

⁷ Dínɲan ó mɔɔn mín núu kɛ́la sɔ́ɔbu le kɛ i mɔɔnɲɔɔn ólu kúnnɔn cáan, kunnangboya lo ɲé olu yɛ kɛ́yi! Dhyaalagboya lé sɔ́ɔbu yáa kɛ́ mɔɔn ólu kúnnɔn cáan ŋó la. Wáa íle mɔɔn mín ngɛ kɛ́ o sɔ́ɔbu le, kunnangbeya é í yɛ́!

⁸ Ni í bhóo ó wáman í sé ŋó kɛ́ kɛ́ sɔ́ɔbu le kɛ́ í bhyáa yúumukɛ ó lɔ, a tɛɛ í lá kɛ a lafii. Í bhóokeenanman ŋó wáman í séngeenanman ŋó kɛ́ lo ɛliyanan o lɔ, o a físaa í mán í bhóo fyáa óni í sé nváa ó tó ó lé í lá kɛ́ í láfii yaananman tá o lɔ.

⁹ Tó ni í ɲándhye ŋó kɛ́ kɛ́ sɔ́ɔbu le kɛ í bhyáa yúumukɛ ó lɔ, a bhɔ́ í lá kɛ a lafii. Í ɲánkeeman ŋó ló ŋó ɛliyanan o lɔ, o a físaa í mán í ɲandhye nvyáa ó tó ó lé í lá kɛ́ í láfii yaananman tá o lɔ.»

Saa mín ŋwɛ́ɛn túun kɛ́wɛɛ kɛ yé

¹⁰ «Áa í yɛ́ɛ myaan! Ŋwɛ́ɛn dhyémuu mínnu yɛ kóman kɛ sɛ́n ni ŋwé, a kɛ́nan o súu súu lɔ́ɔya. Tó ní fɔ a yɛ́ tínɲan in ne ngó i yɛ malɛɛka olu sé kɛ táa nvá fɛ́ yénɔn kúdɛyi sá ŋó lɔ.

¹¹ [Mɔɔn mínnu tɛ́wɛɛ túun, mɔɔn Dhyénjɛ óo nan o lée lú kísi tɔ́ɔ lɔ.]

¹² A tá ɲánla ó lɔ, ni saa kɛnmɛn kɛ́ kɛ́ mɔɔn lɔ́ bhóo ké o kée ŋan túun, o tíi ó mánfaa saa bíkɔɔnndɔ ni kɔɔnndɔ ŋo tó tii o ka kɛ táa kée mín wɛɛ túun wé kɛ táa ó ɲiin ŋan?

¹³ Tó ní fɔ a yɛ́ tínɲan la ngó, ni a kɛ saa túunnin ŋó yé, a nisɔ yáa dhyáa kɛ tínmin saa bíkɔɔnndɔ ni kɔɔnndɔ ŋólu tuunmɛɛya ó ka.

¹⁴ Aa céne, a Fá mín ŋé sá ŋó lɔ, o tɛ́ fɛ́ ké dhyémɛnsɛn ŋó sí a túun.»

Yúumu mín ngɛ kɛ́ lánanbhaa olu cɛ

¹⁵ «Ni í mɔɔnɲɔɔn o kɛ́ i yáacɛ tá, táa a saala kɛ ó fɔ a yɛ́ i kéenan. Ni a kɛ í kómankan ŋo lɔ́myɛn, ké í wɛ́ɛ ale ní íle cɛ o lɔ́bhyɛ né wé.

¹⁶ Wáa ni a kɛ í bá kɛ i lɔ́myɛn, íi mɔɔn kée ni mɔɔn fyáa lú sí la í ka kɛ táa a ládhye, kɛ mansɔɔ Musa yɛ́ tɔ́ ŋo kó kó ó bɛ́ a í lɔ́bhyɛ sɛ́ɛya fyáa wáman sawa ɲánla.

¹⁷ Ni a man sɔ́n o bɛ́ kwɔ, aa á cɛ o lɔ́ko ó lábhɔ lánanbhaa olu ɲánla. Ni a lo mán sɔ́n kɛ lánanbhaa olu lɔ́myɛn, aa á yace lánanbhɛɛ le wáman nísɔɔnmyaanbhaa le.

¹⁸ Tó ní fɔ a yɛ́ tínɲan in ne ngó, álee kɛ́ fé ŋóo fé nzíli lúukolo ó ka, o sílinin ɲáan kɛ́ sá ŋó lɔ, á kɛ́ fé ŋóo fé nvwée lúukolo ó ka, o yáa fwée sá ŋó lɔ.

¹⁹ Tó ní fɔ a yɛ́ tínɲan in ne íkwɔ ngó, ni mɔɔn fyáa kɛ́ bhyɛ kée mán lúukolo míin nga kɛ kó lɔ́ ɲíin Ala fɛ́ sɛ́ɛ o lɔ, Nvá mín ŋé sá ŋó lɔ, o yáa o kó ó kɛ́ í yɛ.

²⁰ Aa céne, ni mɔɔn fyáa wáman mɔɔn sawa kɛ́ ɲɔ́ɔn nadhyɛ né kósɔn ywáa óo ywáa lɔ, ní olu fɛ́ yénɔn lé wé.»

Bháalakɛdhye mín ndɛ́ yafala

²¹ Piyɛli é í mángbaa Ɛnza nan kɛ a manɲaankɛ kó: «Mantii o, ní mɔɔnɲɔɔn lɔ kɛ ɲáacɛ tá, ngákan kɛ yafa a man síɲan yée lé kɛ? Síɲan wóonvyaa a?»

²² Ɛnza ngó: «Ɔn-ɔn, ndáa fɔ í yɛ́ ngó íi yafa síɲan wóonvyaa lɛ́, wáa fo síɲan bíwoonvyaa síilaaman wóonvyaa.

²³ O ɲán o mán, Ala yɛ́ Mansaya óo tɛ́nmɛn, o lée nín: Ló nɔ́ la, kunndii lɔ é fɔ kó a yɛ wɛ́ɛ mín ŋé yúu la, a yɛ bháalakɛdhye ŋolu la, kó aa fɛ́ kɛ o lá nɔ́.

²⁴ Aa o kóɲanbhɔ ó lámyaan wáati mínnɔn, ii yuutii o kée lánan a saala, wɛ́ɛ mín ɲúu tɛ́ɛ o la, o tɛ́ɛ sháa gbúnigbukɛ.

²⁵ Fé ndɛ́ tɛ́ o yuutii o bhóo kɛ a yɛ yúu ó sala. Kó ólu kɛ́ɲan man cé, a kunndii óo fɔ kó kɛ ale ní a muso ní a dhyé ŋó bɛ́ fele yɔɲan bhóoman tó kɛ a bhóota o bɛ́ fele ké aa sé a yɛ yúu ó sálala o ɲán o man.

²⁶ Bháalakɛdhye ŋóo í kúnmɛɛn ngɛ́ lúu lɔ́ a kunndii o kɔɔ kɛ fɔ a yɛ kó: ‹Mánkoto! Í yóso swáanya nvɛ́, ɲáan í yɛ́ yúu ó bɛ́ sala!›

²⁷ A mánɲwaan é lo a kunndii o lɔ, tó óo yúu o lábe kɛ cɛ ó bhyáa kɛ táa.

²⁸ O cɛ ó bhɔ́nin ŋó kwɔ, óo bhyɛ a bháalakɛɲɔɔn ó lɔ́ le. Ale yɛ́ wɛ́ɛgbannan déniye kɛnmɛn tɛ́ɛ o la. Aa o bháalakɛdhye ŋo myáan a kan ŋo man kɛ a já kɛ a ɲaankii gbɛ́nnɛn ni fɔ lé a yɛ kó: ‹Ɲɛ́n yúu ó sala!›

²⁹ Bháalakɛdhye ŋó o í kúnmɛɛn ngɛ́ lúu lɔ́ a kɔɔ kɛ a dɛ́li tá kó: ‹Mánkoto! Í yóso swáanya nvɛ́, ɲáan í yɛ́ yúu ó sála!›

³⁰ Wáa cɛ óo ó í bá ngbáan tó kɛ a bháalakɛɲɔɔn ó láfii kaso lá sánnin a yɛ yúu ó sála sán o cɛ.

³¹ Bháalakɛdhye ndɔ ólu ɲán é lɔ o kó kɛ́se ŋó lɔ mínngɛ, óo i diin ngbúnigbu kɛ tó ii táa o kó ó bɛ́ lábhɔ i yɛ kunndii o ɲánla.

³² Oo kɛ́ mínngɛ, kunndii oo bháalakɛdhye ŋo kíi kɛ fɔ a yɛ kó: ‹Íle bháalakɛdhye ɲóo ŋó, ɲɔ́ɔn née í tá yúu ó lábe kɛ kúun ngɛ́ ndɛ́li ó lá í kwɔ́ lé.

³³ Aa kɛ́ díi tó íle mán í bháalakɛɲɔɔn ó manɲwaan mánfɛɛ óyoo née mánɲwaan íle lá tɛ́nmɛn?›

³⁴ Kunndii o mwɛ́nnɛnkoɲan o mán, aa bháalakɛdhye ŋo bhyáa kaso lá tɔ́lɔya kɔɔ, kó ni ale kunndii o yɛ́ yúu ó mán sála féfe, kó o bháalakɛdhye ŋo táa bhɔ́.»

³⁵ Ɛnza ŋé wɛɛ kɛ fɔ kó: «Nvá mín ŋé sángboo ó lɔ, o káa a bɛ́ kée ngéenan myáan o ɲán kée ŋó lé mán ni a mán kɛ́ yafala a mɔɔnɲɔɔn mán i yóso ó bɛ́ lá.»