Matiyu 10 - Mahou

Ɛnza ŋé a yɛ kaamɔɔndhye ndá ni fyáa ó bhyáashaala

¹ Ɛnza ŋé a yɛ kaamɔɔndhye ndá ni fyáa ólu kíi tó kɛ lámansa yóo ŋólu gbɛ́ ŋó sébhaaya o dí i man, kɛ yangalo óni shaaya bɛ́suu lákɛɛnya sé dí i man.

² Aa céladhye ndá ni fyáa mín myáashaa, olu tɔ́ɔ ó lée lúu nín: Jónan ó tɔ́ɔ tɛɛ kó Simɔn, o mín ŋe kíila kó Piyɛli, o lɔ́ɔcɛ Andele; Zebede dhyénjɛ fyáa ólu: Zaki ní Yaya;

³ Filipu ní Batelemi, Tomasi ní Matiyu, nísɔɔnmyaanbhaacɛ o; Alife dhyénjɛ Zaki, óni Tade;

⁴ Simɔn Zelɔti ní Zudasi Sikaliyɔti mín ngáa Ɛnza ɲanva.

Ɛnza ŋé a yɛ kaamɔɔndhye ŋolu bhyáashaa cé mínnan

⁵ Ɛnza ŋé a yɛ kaamɔɔndhye ndá ni fyáa ólu bhyáashaa cé mínnan o lée nín: A kɛ́nan sé káafii olu yɛ só ólu la, a kɛ́nan sé Samali só ó sí la.

⁶ Áa táa Izalayɛlika o léelu fɛ́ yé, o mínnu e óo saa túunnin nú lé.

⁷ A kɛ́ kɛ́ táala, áa táa lakawanin kɛ́ le kó: «Ala yɛ́ Mansaya ó lágɛɛnman wáati o wɛ́ɛ bhyáa sé le!

⁸ Áa yaangalotɔ ólu lákɛɛnya, áa su ólu lákuun, áa kwáantɔ ólu lákɛɛnya, áa lámansa yóo ŋólu gbɛ́. Ŋwɛ́ɛn o kó ólu kɛ́ ó sé dí a man gbɛ́ɛgbɛɛ, oo lɔ mínngɛ, áa o kó ólu kɛ́ gbɛ́ɛgbɛɛ.

⁹ Á kɛ́nan sɛ́ɛn, wáman wɛ́ɛ, wáman shaanɛɛn wɛ́ɛ bhyáa a jífa lɔ.

¹⁰ Á kɛ́nan bhɔɔ, wáman deeke fyáa, wáman sawaa lú, wáman gbéle ta. Kɛ mansɔɔ bháalakɛdhye ó kákan kɛ a yɛ́ sunman ŋo sɔɔ.

¹¹ A kɛ́ lo só óo só la, áa ɲaanli kɛ kó yɛ́nee e sé kɛ́la a yɛ́tii lé yénɔn. Áa tó o yɛ́tiiya ó la fɔ kɛ táa sé a táasan o mán.

¹² A kɛ́ fáa lo bhó nɔ́ la, áa fóli kɛ.

¹³ Ni o bhónanbhaa olu kɛ́ í bhóo síi a kɔ́ɔ, i yáa o hɛ́lɛ o sɔ́ɔ, wáa ni i man í bhóo síi a kɔ́ɔ, i táa a yɛ́ fóli o hɛ́lɛ o sɔ́ɔ.

¹⁴ Ni i man í ɲán sii a kɔ́ɔ, wáman kɛ í tóo sii a kómankan kɔ́ɔ bhó mín ní só súusuu la, áa táa kɛ bhɔ́ o ywáa ó lɔ. A táatɔ ó, áa sé mangbasi kɛ a sénan gbánbga ŋo tó yé.

¹⁵ Tó ní fɔ a yɛ́ tínɲan in ne ngó, kítitɛɛ ló ŋo la, bhóo yáa gban o sómɔɔn olu lá kɛ tínmin Sodɔmu yamaan ólu ní Gomɔɔ yamaan ó ka.»

Lɔbhawili mínnu káa kɛ́ kwɔ́la

¹⁶ «Áa í tóomanlɔ! Ní a bhyáashaala óyoo saa lú kɛ táa kóngowuu olu cɛ́man. Oo lɔ mínngɛ, áa i yáakii tó a yɛ́ɛ lɔ óyoo san olu, a yɛ́ kó ó ló mbɛ́ a gbɛ́ óyoo biininngbɛ o.

¹⁷ Áa í yáakii tó a yɛ́ɛ lɔ, kɛ mansɔɔ mɔɔn ólu yáa á ló kítitɛɛbhaa ólu bhóo, óni kɛ a gbási gbɛ́nɲɛn lá i yɛ sɛ́ɛbho ŋolu la.

¹⁸ I yáa táa ni ále yámaantii ólu ní mansa ólu kɛ́ɛnnan né kósɔn. O kó ó yáa kɛ́ sɛ́ɛyaman lé ilee ní káafii olu yɛ́.

¹⁹ Wáa í kɛ a ló mɔɔn ólu bhóo, a kɛ́nan hánmin a fɔ́dhyaa ŋólu ní a kómanseɲan o tá fa nvɛ́. A káa dhyaa mínnu fɔ, olu yáa yíi a mán o wáati o lɔ,

²⁰ kɛ mansɔɔ a káa dhyaa mínnu fɔ, olu táa kɛ́ ále gbúlu fɔ́dhyaa ne. A Fá Ní Sɛnnɛnyanin ŋo lé káa o kóman ólu ló a lálɔ.

²¹ Bhádhyeman ŋólu yáa kɛ́ ɲɔ́ɔn yɛ saya ó sɔ́ɔbu le. Fa ólu yáa o sí kɛ́ i dhyé ŋólu la. Dhyé ŋólu yáa í ɲányɛɛman í fa ólu mán kɛ i fáa.

²² Bɛ́ yáa a mánbhɔ né tɔ́ɔ ó kósɔn. Wáa mɔɔn mín ngɛ í lɔ́ja kɛ táa sé a la ŋó mán, o yáa kísi.

²³ I kɛ a tɔ́lɔ só lɔ́la, áa bwée kɛ táa a lɔ gbɛ́ɛ la. Tó ní fɔ a yɛ́ tínɲan in ne ngó, a táa wɛɛ Izalayɛli só ó bɛ́ lɔyaalala sánnin mɔɔn Dhyénjɛ ó nán ó cɛ.

²⁴ Kaamɔɔndhye ŋo sí mán nvísaa a kaamɔɔn o le, bháalakɛdhye nzí mán nvísaa a kunndii o le.

²⁵ Kaamɔɔndhye mín ndá tɔ́lɔya mán tínmin a kaamɔɔn o tá o ka, o kaamɔɔndhye ŋo kákan né kɛ í ɲáanli, tó bháalakɛdhye mín ndá tɔ́lɔya mán tínmin a kunndii o tá o ka, o kákan né kɛ í ɲáanli. Fɔ́ kɛ́ kɛ́ lútii gbú o mán kó Bɛlizebuli, lúmanbhaa olu tá o mánfaa yóoɲan kɛ tínmin o ka ŋan!

²⁶ A kɛ́nan sháan mɔɔn sí ɲɛn. Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman.

²⁷ Ngɛ́ fé ŋóo fé nvɔ a yɛ́ diwi o lɔ, áa o lábhɔ tée lɔ. Kóman mín ngɛ fɔ́ a tóo lɔ, o kóman ó yáa lá bhó ŋó kúnnɔn.

²⁸ Mɔɔn mín núu mɔɔn fáala tó í tɛ́ sé kɛ a ni o fáa! A kɛ́nan sháan ólu ɲɛ́n. Áa sháan Ala le ɲɛn, Ala lée sé kɛ mɔɔn fásisoo óni í ní o fyáa bɛ́ láfii yaananman o lɔ kɛ i lahalaki yé.

²⁹ Mɔɔn tɛ́ kɔ́ɔn dhyénin nvyáa felela dáasi kéembe la a? O ló mbɛ́ kwɔ, kɔɔnnin ŋo sí tɛ́ í bénan lúuman ni á Fá Ala mán dyɛn o man.

³⁰ Sáanko ále a! Háanin a kúnzhe ó yɛ́ɛ, Ala á ó bɛ́ lá nɔ.

³¹ Oo lɔ mínngɛ, a kɛ́nan sháan. Álee a físaa kɔ́ɔn dhyénin ŋólu lé.»

Ɛnza ngó kɛ í lɔ́la bɛ́ ɲánla kó íi a yɛ kaamɔɔndhye ne

³² «Mɔɔn mín ngɛ í lɔ́ a lá bɛ́ ɲánla kó álee né yɛ́ kaamɔɔndhye ne, né yáa nɔ́ la Nvá ɲánla o míin sá ŋó lɔ ngó o tíi óo ndá le.

³³ Wáa ni mɔɔn mínngɛ í bá né lɔ mɔɔn ólu ɲánla, né yáa bá o tíi ó lɔ Nvá míin sá ŋó lɔ o ɲánla.»

Ɛnza mán nan láha lálo ndɔ́ɔ lɔ, a nánnin ŋé kɛɛ lé lálo ndɔ́ɔ lɔ

³⁴ «A kɛ́nan kɛ́ a kɔ́ɔnnɔn kó nánnin ɲé hɛ́lɛ o lé lálo ndɔ́ɔ lɔ́ lúukolo ó ka, nánnin ndɛ́ hɛ́lɛ lalo ndɔ́ɔ lɔ. Nánnin ŋé kɛɛ lé lálo ndɔ́ɔ lɔ.

³⁵ Kɛ mansɔɔ nánnin ɲe lé kɛ cɛ lo dhyénjɛ óni a fa cɛ, dhyémuso óni a man cɛ, muso óni a manmuso cɛ.

³⁶ Mɔɔn yɛ́ɛla bhónanbhaa o léelu káa kɛ́ í yúu le.

³⁷ Mɔɔn mín nva wáman a man kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne, mɔɔn mín dhyénjɛ wáman a dhyémuso kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne.

³⁸ Mɔɔn mín man a gbáanɲii o tá kɛ bhyáa né kwɔ́ kɛ mansɔɔ a tɛ fɛ́ ké ii ale fáa né kósɔn, o tíi ó mánngan kɛ kɛ́ né yɛ́ kaamɔɔndhye ne.

³⁹ Mɔɔn mín ŋé fɛ́ kɛ a ni o lámala, o tíi ó yáa bɔɔn a ní o lɔ, waa mɔɔn mín ngɛ bɔɔn a ni o lɔ́ né kósɔn, o tíi ó yáa ɛliyanan o sɔ́ɔ.»

Bhaaye é kóbhɛɛkɛ ó la

⁴⁰ «Mɔɔn mín ngɛ í ɲán sii a kɔ́ɔ, oo í ɲán siila né lé kɔ́ɔ wé. Mɔɔn mín ngɛ í ɲán sii né kɔɔ, oo í ɲán siila né bhyáashaabhaa o lé kɔ́ɔ wé.

⁴¹ Mɔɔn mín ngɛ í ɲán sii Ala yɛ céla ó kɔ́ɔ o yɛ́ célaya ó kósɔn, o tíi o yáa o céla o yɛ́ bhaaye o ɲɔ́ɔn nzɔ́ɔ, mɔɔn mín no ngɛ́ í ɲán sii Alamɔɔn o kɔ́ɔ o yɛ́ Alamɔɔnya ó kósɔn, o tíi ó yáa bhaaye sɔɔ Alamɔɔn o la.

⁴² Tó ní fɔ a yɛ́ tínɲan in né ngó, mɔɔn óo mɔɔn kɛ́ jíswaan ó jífyɛ ɲan kée dí ɲɛ́n kaamɔɔndhye ŋo bɛ́ lɔ fítiinin ŋo mán kó kɛ mansɔɔ aa né yɛ́ kaamɔɔndhye ne, o tíi o táa bɔɔn a saa o lɔ.»