Maki 7 - MahouƐnza ni Falizɛn ŋólu kíti kɛ́la náanmun kɔɔ ólu ka Matiyu 15.1-9 1 Falizɛn ŋolu ní sɛliya kaamɔɔn ólu dáman é bhɔ́ Yeluzalɛmu kɛ́nan í mínin Ɛnza nan. 2 Ii nan yé óyoo a yɛ kaamɔɔndhye ŋo lɔ́luu lɔ́min kɛla ni i bhóo sɛ́nnɛnyabhɛɛ ó lé, o kɔ́ɔ o tɔ́ɔ kó kɛ lɔ́min kɛ́ ni í bhóo kwóbhɛɛ óle, kɛ kɛ óyoo Falizɛn ŋolu yɛ́ nánmun óo fɔ́la tɛ́nmɛn. 3 Falizɛn ŋolu ni Yawudhyaa o tɔ́ ólu tɛ́ lɔ́min kɛla ni i bhóo kwóbhɛɛ o le, kɛ mansɔɔ ii i bhyɛ́man ólu tá nánmun o lé ka. 4 Í kɛ́nan kɛ bhɔ́ lɔ́ɔ o lɔ, i tɛ́ɛ í kwó ótun kɛ í sɛ́nnɛnya kɛ tó lɔ́min kɛla. Náanmun kɔɔ ó shɛ́ɛman ɲé, i tɛɛ olu láteenan lé, mín ŋé nan kɛ́ bhɔ́ɔlaa o lɔ́kwo ólu le, yáafyɛ olu, óni sháanɛɛnlaa ólu. 5 Falizɛn ŋólu ní sɛliya kaamɔɔn ólu Ɛnza mánɲaankɛ kó: «Mínnɛɛn lé kósɔn tó í yɛ́ kaamɔɔndhye ŋolu tɛ́ bhyáala i bhyɛ́man ólu yɛ́ laanan ó kwɔ, tó ii lɔ́min kɛla ni i bhóo kwóbhɛɛ óle?» 6 Aa i yawi kó: «Céla Ezayi é célaya mínngɛ a ka, a jó lé tɛ́ɛ a mán, fyáangafo ólu. Aa sɛwɛnin ɲé kó Ala tɛ́ɛ fɔ́la kó: mɔɔn míinnu bwóɲanla í lá lɔ́ lé, wáa i yóso o ywáa a já nán. 7 Ii mátola gbɛ́ɛgbɛɛ lé wé, Í lée min núu mɔɔn ólu kalanan tɔ́ nu la, mín núu fáanan mɔɔndhye ŋólu la.» 8 Aa fɔ i yɛ íkwɔtun kó: «Áa Ala yɛ tɔ́ ŋo tóla yénɔn, kɛ mɔɔn olu tá nánmun o lé látaaman.» 9 Aa wɛɛ kɛ fɔ íkwɔ kó: «Á lée i bánan Ala yɛ́ tɔ́ ŋo mán tó kɛ a yɛ́ laanan ó léelu tá a? 10 Waa Céla Musa é fɔ kó: Í fá ní í Wóobhaa bwóɲan, kó ni mɔɔn mínngɛ kómanyoo nvɔ́ a fa wáman a wóobhaa man, kó i kákan kɛ o tíi o fáa lé. 11 Wáa Álee lú kó ní mɔɔn lɔ́ kɛ fɔ a fa yɛ wáman a wóobhaa yɛ kó: ‹Ndɛ́ káa móota mín dí í mán kɛ́ í lɔdhyɛman, óo kɔlɔba ne le. O kɔ́ɔ o tɔ́ɔ kó ŋwɛ́ɛn wɛɛ o díla Ala man.› 12 Áa o tíi ólu láfiila lé wé. I tɛ́ fósi díla i wóobhaa ni i facɛ mán bhée. 13 Ále tá nánmun olu kósɔn, Ala saaninkan ŋolu nánfa tɛ́ la mɔɔn ólu ɲánla bhée. A yɛ́ɛ é ó bhɔ́ɲɔnngo shɛ́ɛman ngɛ́la.» Fé mín núu sé mɔɔn lánɔɔnla Matiyu 15.10-20 14 Ɛnza ŋé yaman ó kíi ko kwáa kɛ tó kɛ fɔ i yɛ kó: «A bɛ́ a í tóomanlɔ nɔn, ké áa bhɔ́ kóman míin ɲánle. 15 Lɔ́minfe ŋo súu óo súu, ní a táala mɔɔn kɔ́ɔnnɔn lé, o sí tɛ́ sé mɔɔn lánɔɔnla, fɔ́ fé mín ŋé bhɔ́la mɔɔn yóso o lɔ, o lée mɔɔn lánɔɔnla. 16 [Tóo kɛ́ kɛ́ mɔɔn mín ngún mán, o a lɔ́myɛn.]» 17 Ɛnza ŋé bhɔ́ mínngɛ yaman o cɛ́man kɛ lo bhónan, a yɛ kaamɔɔndhye ŋolu a manɲaankɛ o saanan o kɔ́ɔ o mán. 18 Aa fɔ i yɛ kó: «Ále, yáanin bí Ále mán yáakii sɔ́ɔ bhá ŋan? A tɛ́ myɛ́nnan kó fé nzúu óo súu é lónan mɔɔn kɔ́ɔnnɔn o si tɛ́ mɔɔn lánɔɔnla a? 19 Kɛ mansɔɔ o lɔ́minfe ŋo tɛ́ lónan mɔɔn yóso o lɔ, waa a lónan mɔɔn kɔ́ɔnnɔn le tó kɛ́wɛɛ kɛ bhɔ́ sháa kunmantaa fɛ́.» O bhóo ó mán, áa yáa i la óyoo sunman ŋo bɛ́ sɛ́nnɛnyanin née. 20 Aa fɔ íkwɔ kó: «Fé mín ŋé bhɔ́la mɔɔn o yóso ó lɔ, o lée mɔɔn lánɔɔnla. 21 Kɛ mansɔɔ míliya yóo ŋólu bɛ́ bhɔ́la mɔɔn o yóso óle lɔ: ‹Káanngɛ ólu, soɲan ólu, mɔɔn fáa ólu, 22 ɲɔnmɔɔnya ólu, ɲánbhɔnvɛ olu, yóoɲan ólu, lanɛɛnni o, kɛ dínɲanlɔtɛɛ kɛ cɛ́yoo ne, ɲánngboya o, mɔɔn tɔ́ɔ cáan ŋó, kɛ í yɛ́ɛ lɔ́bwoɲan, yáakiindaɲan o. 23 O kóyoo ŋó bɛ́ɛ bhɔ́la mɔɔn yóso ó lé lɔ tó kɛ mɔɔn lánɔɔn.› » Lónanmuso lɔ é lála Ɛnza nan Matiyu 15.21-28 24 Oo wɛɛ mínngɛ, Ɛnza ŋé bhɔ́ o ywáa ó lɔ, tó kɛ táa Tili mála ó lɔ. Aa lo bhó nɔ́ la. A tɛ tɛ́ fɛ́ ké mɔɔn sí a lɔgbɛ óyoo aa yénɔn, wáa a mán sé tóla loo nɔn. 25 Lámansayoo ndɛ́ɛ muso lɔ́ dhyémuso fɛ́, oo a tɔ́ɔ myɛ́n mínngɛ, aa nan a saala téeman tó kɛ í kúnmɛɛn nɔkɛɛ a kɔɔ. 26 O muso ó tɛ́ tɛ Yawudhyaa le, Gɛlɛki le tɛ́ɛ ale, Fenisika kɛ bhɔ Sili mála o lɔ. Aa Ɛnza mandhyaa kó aa lámansayoo ŋó gbɛ́ a dhyémuso o fɛ́. 27 Wáa Ɛnza ŋé fɔ a yɛ kó: «Dhyémuu ólu tó yénɔn ótun ké ii fá, kɛ mansɔɔ kɛ dhyémuu ólu yɛ́ sunman ŋó ta kɛ a lafii ŋwúunnin ŋólu kɔɔ o mánɲin!» 28 Aa Ɛnza ɲawi kó: «Oo tínɲan Mantii ó, wáa sunman mín ŋé bhɔ́la dhyémuu ólu bhóo kɛ bé tabɛli o kɔɔ ŋwúunnin ŋólu o lɔ́ɔnan.» 29 Ɛnza ŋé fɔ a yɛ, «O láfaɲan kée ŋó kósɔn ko: táa lúman, lámansayoo ŋó wɛ́ɛ bhɔ́ í dhyémuso o fɛ́.» 30 Aa í kwɔ́sɛɛ a bhóo lúman, kɛ táa a dhyémuso o lánin nzɔ́ɔ gbála ŋo ka, ké lámansayoo ŋólu wɛ́ɛ bhɔ́ a fɛ́. Ɛnza ŋé cɛ tóogbee nɔ lákɛɛnyala 31 Ɛnza ŋé bhɔ́ Tili mála o lɔ, kɛ bhyáa Sidɔn só ó fɛ́, kɛ í kwɔ́sɛɛ Galile bhá lá o la Dekapɔli mála o lɔ. 32 Ii nan cɛ tóogbee nɔ́ lé a yɛ ó le lɔ. A kóman kó o gbánnin ndɛ́ɛ. Ii Ɛnza ndɛ́li kó aa í bhóo lá a ka. 33 Aa táa ale ywáa já nɔn, kɛ í cɛ́bhɔ ale yaman o la. Aa í bhóokwɛɛnnin ŋolu bhyáa cɛ ó tóo ólu lɔ, kɛ í láyi bhyáa cɛ ó nyɛ́n ŋo ka. 34 Aa í ɲán lɔ sáman, kɛ í ɲáankii láyii, kɛ fɔ cɛ ó yɛ kó: «Efata!» O kɔ́ɔ o tɔ́ɔ kó: «Í láka!» 35 O ywáaninngee ŋo lɔ, cɛ ó tóo óo í láka, a nyɛ́n ŋo yúu o tɛɛ, kɛ a nyɛ́n ŋo fwɛ́ɛnya a lá lɔ. Aa kóman cɛ́ɛne ne. 36 Ɛnza ŋé fɔ i yɛ kɛ a mangbɛya kó i kɛ́nan ó kóman ó fɔ́ mɔɔn sí yɛ: Wáa a tɛ́ɛ kɛ́ o fɔ́la mɔɔn ólu yɛ́, kó i kɛ́nan la fɔ́ mɔɔn sí yɛ, ó lé yɛ́ɛ tɛ́ɛ í sɛ́wɛ lónan kóman ó láse ó mán ywáa bɛ́ lɔ. 37 Óo mɔɔn bɛ́ kɔɔnnɔn é fii, i tɛ́ɛ fɔ́la lé kó: «Aa kó mínnu kɛ́la o bɛ́ káɲin kɛ tínmin. Aa tóogbee ŋólu tóo ó lákala, tó kɛ bhóbho ólu lákoman.» |
© (Active), Wycliffe Bible Translators, Inc. All rights reserved.
Wycliffe Bible Translators, Inc.