Maki 6 - MahouNazalɛtika olu tɛ́ lála Ɛnza nan Matiyu 13.53-58 ; Luka 4.16-30 1 Ɛnza ŋé bhɔ́ o ywáa ó lɔ kɛ táa a fɛso. A yɛ kaamɔɔndhye ŋolu tɛ́ɛ a kwɔka. 2 Lɔnwɛɛnlilo ŋoo sé mínngɛ, aa mɔɔn olu kála námyaan sɛ́ɛbho ŋo lá. Oo bhɔ́ bɛ́ kɔ́ɔman, fɔ́ ii fɔ́la kó: «Ɛɛ, aa bhɔ́ míin mbɛ́ lé mín? Yɛ́ɛtii hákiimanɲan ni sébhaaya míin ndí a man? Tó káwananngo shɛ́ɛman ŋé kɛ́la a bhóolɔ nín? 3 Bháa ale tɛ Mwɛnyamu dhyénjɛ yíimanlɛsɛbhaa o le a? Óni Zaki, Zose, Zuda óni Simɔn lú bhádhye ne a? Ɲɔ́ɔn ngo án ne ní a lɔ́ɔmuso ó léelu bɛ́ síinin ɲé só kée nán nín né?» I sikaseɲan mín ŋé wé, oo kɛ́ sɔ́ɔbu le tó i man lá Ɛnza nan. 4 Ɛnza ŋé fɔ i yɛ kó: «Bwóɲan lée Céla o yɛ́ ywáa bɛ́ lɔ fɔ́ a fɛsobhaa olu cɛ́man, a bhádhye ŋólu cɛ́man, óni a yɛ bhónanbhaa olu cɛ́man.» 5 Ɛnza mán sé káwananngo sí kɛ́la fɔ́ aa í bhóo lá yangalotɔ dámandaman mínnu ka tó kɛ́ i lákɛɛnya. 6 I yɛ lánanbhɛɛya o lée a kɔɔnnɔnfii. Ɛnza ndɛ́ɛ táala lakawanin kɛ siiɲɔɔnso dhyénin olu la. Ɛnza ŋé a yɛ kaamɔɔndhye ndá ni fyáa ólu bhyáashaala Matiyu 10.5-15 ; Luka 9.1-6 7 Aa a yɛ kaamɔɔndhye ndá ni fyáa ólu kíi, kɛ i bhyáashaa fyáafyaa só ólu la. Aa lámansayoo ŋólu gbɛ́ ŋó sébhaaya dí i man. 8 Aa nɔn lá i ka kɛ fɔ kó: «Á kɛ́nan fósi tá táamanlataa míin nɔ fɔ́ gbéle kée. A kɛ́ sunman ndá, a kɛ́ bhɔɔ tá, a kɛ́nan shaanɛɛn wɛ́ɛ bhyáa a yɛ cɛ́siiyaa o lɔ. 9 Áa sawaa ló wáa deeke fyáa mánngan kɛ táa a bhóo.» 10 Aa fɔ i yɛ íkwɔtun kó: «A kɛ́ sé só mínnan, i kɛ a yɛ́tiiya kɛ bhó mín ne, áa tó o lé la fɔ kɛ táa sé a bhɔ́ ó mán o só ó la. 11 Ní só mínnan mɔɔn lu kɛ í bá kɛ́ í ɲán sii a kɔ́ɔ, wáman i mán a kómankan ŋo lɔ́myɛn, a bhɔ́tɔ ó aa a sé o mangbasi kɛ a sénan gbángba ŋo tó yé, o yáa kɛ́ tɔɔmansii lé kɛ́ í lasowi.» 12 «Oo wɛɛ mínngɛ kaamɔɔndhye ŋólu táa a láse mɔɔn ólu mán, kɛ fɔ i yɛ kó ii i yóo ólu yɛ́ɛman.» 13 Ii lámansayoo nzhɛ́ɛman ngbɛ́, ii túu bwɔ́ yangalotɔ shɛ́ɛman ngúnnɔn, kɛ i lákɛɛnya. Yaya Bátizelikɛbhaa yɛ́ sayako o Matiyu 14.1-12 ; Luka 9.7-9 14 O wáati o lɔ, Ɛnza ndɔ́ɔ tɛ́wɛɛ gbáan ywáa bɛ́ lɔ. A manngan ŋó lée sé mansacɛ o mán, mín ndɔ́ɔ kó Elɔdi. Lɔ́lu tɛ́ɛ a yéla Yaya Bátizelikɛbhaa le lé. Kó o wɛɛ kúun kɛ bhɔ́ sú ólu cɛ́man! O lé kósɔn káwananngo ólu kɛ́ sé é a yɛ. 15 Lɔ́gbɛɛ lu yɛ́ɛ tɛ́ɛ a yéla Céla Eli lé le. Lɔ́gbɛɛ lu tɛ́ɛ a yéla jónan jónan céla o lé lɔ́ le. 16 Elɔdi é Ɛnza ngomyɛn mínngɛ, aa fɔ kó: «Ŋwɛ́ɛn Yaya Bátizelikɛbhaa mín ngún ndɛ́ɛla, o lé wɛ́ɛ kúun wé.» 17 Wáa, Elɔdi gbú tɛ́ wɛ́ɛ fɔ kó ii Yaya lálɔ, kɛ a sili, kɛ́ a bhyáa kasola. A tɛ wɛɛ o fɔ kɛ a kun ngɛ́ a bhádhyemannjɛ Filipu muso Elodiyadi yɛ ko o lé fɛ. 18 O kó ó lɔ, Yaya tɛ́wɛɛ fɔ Elɔdi yɛ́ lé kó a mánngan kɛ a bhádhyemannjɛ o muso Elodiyadi tá kɛ o kɛ́ a muso le. 19 Elodiyadi mwɛ́nnɛnnin ndɛ́ɛ Yaya mán, a tɛɛ fɛ́ kɛ Yaya fáa, wáa a tɛ́ tɛ se 20 kɛ mansɔɔ. Elɔdi ó tɛ́ɛ sháannan Yaya ɲɛn ne, a tɛɛ lɔ ŋóyoo mɔɔnteenin né tɛ́ɛ ale, kɛ a sɛ́nnɛnya. A ló ndɛ́ɛ í yáakii tóla Yaya lɔ. Yaya kómankan ŋo lɔ́myɛn ŋó tɛ́ tɛ́ Elɔdi tóla sii lɔ. A kan ŋó lɔ́myɛn ŋó ló ndɛ́ɛ dí a yɛ. 21 Elodiyadi é nán ló mɛɛ lɔ́ sɔ́ɔ, o lée kɛ́ Elɔdi wóolo ŋo sámyɛ ŋó le. O tée ó mán, Elɔdi é sunmannvemba dí a latuunnan ólu mán, a yɛ swáasi olu kúnndii ólu, ní Galile mála mɔɔnba ó shɛ́ɛman mán. 22 Elodiyadi dhyémuso é nan lo bhó ŋó kɔ́ɔnnɔn tó kɛ lɔ ngɛ. A ko é dhyáa Elɔdi ní a latuunnan ólu yɛ. Mansacɛ óo fɔ sínngbiinin ŋó yɛ́ kó: «Íi fé ŋóo fé nvɛ́, o fɔ́ ɲɛ́n ké ní ó di í mán.» 23 Elɔdi é laheli ta sínngbiinin ó yɛ kɛ́ í shɛ́n kɛ fɔ kó: «Ní í kɛ fé ŋóo fé ngófɔ ɲɛ́n, ɲáan o dí í mán, háanin a kɛ kɛ́ ɲɛ́n yamaan o fán ngée ŋo lé.» 24 Dhyémuso ó bhɔ́ tó kɛ́nan a fɔ a wóobhaa yɛ kó: «Ní mínnɛɛn lé kófɔ?» A wóobhaa é a yawi kó: «Yaya Bátizelikɛbhaa kún ŋó.» 25 Aa í kwɔ́sɛɛ lɔgbannin né kɛ́nan fɔ mansacɛ o yɛ kó: «Ní fɛ́ ké íi Yaya Bátizelikɛbhaa kún ŋó bhyáa tása lɔ lɔ kɛ́nan a di mán kwáakwaalenin.» 26 O kóman óo mansacɛ o ɲánlasii gbútuukɛ. Wáa a tɛ tɛ́ se kɛ í bá mée, a yɛ láheli ta ni ólu ni a latuunnan ólu kósɔn. 27 O ywáaninngee ŋo lɔ, mansacɛ óo a yɛ swáasi o kée myáa kó o a táa Yaya kún ŋó tɛ́ɛ kɛ́nan o di a man. O lée kɛ́ céladhye ŋo táa ó lé kasobho ŋo la, kɛ táa Yaya kún ŋó tɛ́ɛ. 28 Aa nan Yaya kún ŋó lé tása lɔ kɛ́nan ó lo sínngbiinin ŋó bhóo, tó sínngbiinin ŋo a lo a wóobhaa bhóo. 29 Yaya yɛ́ kaamɔɔndhye ŋólu o myɛ́n mínngɛ, ii nan Yaya fée ó tá kɛ a sutaa kábulu lɔ lɔ́. Ɛnza ŋé cɛ wáa lóo bhálola Matiyu 14.13-21 ; Luka 9.10-17 ; Yaya 6.1-14 30 Céladhye ŋólu í kwɔ́sɛɛ Ɛnza man. Ii kó óo kó kɛ, óni ii kaa mínnu kɛ, ii nan o bɛ́ kwaan kɛ́ a yɛ. 31 Nanbhaa olu ní táabhaa ólu sháaya kóyoo ŋó mán, ale ni a yɛ kaamɔɔndhye ŋólu mán lɔ́minkɛlaa sɔ́ɔ. Ó lé yɛ́ɛ kósɔn, aa fɔ i yɛ kó: «Aa nan án ndáa só o kwɔ́ka, ké án ndáa án nɔ́nwɛɛn yénɔn dɔ́ɔnin.» 32 Ii táa kúun ŋó lɔ́ kɛ táa í kéenan ywáa cɛ́bhɔnin nɔn. 33 Mɔɔn shɛ́ɛman ŋé i yé tó kɛ i táalaa ó lɔ. Mɔɔn ólu bhɔ́ só ó bɛ́ lá í sénan i ɲángbannin ne kɛ táa Ɛnza ni a yɛ kaamɔɔndhye ŋolu kunmyɛ o ywáa ó lɔ. 34 Ɛnza ŋé bhɔ́ kúun ŋó lɔ́ mínngɛ, aa yamanba ó yé mɔɔn ólu mánɲwaan é lo a lɔ, kɛ mansɔɔ i tɛ́ɛ lé óyoo kunnansiibhaa tɛ́ saa mínnu la. Tó aa i kála kó shɛ́ɛman nan. 35 Wáati o tɛ́wɛɛ wɛɛ yanvala, a yɛ kaamɔɔndhye ŋolu í mángbaa a lá tó kɛ fɔ a yɛ kó: «Ya ŋó cɛ́bhɔnin ɲé, wáati o ló ŋwɛ́ɛn yánva, 36 Yaman ó lábhyaa ké ii táa sunman nzá kanman ŋólu ní i lafɛso olu la.» 37 Waa Ɛnza ŋé i yawi kó: «Ále gbúlu a sunman dí i man.» Ii fɔ a yɛ kó: «Íi fɛ́ ké án ndáa wɛ́ɛgbannan déniye kɛnmɛn fyáa sa sunman nan i yɛ a?» 38 Aa i mánɲaankɛ kó: «Búlu yée lée a bhóolɔ? Áa táa o mánfɛɛ.» Ii táa ɲaanli kɛ́ mínngɛ, ii nan fɔ kó: «Búlu lóo lée án móo, óni yɔ́ɔ dhyé nvyáa.» 39 Ɛnza ŋé nɔ lá a yɛ kaamɔɔndhye ŋolu ka kó ii mɔɔn ólu bɛ́ lasii bínngɛnnɛn o ka dhyɛ bhóoman. 40 Mɔɔn ólu í síi kɛnmɛn kɛnmɛn, óni bíloolu lóolu. 41 Ɛnza ŋé búlu lóo óni yɔ́ɔ dhyé nvyáa ó tá, kɛ í ɲán layɛɛ sángboo o mánshaa fɛ́ kɛ Ala bálika bhɔ́. Aa búlu ólu kúunndɛɛtɛɛ kɛ i lo nó a yɛ kaamɔɔndhye ŋolu bhóo. Kó ii a lɔtaa. Aa yɔ́ɔ dhyé nvyáa ó lɔtaa bɛ́ lá o ɲán kée ŋó mán. 42 Mɔɔn ólu bɛ́ é lɔ́minkɛ kɛ fá. 43 Tó ii nán seenin ndá ni fyáa láfanin né búluguun ni yɔ́ɔ la. 44 Mɔɔn mínnu tɛ́ɛ lɔ́minkɛsɛɛ o lɔ ólu tɛ́ɛ cɛ wáa lóo lé le. Ɛnza ŋé táaman kɛ́la bháji o ka Matiyu 14.22-33 ; Yaya 6.15-21 45 O ywáaninngee ŋo lɔ, Ɛnza ŋé fɔ a yɛ kaamɔɔndhye ŋólu yɛ kó ii í bhyáa kúun ŋó lɔ, kɛ bhá ó tɛ́ɛ a ɲɛn kɛ táa a ɲan dɔ́ o mán Bɛtisayida só ó tɔ́ɔfɛ. Sánnin ale a yaman o lábhyaa. 46 Aa wɛɛ i sáanan í lá mínngɛ, aa táa tii ó ka, kɛ í sɛ́ɛ. 47 Ywáa ó séla wáati mínnɔn, ké kúun ŋó wɛ́ɛ lo bhá ó cɛ́man, kɛ ale kée ndó lúuman. 48 Fáyi o mán, aa yé óyoo fwɛ́ɛn ó wɛ́ɛ a yɛ kaamɔɔndhye ŋólu mánsɛɛ kúunnanbwee o lɔ. Kúun ŋó tɛ́ tɛ́ séla táala cɛ́ɛne ne bhée, kɛ mansɔɔ fwɛ́ɛn ó tɛ wɛɛ gbíiya i ka. Aa táaman kɛ́ bhá ó ka, kɛ táa i saala. A tɛ káa tínmin i ka. 49 Kaamɔɔndhye ŋólu a yé táaman kɛ́la bhá ó ka mínngɛ, i tɛ́ɛ a yéla mɔɔn lɔ́ lé sáula lé. Ii gbáa ngbáa. 50 Kɛ mansɔɔ í bɛ́ ɲán tɛ́ɛ a lá, ii sháan koyoongɛ, o ywáaninngee ŋo lɔ, aa kóman i yɛ aa fɔ i yɛ kó: «Áa í lɔ́ja! Né lée wé, a kɛ́nan sháan.» 51 Tó aa í yɛ́ɛ kúun ŋó lɔ́ i fɛ́, tó fwɛ́ɛn óo í mánla. O lée i bɛ́ kɔɔnnɔnfii koyoongɛ. 52 Kɛ mansɔɔ Ɛnza ŋé káwananngo mín ngɛ búlu ó la, i mán bhɔ́ o ɲánle. Hákii tɛ́ tɛ́ i la. Ɛnza ŋé yangalotɔ lú lákɛɛnyala Zenezalɛti mála o lɔ Matiyu 14.34-36 53 Ii wɛɛ bhá ó tɛ́ɛla tó kɛ í bhyáa lúuman Zenezalɛti mála o lɔ. 54 Ii í yíi kúun ŋó lɔ́ tɛ́nmɛn, mɔɔn ólu Ɛnza manlɔ. 55 Ii bwée ó lé lɔ kɛ táa a nanko o fɔ́ o mála o ywáa bɛ́ lɔ. Ɛnza ndɛ́ɛ táa só óo só lá o mála o lɔ, mɔɔn óo mɔɔn tɛ́ɛ a kolamyɛn, olu bɛ́ tɛɛ a kɛla o ɲán kée ŋó lé mán. Ólu tɛ́ɛ nánla ni i ta yangalotɔ ólu lé láfe ŋolu ka a saala. 56 A tɛɛ táa ywáa súu óo súu lɔ, lúukɔɔnnɔn o, só olu la o, tóola olu la o, mɔɔn ólu tɛ́ɛ nánla i yɛ yangalotɔ ólu díla a mán bháa lɔ́ lé, tó kɛ a dɛ́li kó aa jɛn ké yangalotɔ ólu a í bhóo túu a yɛ deekeba ó lágboo lá. I súu óo súu é í bhóo túu a lá, o mɔɔn ó bɛ́ bɛ́ é kɛ́ɛnya. |
© (Active), Wycliffe Bible Translators, Inc. All rights reserved.
Wycliffe Bible Translators, Inc.