Maki 1 - Mahou

Yaya Bátizelikɛbhaa yɛ lakawaninkan ŋo

¹ Sanmankanmɛɛ mín ŋé Ɛnza Ngílisi kofɔla, Ala dhyénjɛ o, oo í lámyaanla tá ne.

² Kóman míin né sɛwɛnin ndɛ́ɛ céla Ezayi yɛ́ kitabu o kɔ́ɔnnɔn kó: «Né Ala yáa ɲɛ́n céladhye ŋó cé í ɲɛn, Kɛ i yɛ́ sháa ó lɔ́bhyɛ.

³ Mɔɔn lɔ́ é gbáanan dhyɛ́ ó lɔ kó: ‹Áa Mantii ó yɛ́ sháa ó lálaa, áa a tínminnaa ólu látee.› »

⁴ Yaya Bátizelikɛbhaa é a yɛ́ɛ yáa dhyɛ́ o lɔ o bhóo ó lé mán. A tɛɛ a lásela mɔɔn ólu mán kó íi díminsa kɛ́ fala í yɛ́ kóyoo ŋólu la kɛ́ bátize ké í yɛ́ yúumu ólu a yafa i mán.

⁵ Zude mála o mɔɔn olu bɛ́, óni Yeluzalɛmuka ólu tɛ́ɛ nánla a saala. I tɛɛ í lálabhɔ la í yɛ́ yúumu olu mán bɛ́ ɲankɔɔ lé, tó Yaya tɛ́ɛ i bátize bhá ó lɔ, mín ndɔ́ɔ kó Zuludɛn.

⁶ Deeke mín ndɛ́ɛ Yaya kannan, o lálaanin ndɛ́ɛ ɲɔ́ɔnmɛɛnshe le la, a yɛ cɛ́siiyaa o tɛ́ɛ gboo lé le. A tɛɛ a yɛ́ɛ bhálola gɔ́tiba ó léelu la, óni wówoninnduu o.

⁷ A tɛɛ a lásela yaman o mán kó: «Mín ngáa nan né kwɔ, ó yɛ́ sébhaaya o á bwó né tá ó lé. Né mánngan kɛ́ manyii kɛ́ a yɛ́ sawaa o yúu ó fwée.

⁸ Née a bátize jí lé lɔ, wáa ale káa a bátize Ala Ní Sɛnnɛnyanin ŋó lé la.»

Ɛnza ɲɛn bátizeliko óni a yɛ lɔswaannin o

⁹ O wáati o lɔ, Ɛnza ŋé nan kɛ bhɔ́ Galile só lɔ la, mín ndɔ́ɔ kó Nazalɛti. Tó Yaya é a bátize Zuludɛn o lɔ.

¹⁰ A tɛ́ɛ bhɔ́la jí ó lɔ́ wáati o mínnɔn, aa sángboo o yé í lákala, tó kɛ Ala Ní Sɛnnɛnyanin ŋó yé yíila a ka ŋóyoo biininngbɛ.

¹¹ Kómankan nɔ é bhɔ́ sá ŋó lɔ kɛ fɔ kó: «Íle lée nyenjɛ óle, mín ŋan dí ɲɛn koyoongɛ. Íle lée né tá nisɔdhyaa o le.»

¹² Oo kɛ́ tɛ́nmɛn, Ala Ní Sɛnnɛnyanin ŋóo a látaa dhyɛ́ o ka.

¹³ Aa tee bínaannin le kɛ́ dhyɛ́ o ka, ké Sɔtaannan é a lɔ́swaannan. A tɛ́ɛ a yɛ dínɲanlɔtɛɛ ó kɛ́la bínnɔnsoo ó léelu cɛ́man. Malɛɛka olu tɛ́ɛ gbáamyaanla a lá.

Ɛnza ɲɛn kaamɔɔndhye njónan ólu

¹⁴ Yaya bhyáanin ŋó kwɔ́ kasola, Ɛnza ŋé táa Ala yɛ sanmankanmɛɛ ó láse Galile mála o lɔ.

¹⁵ A tɛɛ fɔ́la kó: «Wáati mín ŋé sii, o wáati o wɛ́ɛ sé. Ala yɛ́ Mansaya ó wɛ́ɛ í mángbaa án nan. Áa a yóo ólu yɛ́ɛman, áa sɔ́n sanmankanmɛɛ ó mán.»

¹⁶ A tínminndɔ o lé Galile bhá lá o la, aa yɔfiibhaa fyáa yé, Simɔn ní a lɔɔcɛ Andele. I tɛ́ɛ yɔ́ɔ myáan bhá ó lɔ.

¹⁷ Ɛnza é fɔ i yɛ kó: «Áa bhyáa ngwɔ́, ɲáan a kɛ́ mɔɔn ɲíinmaa lu le ké áa i lanan né mán.»

¹⁸ O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ bhyáa Ɛnza ngwɔ.

¹⁹ Ɛnza ŋé í cɛ́bhɔ o ywáa ó lá mínngɛ dɔ́ɔnin, aa Zebede dhyénjɛ fyáa ó yé, Zaki óni a lɔɔcɛ Yaya. I tɛɛ i yɛ yɔ ólu lɔ́bhyɛnan kúun ŋó kɔ́ɔnnɔn.

²⁰ O lée kɛ i kíi ó lé Ɛnza ngwɔ, o ywáaninngee ŋó lɔ. Ii í kwɔ́ kɛ́ i facɛ Zebede óni bháalakɛdhye ŋolu lá kúun ŋó kɔ́ɔnnɔn, tó kɛ í bhyáa Ɛnza ngwɔ́ka.

Ɛnza ŋé lámansayoo ngbɛnan cɛ lɔ́ fɛ́

²¹ Ɛnza ni a yɛ kaamɔɔndhye ŋólu táa só lɔ́la mín ndɔ́ɔ kó Kapɛnamu. Lɔnwɛɛnlilo ŋo la, aa lo sɛ́ɛbho ŋo kɔ́ɔnnɔn, tó kɛ lakawanin kɛ.

²² Ii káwakoya a yɛ́ mɔɔn kalanzeɲan ó kósɔn, kɛ mansɔɔ a tɛ́ɛ lakawanin kɛla óyoo fáan é mɔɔn mín móo, wáa a tɛ tɛ́ a kɛ́la óyoo sɛliya kaamɔɔn olu.

²³ Aa tó mɔɔn ólu kalanan í yɛ́ sɛ́ɛbho ŋo kɔ́ɔnnɔn, tó cɛ lámansayoondɔ lɔ́ é í wíi kɛ gbáa, tó kɛ fɔ kó:

²⁴ «Ee! Ɛnza Nazalɛtika, Mínnɛɛn lée né ní i lé cɛ? I wɛ́ɛ nan kɛ́ án hálaki a? Ii mɔɔn mín né, ní ó lɔ. Ile lée Ala yɛ́ céladhye nzɛ́nnɛnyanin ŋó lé.»

²⁵ Ɛnza ŋé jáman a kunnan kɛ́ fɔ a yɛ kó: «I lúmandhye! Bhɔ́ cɛ míin nɔ́n!»

²⁶ Lámansayoo ŋóo cɛ o lámaanmaan o le lɔ, tó kɛ bhɔ́ a fɛ́ ni gbáa ne.

²⁷ O lée mɔɔn bɛ́ kɔɔnnɔnfii, fɔ́ ii ɲɔ́ɔn mánɲaankɛla kó: «Ɛ́ɛ, aa fɔ́la míin mán díi? Kaangwaa lée nín nɛ́, aa a kɛ́la ni sébhaaya le lé! Aa nɔn lála lámansayoo nú bɛ́ ka, a kɛ mín nvɔ i yɛ, ii o kɛ.»

²⁸ O ywáaninngee ŋo lɔ, Ɛnza ndɔ́ɔ óo búubhɛɛ Galile mála o kɔ́ɔnnɔn ywáa ó bɛ́ lɔ.

Ɛnza ŋé yangalotɔ shɛ́ɛman nakɛɛnyala

²⁹ Ɛnza ni Zaki óni Yaya lúu bhɔ́ sɛ́ɛbho ŋo lá tɛ́nmɛn, ii táa Simɔn ní Andele bhóo lúman.

³⁰ Simɔn bhyáamuso o lánin ndɛ́ɛ fásigban lɔ́ gbála ŋo ka. Ɛnza nuu nan tɛ́nmɛn, ii muso o kofɔ a yɛ.

³¹ Aa í mángbaa yangalotɔ o la, kɛ a myaan a bhóo ó mán, tó kɛ a láwii. O lée kɛ́ fásigban o bhɔ́ o lé muso o fási o lɔ. Muso óo gbáamyaan í lá.

³² Ywáa oo sé mínngɛ, teekun ŋóo bénin ngwɔ́, mɔɔn olu nan yangalotɔ olu ní lámansayoondɔ ólu lé a saala.

³³ Só mɔɔn olu bɛ́ ládhyɛnin ndɛ́ɛ bhó ŋo lákɔɔ.

³⁴ Ɛnza ŋé yangalotɔ shɛ́ɛman nákɛɛnya, óni aa lámansayoo ngbɛ́ mɔɔn shɛ́ɛman nvɛ́. A tɛ́ tɛ́ lámansayoo ŋólu tóla yénɔn ké ii kóman, kɛ mansɔɔ olu tɛ́ɛ a lɔ.

Ɛnza ŋé Galile yamaanlɔ mɔɔn olu lákawaninla

³⁵ Fáyidiwi ó mán, Ɛnza ŋé bhɔ́ kɛ́ táa ywáamanfanin nɔ́ lɔ́, kɛ í sɛ́ɛ.

³⁶ Simɔn ní a táamanɲɔɔn ólu táa a ɲíin.

³⁷ Ii a yé mínngɛ, ii fɔ a yɛ kó: «Mɔɔn olu bɛ́ɛ í ɲíinan.»

³⁸ Aa i yawi kó: «Án ndáa ywáa gbɛ́ɛ lɔ án namiinnzo olu la ké ndáa sanmankanmɛɛ ó láse yénɔn, kɛ mansɔɔ né nankun ŋó lée wé.»

³⁹ O lée kɛ́ a táa ó lé Galile yamaan o ywáa bɛ́ lɔ. A tɛɛ lakawanin kɛla í yɛ́ sɛ́ɛbho ŋólu kɔ́ɔnnɔn, óni kɛ lámansayoo ŋólu gbɛ́.

Ɛnza ŋé kwáantɔ lɔ́ lákɛɛnyala

⁴⁰ Tee lɔ́ mán, kwáantɔ lɔ́ é nan í kúnmɛɛn nɔkɛɛ Ɛnza ngɛɛnnan kɛ a dɛ́li, kɛ fɔ a yɛ kó: «Ni i kɛ́ sɔ́n, ii sé kɛ́ né kɛ́ɛnya.»

⁴¹ A mánɲwaan lo ngóyoo ŋó mán Ɛnza nɔn, aa í bhóo láwii kɛ í bhóo túu a lá, tó kɛ fɔ a yɛ kó: «Ŋwɛ́ɛn sɔ́n, kɛ́ɛnya!»

⁴² Í kɔ́lɔ téeman, kwáan óo bhɔ́ cɛ ó fási o lɔ́, aa sɛ́nnɛnya.

⁴³ Aa fɔ cɛ o yɛ kɛ́ a mangbɛya, tó kɛ a lakwɔsɛɛ í kɔ́lɔ kó:

⁴⁴ «Í kɛ́nan fɔ mɔɔn sí yɛ́ kó né lée í lakɛ́ɛnya lɛ. Waa táa i yɛ́ɛ yáa faanlɛɛɲansebhaa ó lá. Musa é faanlɛɛ mín ngófɔ sɛ́nnɛnyali ó ta fa nvɛ́, ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»

⁴⁵ Ó cɛ o mán sé í lúmandhyela o kó ó mán. Aa táa o kó ó búubhɛɛ ywáa bɛ́ lɔ. O lé yɛ́ɛ kósɔn, Ɛnza ndɛ́ tɛ́ sháa lónan só lɔ́ látee lɔ́ bhée. A tɛ́ɛ tóla só ólu kwɔ́ka né, waa mɔɔn ólu tɛ́ɛ bhɔ́la lé fán ŋo bɛ́ kɛ́nan a saala.