Luka 22 - Mahou

Ii wɛɛ yánva sii Ɛnza nán

¹ Búlufuunmɛɛ ó ɲánlagbɛ ó, ó mín ndɔ́ɔ kó yɔɲan wɛɛ Hɔ́lɔɲanli o ɲánlagbɛ ó, o tɛ́ wɛ́ɛ súnɲan.

² Faanlɛɛɲansebhaa olu kúnndii ólu ní sɛliya kaamɔɔn ólu tɛ́ɛ ɲánɲiinnan Ɛnza nváa o man, wáa i tɛ́ɛ sháannan yaman ó ɲɛn.

Zudasi é Ɛnza yanvala

³ O lɔ, Sɔtaannan é ló Zudasi lɔ, mín ŋé kíila i kwɔ́ kó Sikaliyɔti, Ɛnza ɲɛ́n kaamɔɔndhye ndá ni fyáa ó lɔ lé tɛ́ɛ o le.

⁴ Zudasi é táa faanlɛɛɲansebhaa olu kúnndii ólu ní Ala bhatobhomba ó kunnansiibhaa ólu kúnndii ólu fɛ́ yé. A káa Ɛnza myaan kɛ a ló í bhóo ɲan mín mán, íi kóman kɛ bhyɛ ó lɔ́.

⁵ Ó kóman óo i nisɔdhyaa. Ii bhyɛ a lɔ kó í yáa wɛ́ɛ dí a mán.

⁶ Zudasi é sɔ́n. Aa a lamyaan kɛ ɲánɲiin ké aa Ɛnza nó í bhóolɔ ké yaman ó kɛ́nan kósɔɔ o lɔ.

Hɔ́lɔɲanli fɛ́ti ó lɔ́bhyɛ ŋó

⁷ Búlufuunmɛɛ ó ɲánlagbɛ ló ŋó lá. I kákan kɛ Hɔ́lɔɲanli o ɲánlagbɛ fáanlɛɛ saa ó fáa o ló ŋó lé la.

⁸ Ɛnza ŋé Piyɛli ni Yaya bhyáashaa kɛ fɔ i yɛ kó: «Áa táa Hɔ́lɔɲanli o ɲánlagbɛ ó sunman ŋó lɔ́bhyɛ án ɲɛ́n.»

⁹ Ii a mánɲaankɛ kó: «Ii fɛ́ ké án ni a lɔ́bhyɛ ywáa mínnɛɛn lé lɔ́?»

¹⁰ Ɛnza ŋé i yawi kó: «Ní a kɛ́ ló só ó kɔ́ɔnnɔn, a yáa bhyɛ cɛ lɔ́ le ké jílaa lɔ é a kúnman. Áa i bhyáa o kwɔ. A kaa ló lú mín ngɔ́ɔnnɔn áa ló yé.

¹¹ Áa fɔ lútii ó yɛ kó: Kaamɔɔn, Án ngáamɔɔn ó kó: kó Ale ní a yɛ kaamɔɔndhye ŋólu káa Hɔ́lɔɲanli o ɲánlagbɛ ó lɔ́min ó kɛ bhó mín ngɔ́ɔnnɔn, kó o bhó ŋóo mín?

¹² A yáa bhómba lɔ yáa a lá sangaso ó ka. Án manko káa sé fé mínnu mán, o bɛ́ é a kɔ́ɔnnɔn. Aa ɲánlagbɛ ó súnman ŋó lɔ́bhyɛ o kɔ́ɔnnɔn.»

¹³ Piyɛli ni Yaya é táa, Ɛnza ŋé fɔ ɲán mín mán ii táa kó ó bɛ́ sɔɔ ó ɲán o le mán. Ii Hɔ́lɔɲanli o ɲánlagbɛ ó súnman ŋó lɔ́bhyɛ yénɔn.

Mantii ó yɛ tabɛli ó

¹⁴ Lɔ́minkɛ wáati óo sé mínngɛ, Ɛnza ní a yɛ céladhye ndá ni fyáa óo í síi súnman ŋó mán.

¹⁵ Aa fɔ i yɛ kó: «Né tɛ́ɛ fɛ́ cɛ́ɛne kɛ́ Hɔ́lɔɲanli o ɲánlagbɛ ó lɔ́min ó kɛ́ ní ale sannin ní tɔ́lɔ,

¹⁶ kɛ mansɔɔ ní fɔ́la a yɛ ngó né táa Hɔ́lɔɲanli ó ɲánlagbɛ ó lɔ́min o gbɛ́ɛ kɛ́ ní ale bhée fɔ o a í lafa Ala yɛ́ Mansaya ó lɔ.»

¹⁷ O wáati ó lɔ, aa lɛ́zɛn jífyɛ ó tá kɛ bálika bhɔ́ Ala yɛ kɛ fɔ kó: «Aa a myáan kɛ a lɔ́taa a cɛ,

¹⁸ kɛ mansɔɔ ní fɔ́la a yɛ ngó: Ne táa lɛ́zɛnnji min mée fɔ́ Ala yɛ́ Mansaya ó kɛ́nan.»

¹⁹ O kwɔ́, Ɛnza ŋé búlu ó tá, kɛ Ala bálika bhɔ́, kɛ a tɛ́ɛ tɛ́ɛ, kɛ o di í mán, tó kɛ fɔ i yɛ kó: «Nvásisoo ó lée nín [Mín ŋwɛ́ɛn dí álee kósɔn. Áa ó kɛ́ kɛ í míli né mán.»

²⁰ Lɔ́min ó kɛnin ŋó kwɔ́, aa lɛ́zɛnnjifyɛ ó tá kɛ Ala bálika bhɔ́ kɛ fɔ kó: «Míin née dhyáaɲɔɔnya kwáa ó jífyɛ óle, Ala é dhyáaɲɔɔnya kwáa mín nzíi né yée ó ka, ó mín ŋé bwɔ́ a kósɔn.]»

Ɛnza ŋé a yánvabhaa ó kó fɔ́la

²¹ «Mɔɔn mín ngáa né yánva, o tíi ó lɔ́min kɛ́la ní né le.

²² Mɔɔn Dhyénjɛ ó yáa sayakɛ óyoo a sɛ́wɛnin ŋé tɛ́nmɛn né. Wáa mɔɔn mín ngáamɔɔn Dhyénjɛ ó yánva, kunnangboya é o tíi ó yɛ.»

²³ Kaamɔɔndhye ŋólu a lámyaan kɛ́ ɲɔ́ɔn mánɲaankɛ kó ó káa kɛ́ yɛ́ɛtii lé i cɛ́man.

Yɛ́ɛtii a bwó bɛ́ lé?

²⁴ Lalɔsɔɔn ŋé ló Kaamɔɔndhye ŋólu cɛ, kɛ mansɔɔ i tɛ́ɛfɛ kɛ a lɔ́ kó yɛ́ɛtii bɛ́ lɔ mɔɔnba ó lé i cɛ́man.

²⁵ Ɛnza ŋé fɔ i yɛ kó: «Yamaan gbɛ́ɛ ólu yɛ mansa ólu mansayafaan ó lála ólu ka, óni faan é mínnu bhóo, ólu fɛ ké yamaan ó dhyé ólu a i kíi kó kobhɛɛkɛbhaa ólu.

²⁶ Álee tá ó kákan kɛ kɛ́ céne. Wáa a cɛ́man mín ŋé mɔɔnba le, o tíi ó á kɛ́ óyoo a bɛ́ lɔ́ dhyémuu ó, mín ŋé ɲɛ́nmɔɔn lé, o tíi ó á kɛ́ óyoo bháalakɛdhye.

²⁷ Álee tá miliya o lɔ, yɛ́ɛtii mɔɔnba le? Mín nzíinin ŋé tabhali ó la, wáman míin díla a man? Mín nzíinin ŋé tabhali ó la o lé mán bwó ŋán? Tó né wɛ́, née a cɛ́man óyoo bháalakɛdhye.

²⁸ Álee kwɛ́nnin, a wɛ́ɛ i lɔ́ja kɛ tó ni né lé ɲɛ́n sɛɛ ó wáati o lɔ.

²⁹ O lé kósɔn, né Fá é Mansaya ó dí né mán ɲán mín mán, née sé a dila a léelu mán cé,

³⁰ ké aa lɔ́minkɛ óni kɛ mínnin kɛ́ ni né le ɲɛ́n Mansaya ó lɔ, óni kɛ́ í síi mansayagbaanin ŋó ka kɛ Izalayɛli síya tá ni fyáa ó yɛ́ kíti ó tɛ́ɛ.»

Ɛnza ŋé fɔ́la kó Piyɛli yáa fɔ ale mán kó a mán a lɔ

³¹ Ɛnza ŋé fɔ Simɔn yɛ kó: «Simɔn, Simɔn, Sɔtaannan tɛ́ɛ ɲiin kɛ́ i lɔ́swaan óyoo ii muu ó tɛ́nnɛnnan ɲán min mán.

³² Wáa né wɛ́ɛ Ala dɛ́li i yɛ, ké í yɛ lánanya ó kɛ́nan cáan. Ní ile kɛ́ díminsa kɛ́nan né mán wáati mínnɔn, íi í bhádhye ŋólu yóso lágbɛya.»

³³ Piyɛli é fɔ a yɛ kó: «Mantii ó, né lɔ́bhyɛnin ŋé kɛ táa ní íle kaso ó lá, wáman kɛ sayakɛ ní íle.»

³⁴ Ɛnza ŋé a yawi kó: «Piyɛli, ní fɔ́la í yɛ ngó lónan ŋó táa kóman bí, ní íle mán fɔ né mán síɲan sawa kɛ́ bha kó i mán né lɔ.»

Ɛnza ngó a yɛ kaamɔɔndhye ŋólu á í lɔ́bhyɛ

³⁵ Ɛnza ŋé fɔ a yɛ́ kaamɔɔndhye ŋólu yɛ íkwɔ kó: «Ní a bhyaa céla ké wɛ́ɛ, óni bhɔɔ, óni sawaa tɛ́ a bhóo mínngɛ, fé mínnɛɛn é dɛ́sɛ á lɔ?» Ii a yawi kó fósi.

³⁶ Ɛnza ŋé fɔ i yɛ íkwɔ kó: «Wáa sísan, ní wɛ́ɛ kɛ kɛ́ mín móo, o waa ó tá. O ɲán kée ŋó mán, ní bhɔɔ kɛ kɛ́ mín móo, o waa ó tá. Ní fá ndɛ́ mín móo, o tíi ó a yɛ deeke ó fele kɛ a lɔ sá.

³⁷ Kɛ mansɔɔ, ní fɔ́la a yɛ ngó, mín nzɛ́wɛnin ɲé né tá sháa ó fɛ, o kákan né kɛ kɛ dhyaalagboya la. A sɛ́wɛnin ɲé kó: ‹I wɛ́ɛ a yace kóyoongɛbhaa ólu lɔ́ le,› sísan, o wáati ó wɛ́ɛ súnɲan.»

³⁸ Kaamɔɔndhye ŋólu fɔ Ɛnza ɲɛ́n kó: «Mantii ó, fá nvyáa mánfɛɛ.» Ɛnza ŋé i yawi kó: Á káɲin njé.

Ɛnza ŋé táala Olivyetii ó ka kɛ Ala dɛ́li

³⁹ Ɛnza ŋé bhɔ́ kɛ táa Olivyetii ó ka, óyoo a tɛ́ wɛ́ɛ lɛɛ a kɛ́la ɲán mín mán. A yɛ kaamɔɔndhye ŋólu i bhyáa a kwɔ́.

⁴⁰ Aa sé o ywáa ó lɔ mínngɛ, aa fɔ i yɛ kó: «Aa í sɛ́ɛ ké á kɛ́nan ló lɔ́swaannin ó lɔ.»

⁴¹ O kwɔ́, aa bhɔ́ i tɔ́ɔfɛ kɛ́ i mángbaa ɲɛ́nnzhaa fɛ dɔ́ɔnin, kɛ i kúnmɛɛn nɔ́kɛɛ kɛ Ala dɛ́li kó:

⁴² «Nvá, ní íi fɛ́, íi sé tɔ́lɔya míin njɛ́bhɔla né la, wáa né sao o kɛ́nan kɛ, fɔ́ íle sao ó.»

⁴³ [O wáati ó lɔ, malɛɛka lɔ é bhɔ́ sángboo ó lɔ kɛ́nan bháaka ló a lɔ.

⁴⁴ Ɛnza ní ó tɔ́lɔnin ndɛ́ɛ koyoongɛ. Áa a lɔ fala Ala dɛ́li ó ka fɔ́ kɛ tála bhɔ́ a lá. Fɔ́ tála jí óo kɛ́la óo yée, kɛ tɔ́ndɔ lúuman.]

⁴⁵ Aa wɛɛ Ala dɛ́li ó lá mínngɛ, aa i wíi kɛ́nan a yɛ kaamɔɔndhye ŋólu tɔ́ɔfɛ, aa táa ólu sɔ́ɔ ké íi súnnɔɔn lɔ nílafin ŋó bhóo.

⁴⁶ Aa fɔ i yɛ kó: «Mínnɛɛn kósɔn aa súnnɔɔn lɔ? Áa i wíi kɛ Ala dɛ́li, ké a kɛ́nan ló lɔ́swaannin kɛ́bhaa ó bhóo.»

Ɛnza myaanko ó

⁴⁷ Kɛ Ɛnza ndó kóman ó la, yaman gbɔ́gbɔ é í kúnnan bhɔ́, Ɛnza ɲɛn kaamɔɔndhye ndá ni fyáa ó kée, mín ndɔ́ɔ kó Zudasi, ó tɛ́ɛ yaman ó ɲɛ́n. Aa í mangbaa Ɛnza nan kɛ í fínin á mán.

⁴⁸ Ɛnza ŋé fɔ a yɛ kó: «Zudasi, íi i fíninnan né mán kɛ o kɛ́ sɛ́ɛya lé kɛ mɔɔn Dhyénjɛ ó ló bhóolɔ kɛɛ?»

⁴⁹ Mínnu tɛ́ɛ ni Ɛnza né kó mín ngbáa kɛ ólu o yé mínngɛ, íi fɔ a yɛ kó: «Mantii ó, án ni i gbási ní fá ŋó le a?»

⁵⁰ O ywáaninngee ŋo lɔ, kée ŋé faanlɛɛɲansebhaa olu kúnndiiba ó yɛ bháalakɛdhye ŋó bhóobhɛɛ tóo ó tɛ́ɛ a mán.

⁵¹ Wáa Ɛnza ŋé fɔ kó: «Á tó cé, o wɛ́ɛ soo» Aa í bhóo túu bháalakɛdhye ŋó tóo ó la kɛ a lákɛɛnya.

⁵² O kwɔ́, Ɛnza ŋé fɔ faanlɛɛɲansebhaa olu kúnndii ólu yɛ, óni Ala bhatobhomba ó kunnansiibhaa ólu kúnndii ólu yɛ, óni cɛba mínnu tɛ́ wɛ́ɛ nan a kanman, a kó o: «Áa nánla ní fá ŋóni gbéle ólu lé né kanman, óyoo née kóyoongɛbhaa le lé.

⁵³ Né tɛ́ɛ ní ale Ala bhatobhomba ó kɔ́ɔnnɔn ló ŋóo ló, wáa a mán né myáan, a yɛ wáati óle wɛ́ɛ sé sísan, diwi ó tá wáati ó lée wé.»

Piyɛli kó ale mán Ɛnza nɔ́

⁵⁴ Ii Ɛnza myáan kɛ táa ní ale faanlɛɛɲansebhaa olu kúnndiiba ó yɛ́ lú ó kɔ́ɔnnɔn. Piyɛli é í súuku táamankɛ, kɛ cɛ́ba tó í cɛ.

⁵⁵ I tɛ́ wɛ́ɛ tá lákin lúkɔɔn ó cɛ́man kɛ í síi o fɛ. Piyɛli é táa í síi i cɛ́man.

⁵⁶ Bháalakɛdhye musoman nɔ́ é Piyɛli síinin ɲé tá ó fɛ, aa i ɲán gbáan a lɔ, tó kɛ fɔ kó: «Cɛ míin ndɛ́ɛ ní Ɛnza né.»

⁵⁷ Piyɛli é i lámangbɛya kɛ fɔ kó: «Né mán a lɔ́.»

⁵⁸ Wáati dɔ́ɔnin ŋé tínmin, cɛ lɔ́ é a yé kɛ fɔ kó: «Ile tɛ́ɛ ni ale.» Wáa Piyɛli é fɔ kó: «Né tɛ́ i lɔ le lɛ́.»

⁵⁹ Lɛ́ɛlɛ kée ndinminnin ngwɔ́, cɛ lɔ é fɔ kɛ mangbɛya kó: «Síka tɛ́ lɔ, cɛ míin ndɛ́ɛ ní ale, kɛ mansɔɔ Galileka lée a le.»

⁶⁰ Wáa Piyɛli é a yawi kó: «Ii min nvɔla, né mán ó lɔ́ nɛ́.» Kɛ a tó o kóman ó la, o ywáaninngee ŋó lɔ́ lónan ŋóo kóman.

⁶¹ Mantii ó í ɲán yɛ́ɛman kɛ Piyɛli mánfɛɛ. Mantii ó tɛ́ wɛ́ɛ kóman min nvɔ́ Piyɛli yɛ, Piyɛli hákii é bhyáa ó lɔ. Kó: «Sannin lónan ŋó á kóman bí, i yáa fɔ né mán síɲan sawa kɛ kó í mán né lɔ́.»

⁶² Piyɛli é bhɔ́ kɛ́ɛnman, kɛ kásikɛ bhɛ́libhɛli.

⁶³ Ɛnza kunnansiibhaa ólu tɛ́ɛ a lákɔɔbhɔ la, kɛ tó a gbásila.

⁶⁴ Ii a ɲán ó sili, tó kɛ́ a mánɲaankɛla kó: «Célayakɛ yɛ́ɛtii i gbási, ó fɔ́ án ɲɛ́n?»

⁶⁵ Ii a nɛ́ɛn kɛ kómanyoo ngbɛ́ɛ lú fɔ a mán.

Ɛnza ŋé Yawudhyaa ólu yɛ kítitɛɛlaa ó lɔ

⁶⁶ Kɛ́ɛn óo bhɔ́ mínngɛ, só o cɛba ólu, ní faanlɛɛɲansebhaa olu kúnndii ólu, ní sɛliya kaamɔɔn ólu ɲɔ́ɔn nadhyɛ. Ii táa ni Ɛnza né i yɛ kítitɛɛlaaba ó lɔ.

⁶⁷ Ii a mánɲaankɛ kó: «Ní íle lée Kílisi óle, ó fɔ án ɲɛ́n.» Ɛnza ŋé í yawi kó: «Ní né kɛ́ fɔ a yɛ, a táa lá ó la.

⁶⁸ Ní né kɛ́ álee mánɲaankɛ, a táa né yawi.

⁶⁹ Wáa kɛ tá bí mán, mɔɔn Dhyénjɛ ó yáa í síi Sétii Ala bhóobhɛɛ o kɔɔ.»

⁷⁰ I bɛ́ɛ fɔ kó: «O sán ó lɔ, íle lée Ala Dhyénjɛ ó lé a?» Aa i yawi kó: «A gbú lée lú wɛ́ɛ ó fɔ, kó né lée o le.»

⁷¹ Ii fɔ kó: «Án manko tɛ́ sɛ́ɛya la bhée, á gbú lá ó wɛ́ɛ mín nvɔ́, án ŋwɛ́ɛn o kóman ó myɛ́n.»