Luka 10 - Mahou

Ɛnza ŋé kaamɔɔndhye shɛ́ɛman céla

¹ O kwɔ, Mantii óo kaamɔɔndhye bíwoonvyaa ní fyáa gbɛ́ɛ bhɔ́. A gbú kákan kɛ́ táa sóba ní sódhyenin mínnu la, aa i cé kɛ́ táa o ywáa ólu lɔ́ mɔɔn fyáa fyáa.

² Aa fɔ i yɛ́ kó: «Sunman ndɛ́ɛ tá o waa sháa, wáa bháalakɛbhaa ólu mán nzháa. Óo lɔ mínngɛ áa Mantii ó dɛ́li ké aa bháalakɛbhaa ólu bhyáa kɛ́ táa a yɛ sunman ó tɛ́ɛ.

³ Sísan, aa táa! Ní a bhyáashaala óyoo Saadhye ŋólu kɛ́ táa kóngowuu ólu cɛ́man.

⁴ Á kɛ́nan wɛ́ɛ tá, wáman táamanlataalwee, wáman sawaa. Á kɛ́nan í lɔ kɛ mɔɔn twáa sháala.

⁵ Ní a kɛ́ ló bhó minnan, a kákan kɛ fɔ ótun kó hɛ́lɛ o a kɛ́ bhó míin ngɔɔnnɔn mɔɔn ólu yɛ.

⁶ Ní ó kɛ kɛ́ ké mɔɔn lɔ́ é ó bhó ŋó kɔɔnnɔn ní aa hɛ́lɛ ɲíinan, o tíi ó yáa a yɛ́ hɛ́lɛ o twaali ó lwáau ó sɔ́ɔ. Ni ó tɛ́, a yɛ́ lwáau ó yáa í kwɔ́sɛɛ a mán.

⁷ Aa tó o bhó ó kɔɔnnɔn. I kɛ fé óo fé di a mán, aa ó lé lɔ́ɔ kɛ ó mín, kɛ mansɔɔ bháalakɛbhaa ó kákan ní a yɛ́ saa ó lé. A kɛ́nan bhɔ́ yɛ́tiiya lɔ́la kɛ́ yɛ́ɛman a lɔ́gbɛɛ la.

⁸ Ní a kɛ́ ló só lɔ́ kɔɔnnɔn, ní i kɛ a labhyɛ cɛ́ɛne, i kɛ lɔ́minfe mín ndí a mán, aa ó lɔ́ɔ.

⁹ Áa o só ó yaangalotɔ ólu lákɛɛnya, kɛ́ fɔ sómɔɔn ólu yɛ́ kó: ‹Ala yɛ́ mansaya ó wáati ó wɛ́ɛ sé a tɔ́ɔfɛ.›

¹⁰ Wáa ní a kɛ́ ló só óo só la, ní i man í ɲán síi a kɔ́ɔ, aa bhɔ́ kɛ i lɔ́ sháa ó la kɛ́ fɔ i yɛ́ kó:

¹¹ ‹Yáanin a yɛ́ só ó gbángba míin kɛ́ án nzé mán, án ŋwɛ́ɛn ó mangbasigbasi kɛ́ bhɔ́ án nzé mán kɛ́ ó tó a mán. Aa lɔ́ ŋóo Ala yɛ́ mansaya ó wáati ó wɛ́ɛ sé a tɔ́ɔfɛ.› »

¹² «Ní fɔ́la a yɛ́ ngó kítitɛɛ ló ŋó la, bhóo yáa gban o só ó mɔɔn ólu lá kɛ tínmin Sodɔmu yamaan ó ka.»

Bɔɔn é bámaa ólu tá le

¹³ «Kunnangbeya é íle Sholazɛn yɛ! Kunnangboya é íle Bɛtisayida yɛ! Kɛ mansɔɔ káwananngo mínnu é kɛ́ álee fɛ́ yé, ni o súu tɛ́ɛ kɛ́ Tili ní Sidɔn, o só lábhaa ólu tɛ́ɛnan díminsa, kɛ bhɔɔ ó bhyáa i kannan kɛ́ i síi búlu o lɔ kɛ́ í yóso ólu yɛ́ɛman kɔ́ɔkɔɔ.

¹⁴ O le kósɔn, kítitɛɛ ló ŋó la, bhóo yáa gban álee lá kɛ tínmin Tili ní Sidɔn lú ka.

¹⁵ Álee, Kapɛnamuka ólu, aa kɛ́la álee kɔɔnnɔn le kó á yɛ só o káa i kɔ́ɔ tá le kɛ́ sé fɔ sángboo ó mán an? Fɛ́sɛ fɛ́sɛ o! A káa yíi lé fɔ yaananman o lɔ.»

¹⁶ O kwɔ́, aa fɔ a yɛ́ kaamɔɔndhye ŋólu yɛ kó: «Mɔɔn mínngɛ a lɔ́myɛn, o tíi ó wɛ́ɛ né le lɔ́myɛn wé. Mɔɔn mínngɛ í bá kɛ í ɲán síi á kɔɔ, o wɛ́ɛ í bá kɛ í ɲán síi né lé kɔ́ɔ wé. Ní mɔɔn mínngɛ í bá kɛ́ í ɲán síi né kɔɔ, ké o wɛ́ɛ í bá né bhyáashaabhaa o lé lɔ́ wé.»

Kaamɔɔndhye ŋólu wɛ́ɛ i kwɔ́sɛɛ

¹⁷ Kaamɔɔndhye bíwoonvyaa ní fyáa ólu í kwɔ́sɛɛ ni nisɔdhyaa le kɛ́ nan fɔ Ɛnza ɲɛ́n kó: «Mantii ó, i tɔ́ɔ ó bháaka lɔ́, yáanin Lámansayoo ŋólu tɛ tɛ́ sé kɛ́ i bá án ɲɛ́n kóman ó mán.»

¹⁸ Aa fɔ i yɛ́ kó: «Ní Sɔtaannan béndɔ ó yé kɛ́ bhɔ́ sángboo ó lɔ óyoo sa mannan mannan.

¹⁹ Né kwɛ́nnin é sé di álee mán kɛ́ táaman san ólu ní wéende ólu ka, óni kɛ́ sé di a mán kɛ́ a yúu Sɔtaannan yɛ́ sébhaaya ó náansi a se ngɔɔ. Féɲoo nzí yɛ labhɛɛ táa sé a lá.

²⁰ Wáa álee kɛ́nan í nisɔdhyaa kɛ mansɔɔ Lámansayoo ŋólu tɛ tɛ́ sé kɛ́ í bá a yɛ́ kóman ó mán. Wáa aa i nisɔdhyaa kɛ mansɔɔ Ala wɛ́ɛ álee tɔ́ɔ sɛ́wɛ a fɛ́ sángboo ó lɔ́.»

Ɛnza ŋé bálika bhɔ́la a Fá yɛ́

²¹ O wáati ó yɛ́ɛ lɔ, Ɛnza nisɔ é dhyáa koyoongɛ Ní Sɛnnɛnyanin ŋó bháaka lɔ kɛ́ a fɔ kó: «Ní bálika bhɔ́la í yɛ́, Nvá, sángboo óni lúukolo ó Mantii ó, kɛ mansɔɔ, í wɛ́ɛ kó mínnu lóonaankɛ lɔnikɛbhaa ólu ní hákiiman ŋólu mán, í wɛ́ɛ ólu lá gbɛ́ lá dhyémuu ólu yɛ. Nvá, í wɛ́ɛ kɛ́ cé kɛ mansɔɔ a wɛ́ɛ dhyáa í yɛ tínɲan in né.»

²² «Ne Fá wɛ́ɛ fé ó bɛ́ lo ne bhóo. Mɔɔn sí mán dhyénjɛ ó lɔ́ ní Fá ó tɛ, mɔɔn sí mán Fa ó lɔ́, ní Dhyénjɛ ó tɛ́. Fɔ́ Dhyénjɛ ó kɛ́ dyɛn kɛ yáa mínnan.»

²³ O kwɔ́, aa i ɲán yɛ́ɛman a yɛ́ kaamɔɔndhye ŋólu lɔ́ kɛ fɔ í yɛ lóonɔn kó: «Álee mínnu yéla, ní mɔɔn gbɛ́ɛlu kɛ́ o yé, nisɔdhyaa é ólu yɛ.

²⁴ Kɛ mansɔɔ ní fɔ́la a yɛ́ ngó: Álee fé mín mánfɛɛla ni, o yélɔɔ tɛ́ɛ céla shɛ́ɛman ní mansacɛ shɛ́ɛman nan, wáa olu mán o yé; áa kó mín myɛ́nnan ni, o myɛ́nnɔɔ tɛ́ɛ olu la, wáa olu mán ó myɛ́n.»

Né mɔɔnɲɔɔn é yɛ́ɛtii lé?

²⁵ Sɛliya kaamɔɔn lɔ́ tɛ́ɛ fɛ́ kɛ Ɛnza nɔ́swaan. O lɔ, aa i wíi kɛ́ a mánɲaankɛ kó: «Kaamɔɔn, ngákan kɛ́ mínnɛɛn lé kɛ́ kɛ ɲáanmanɲan wɛ́ɛbhɛɛ ó sɔ́ɔ?»

²⁶ Ɛnza ŋé a yawi kó: «Mínnɛɛn sɛ́wɛnin ŋé Sɛliya ó kɔɔnnɔn? Íi ó kalanan díi?»

²⁷ Áa a yawi kó: «Í yɛ Mantii Ala o a dhyáa í yɛ́ í yóso ó bɛ́ lá, í ní o bɛ́ lá, í míliya ó bɛ́ lá, óni í fáan ó bɛ́ la. Í mɔ́ɔnɲɔɔn ó wáa dhyáa í yɛ́ óyoo íle gbú a dí í yɛ́ɛ yɛ ɲán mín mán.»

²⁸ Ɛnza ŋé fɔ a yɛ́ kó: «I yɛ́ yawili ó wɛ́ɛ bhyɛ. O kɛ́, í yáa ɲáanmanɲan ó sɔɔ.»

²⁹ Wáa Sɛliya kaamɔɔn ó tɛ́ɛ fɛ́ lé kɛ́ jó di a yɛ́ɛ mán. O lɔ, aa Ɛnza mánɲaankɛ kó: «Yɛ́ɛtii né mɔɔnɲɔɔn ó lé?»

³⁰ Ɛnza ŋé a yawi kó: «Cɛ lɔ́ tɛ́ɛ bhɔ́la Yeluzalɛmu kɛ́ táa Zeliko. Sháatɛɛbhaa ólu bé a ka, kɛ́ a yɛ́ fáani ólu ni a bhóofe ŋólu bɛ́ bwási a lá, tó kɛ́ wɛ́ɛ kɛ́ a gbasi fɔ kɛ́ a kilo, kɛ́ táa kɛ́ a tó sháa ó la.

³¹ O kɛ́nin ngwɔ faanlɛɛɲansebhaa lɔ́ tɛ́ɛ tínmin nán o sháa kée ó ka. Aa cɛ mandiinnin ŋó yé mínngɛ, aa í fáan kɛ tínmin sháa ó fán ndɔ ó fɛ́.

³² Ala bhatobhomba o bháalakɛdhye ó lɔ́ ŋé nan sé cɛ ó mán, aa a yé kɛ́ tínmin sháa ó fán ndɔ ó fɛ́.

³³ Wáa Samalika cɛ lɔ́ tɛ́ɛ táa táamanla aa sé cɛ ó mán mínngɛ, cɛ ó hínnɛn é ló a lɔ́ koyoongɛ.

³⁴ Aa í mangbaa a lá kɛ a yɛ lá ólu kwó, kɛ́ túu ní lɛ́zɛnnji kɛ́ lá o la, kɛ́ a síli. O kwɔ́, aa a tá kɛ a lá a yɛ́ sofɛɛnin ŋó ka kɛ́ táa ní ale lónannayii bhó nɔ́ la, kɛ i yáakii tó a lɔ́.

³⁵ O lusɔgbɛ o, aa wɛ́ɛgbannan déniye fyáa di yɛtiicɛ ó mán kɛ́ fɔ a yɛ kó aa í yáakii tó cɛ o lɔ́. Kó ní a kɛ́ bhóobhɔ mínnu kɛ́ ó kɛ́ tínmin ó wɛ́ɛ ó yaceya ó ka, kó ní a kɛ í kwɔ́sɛɛ wáati mínnɔn, a yáa o sala a yɛ́.»

³⁶ Ɛnza ŋé Sɛliya kaamɔɔn ó mánɲaankɛ kó: «Sháatɛɛbhaa ólu é cɛ min mandiin wé, i tá miliya ó lɔ, mɔɔn sawa míin mínnɛɛn lée cɛ ó mɔɔnɲɔɔn óle?»

³⁷ Aa a yawi kó: «A hínnɛn é ló mín nɔ́n.» Ɛnza ŋé a yawi kó: «Ile á táa o ɲɔ́ɔn ngɛ.»

Mati ní Mwɛnyamu yɛ́ kó ó

³⁸ Kɛ́ i tó táaman ó la, Ɛnza ŋé ló só lɔ́ kɔɔnnɔn ní a yɛ kaamɔɔndhye ŋólu le. Ii i yíi muso lɔ fɛ́ yé mín ndɔ́ɔ kó Mati.

³⁹ Mati lɔ́ɔmuso lɔ́ tɛ́ɛ yé mín ndɔ́ɔ kó Mwɛnyamu. Oo táa i síi Mantii ó tɔ́ɔfɛ tó kɛ́ a yɛ́ kaa ŋó lɔ́myɛn.

⁴⁰ Oo kɛ́la ké Mati ɲángbannin ɲé Gbakɛ ó la. Aa i mangbaa Ɛnza nan kɛ fɔ a yɛ kó: «Mantii ó, nɔ́ɔmuso é i síila kɛ né kée ndó bháala ó lá, o káɲin ŋán? A fɔ a yɛ kó aa i wíi kɛ́nan né dhyɛman.»

⁴¹ Wáa Mantii ó a yawi kó: «Mati, Mati, ii bwéebweela kɛ́ i hákii ó ɲáanmin ko shɛ́ɛman nán gbɛ́ɛgbɛɛ,

⁴² wáa fé ngée né kúu á gbɛ́ɛ. Mwɛnyamu wɛ́ɛ o lé kɛ́, mɔɔn sí táa ó bwási a lá.»