Luka 1 - Mahou

Kitabu míin nzɛ́wɛ kún ŋo

¹ Kó mín núu kɛ́ án nvɛ́ ya, mɔɔn lɔ́lu lamyaan kɛ ó kibhalo ólu sɛ́wɛ.

² O kó ólu kɛ́ mínnu ɲánla Kanbiini ólu lamyaan wáati ó man, tó ii nan kɛ́ Ala yɛ́ kóman ó bháalakɛdhye ŋólu le, ólu o kó ólu lákɛɛ án ɲɛ́n ɲán min mán, a sɛ́wɛ bháa ólu a sɛ́wɛ kɛ́ kéeɲan nin i yɛ́ sɛ́ɛya ólu lé.

³ Né lo ŋé ɲíinin kɛ́ cɛ́ɛne o kó ólu ka Kabiini o kó ólu lamyaan wáati ó lɔ, ó lée kɛ́ tó, ní míli ngó a káɲin ké né a o kó ólu sɛ́wɛ kɛ i túunnduun ɲɔ́ɔnnan, nva Teofili,

⁴ ké ii a lɔ kó ii í kála kó mínnu lá, kó óo tínɲan gbú le lé.

Malɛɛka lɔ́ é Yaya Bátizelikɛbhaa wóoko ó fɔ́la

⁵ Zude mala ó mansacɛ Elɔdi tá tée ó lɔ́, faanlɛɛɲansebhaa lɔ́ tɛ́ɛ yé mín ndɔ́ɔ tɛɛ kó Zakali. Abiya tɔ́ɔ ó lá faanlɛɛɲansebhaa mínnu tá sɛ́ɛ ó ka, ó lɔ́ lé tɛ́ɛ a le. A muso tɛɛ faanlɛɛɲansebhaa ólu kunndii Alɔn mwáannin né le. A muso ó tɔ́ɔ tɛ́ɛ kó Elizabɛti.

⁶ Í fyaa bɛ́ téenin ndɛ́ɛ Ala ɲánkɔɔ, i tɛ́ɛ Mantii ó yɛ́ sɛliya ólu bɛ́ bhátola a ɲán ó mán.

⁷ Dhyé ndɛ́ tɛ́ i bhóo, kɛ mansɔɔ Elizabɛti tɛ́ɛ muso wóobhɛɛ lé lé, ó kwɔ́, í fyaa ó bɛ́ tɛ wɛ́ɛ kɔ́ɔ.

⁸ Ló nɔ lá, Zakali tɛ́ɛ faanlɛɛɲanse ó la ni a yɛ́ sɛ́ɛ lɔ mɔɔn ólu lé Ala bhatobhomba ó kɔ́ɔnnɔn, kɛ mansɔɔ i yɛ́ bháalakɛ wáati lé tɛ́ɛ wé.

⁹ Kɛ́ kéeɲan ní faanlɛɛɲansebhaa ólu yɛ́ laanan óle, i tɛ́ɛ tóla kɛ́ mɔɔn kée mɔ́, ó tɛ́ɛ lo Mantii ó yɛ́ ywáa sɛ́nnɛnyanin ŋó kɔ́ɔnnɔn kɛ́ wúsulan ŋó ɲɛ́ɛn, óo bhyɛ́ Zakali le mán.

¹⁰ Kɛ́ Zakali tó wúsulan ɲɛ́ɛn ŋó lá, yaman ó tɛ́ɛ Ala dɛ́li ó la Ala bhatobhomba ó kɛ́ɛngbɛ ó lɔ́.

¹¹ Mantii ó yɛ malɛɛka o lɔ́ é i yɛ́ɛ yáa Zakali la, malɛɛka ó lɔ́nin ndɛ́ɛ wúsulan faanlɛɛbhɔlaa ó bhóobhɛɛ fán ŋó fɛ́.

¹² Zakali é a yé mínngɛ, a hákii ó ɲáanmin, aa sháan koyoongɛ.

¹³ Wáa malɛɛka ó fɔ a yɛ kó: Zakali, í kɛ́nan sháan, kɛ mansɔɔ i yɛ sɛ́ɛ ó wɛ́ɛ myaan. Í muso Elizabɛti yáa dhyénjɛ wóo i yɛ, ii a tɔ́ɔla kó Yaya.

¹⁴ A wóoko ó yáa kɛ́ nisɔdhyaa láfanin né i bhóo, óni mɔɔn shɛ́ɛman nisɔ yáa dhyáa ó kó ó lɔ́.

¹⁵ A yáa kɛ́ mɔɔnba lé Mantii ó ɲánkɔɔ. A táa lɛ́zɛnnji, wáman minife nvɛ́ɛyanin nzí mín. A yáa fá Ní Sɛnnɛnyanin ŋó lá kɛ́ tá a kɔ́ɔnta wáati ó mán.

¹⁶ A yáa kɛ́ sɔ́ɔbu lé Izalayɛlidhye ŋólu shɛ́ɛman ɲáan í kwɔ́sɛɛ kɛ́ sɔ́n Mantii ó mán i yɛ́ Ala ó.

¹⁷ A yáa táaman Ala ɲánkɔɔ ni Ní Sɛnnɛnyanin ŋó yɛ sébhaaya óle, mín ɲɔ́ɔn ndɛ́ wɛ́ɛ di céla Eli mán, kɛ mansɔɔ ké bhyɛ ŋan ló fa ólu ní i dhyé ŋólu cɛ. A yáa mɔɔn mwɛnnɛnin ŋólu hákii ó yɛ́ɛman kɛ a kɛ mɔɔnteenin ŋólu hákii ó lé. A yáa yaman ó lɔ́bhyɛ kɛ a bhyáa Mantii ó yɛ́.

¹⁸ Zakali é malɛɛka ó manɲaankɛ kó: «Ngáa bhɔ́ ó ɲánle díi? Kɛ mansɔɔ né ní muso bɛ́ wɛ́ɛ kɔɔ.»

¹⁹ Malɛɛka ó a yawi kó: «Né lée Jibilili lé. Né lée nɔ́la Ala ɲánkɔɔ kɛ́ a yɛ́ cé ólu lɔ́myɛn. A wɛ́ɛ né cé kɛ́nan sanmankanmɛɛ míin nvɔ i yɛ́.

²⁰ A mánfɛɛ, i yáa kɛ́ bhóbho lé, fɔ kɛ́ táa sé ó kó ólu kɛ́ wáati ó mán, kɛ mansɔɔ í mán la né yɛ́ kóman ó lá, kɛ mansɔɔ ó kó ólu kɛ́ lo ŋó kɛ sé ólu yáa kɛ́.»

²¹ O wáati ó lɔ yaman ó tɛ́ɛ Zakali mánkɔɔnnan. I tɛ wɛ́ɛ káwakoya, kɛ mansɔɔ a wɛ́ɛ myɛ́n Ala bhatobhomba ó ywáa sɛ́nnɛnyanin ŋó lɔ kɛ́ tínmin.

²² Waa Zakali é bhɔ́ sán min nɔn, a mán sé kɛ́ kóman i fɛ́. Ii bhɔ́ a ɲánle kó a wɛ́ɛ yélife nɔ yé Ala bhatobhomba ó ywáa sɛ́nnɛnyanin ŋó kɔ́ɔnnɔn. Aa kóman i fɛ́ ní a bhóo ó lé le. Aa tó bhóbhoya ó lɔ.

²³ Zakali yɛ́ bháalakɛlo ŋólu í lafa lo mín nán, aa i kwɔ́sɛɛ kɛ́ táa a bhóo lúman.

²⁴ O kó ólu tínminnin ŋó kwɔ́, Zakali muso Elizabɛti é nan kɔ́ɔn tá. Waa, aa ó kɔ́ɔn ó lóonaankɛ kɛ́nan sé fɔ́ɔ a káa lóo ɲɔ́n o man.

²⁵ A tɛ́ɛ fɔ́la a yɛ́ɛ kɔɔnnɔn kó: «Mantii ó wɛ́ɛ kó mínngɛ né yɛ́, o mánfɛɛ nin: A wɛ́ɛ né mánfɛɛ sísan kɛ́ né tá maloyako ó bhɔ́ ngunnan mɔɔn ólu bɛ́ ɲánla.»

Malɛɛka lɔ́ é Ɛnza ŋwóo ko ó fɔ́la

²⁶ Elizabɛti kɔ́ɔn ó káa wɔ́lɔɲɔn ó la Ala é malɛɛka Jibilili cé Galile mala ó só ó lɔ lá mín ndɔ́ɔ kó Nazalɛti.

²⁷ Ala é Malɛɛka o cé yénɔn sínngbii lɔ́ mán mín ndɔ́ɔ tɛ́ɛ kó Mwɛnyamu. Yusufu muso sínngbii lé tɛ́ɛ a lé mín mbuluyi é bhɔ́ mansacɛ Laula lɔ́.

²⁸ Malɛɛka o sé a mán kɛ́ fɔ a yɛ́ kó: «I nisɔdhyaa, Mwɛnyamu! I kó wɛ́ɛ dhyáa Ala yɛ́, Mantii Ala é i fɛ́.»

²⁹ O kóman óo Mwɛnyamu kɔɔnnɔnfii, aa a yɛ́ɛ manɲaankɛ kó ó fóli súu ó kɔɔ o mínnɛɛn lé le.

³⁰ Malɛɛka óo fɔ a yɛ kó: «Í kɛ́nan, sháan, Mwɛnyamu, kɛ mansɔɔ Ala wɛ́ɛ nɛ́nmɛn kɛ i yɛ.

³¹ A mánfɛɛ, i yáa kɔ́ɔn tá kɛ́ dhyénjɛ kée ŋwóo, i yáa a tɔ́ɔla kó Ɛnza.

³² A yáa kɛ́ mɔɔnba lé, a yáa kíi kó Fé ŋó bɛ́ kúnndii ó dhyénjɛ o. Mantii Ala yáa a kɛ́ mansa lé óyoo a fá Laula.

³³ A yáa i síi mansaya lá Izalayɛli yɛ mɔɔn olu kunnan fɔ wáati ó bɛ́, a yɛ́ mansaya ó táa wɛ́ɛ fɛ́sɛ fɛ́sɛ.»

³⁴ Mwɛnyamu é malɛɛka ó manɲaankɛ kó: «Né káa kɔ́ɔn tá dí lé? Kɛ mansɔɔ né mán cɛ lɔ ŋótun.»

³⁵ Malɛɛka óo a yawi kó: «Ní Sɛnnɛnyanin ŋó yáa yíi i ka, Fé ŋó bɛ́ kunndii yɛ́ sébhaaya ó yáa kɛ́ i ka. O kósɔn, i káa Dhyé nzɛ́nnɛnyanin mín ŋwóo, a yáa kíi kó Ala dhyénjɛ.

³⁶ A mánfɛɛ, i bhádhyemuso Elizabɛti wɛ́ɛ kɔ́ɔn tá ále ní a yɛ́ kɔ́ɔya ó bɛ́, a káa wɔ́lɔɲɔn ó lée nin. A yáa dhyénjɛ kée ŋwóo, ale mín ndɛ́ wɛ́ɛ yacesii muso wóobhɛɛ lé.

³⁷ Ala tɛ́ kwéela fósi mán.»

³⁸ O lɔ, Mwɛnyamu é fɔ a yɛ́ kó: «Née Mantii ó yɛ́ bháalakɛdhye ne lé, i wɛ́ɛ fɔ ɲán mín mán, Ala a kɛ́ né yɛ́ cé. O kwɔ́, malɛɛka óo bhɔ́ a tɔ́ɔfɛ kɛ́ táa.»

Mwɛnyamu é táa bhɔ́la Elizabɛti fɛ́ yé

³⁹ O tée fyáa ó lɔ, Mwɛnyamu é i wíi kɛ́ í lateeya kɛ́ táa só lɔ lá Zude mala ó lɔ, tíi ólu a sháa ywáa mínnɔn.

⁴⁰ Aa táa lo Zakali yɛ́ bhó ŋó kɔɔnnɔn kɛ́ Elizabɛti twáa.

⁴¹ Elizabɛti é Mwɛnyamu a twaalikan ŋó myɛ́n mínngɛ, dhyé ŋó í maanmaan a kɔɔnnɔn. Aa fá Ní Sɛnnɛnyanin ŋó lá,

⁴² kɛ gbáa kɛ́ a fɔ kó: «I wɛ́ɛ lwáau sɔ́ɔ Ala fɛ́ kɛ́ tínmin muso ólu bɛ́ ka, óni dhyé mín ŋé i kɔɔnnɔn, o wɛ́ɛ lwáau sɔ́ɔ.

⁴³ Née yɛ́ɛtii lé fɔ né yɛ́ Mantii ó wóobhaa ó gbú é nánla bhɔ́la né fɛ́ yé?

⁴⁴ A mánfɛɛ, ni í yɛ́ twaalikan ŋó myɛ́n mínngɛ, né dhyé ŋó i maanmaan nisɔdhyaa ó fɛ́ né kɔɔnnɔn.

⁴⁵ I nisɔdhyaanin ɲé, kɛ mansɔɔ malɛɛka o Mantii ó yɛ́ kóman mín nvɔ i yɛ́, ii wɛ́ɛ lá o la.»

Mwɛnyamu yɛ́ tándoli lɔ ŋó

⁴⁶ O lɔ, Mwɛnyamu kó: «Né ní o Mantii ó bwóɲanla ɲóso ó lɔ.

⁴⁷ Né ní o nisɔdhyaa o lɔ né Kísibhaa Ala kósɔn,

⁴⁸ kɛ mansɔɔ, a wɛ́ɛ i hákii tó a yɛ́ yɔ́muso manyiinin ŋó lɔ́. Kɛ́ta míin man, mɔɔn ólu yáa fɔ wáati ó bɛ́ kó né nisɔdhyaanin ɲé.

⁴⁹ Kɛ mansɔɔ Sétii o wɛ́ɛ kóbabalu kɛ́ né yɛ́, a tɔ́ɔ ó sɛ́nnɛnyanin ɲé.

⁵⁰ Ala é hínnɛnla a ɲɛ́nnzhaanmaa ólu la wáati ó bɛ́.

⁵¹ A wɛ́ɛ káwako ólu kɛ́ ni a yɛ́ sébhaaya ó lé, a wɛ́ɛ yɛ́ɛlɔbwoɲanbhaa ólu hákii ó ɲáanmin.

⁵² A wɛ́ɛ faanman ólu láyii i yɛ mansayagbaanin ŋólu ka, kɛ́ dɛ́sɛbhaatɔ ólu kɛ́ mɔɔnba lu lé.

⁵³ A wɛ́ɛ fémɛɛ shɛ́ɛman di kɔ́ɔntɔ ólu mán kɛ́ féndii ólu bhóolɔkoo bhyáa kɛ́ táa.

⁵⁴ A wɛ́ɛ Izalayɛli dhyɛman, a yɛ bháalakɛdhye ŋó, kɛ́ i hákii tó a yɛ́ hínnɛn ó lɔ́, min núu a yɛ́ bháalakɛbhaa lé,

⁵⁵ Bulaaman ni a kwɔ́mɔɔn ólu tá fán nvɛ́, óyoo a tɛ́wɛɛ fɔ án nva ólu yɛ́ ɲán mín mán kúdɛyi.»

⁵⁶ Mwɛnyamu é tó Elizabɛti fɛ́ yé kɛ́ káa sawa ɲɔ́ɔnnɔn kɛ́, o kwɔ́, aa í kwɔ́sɛɛ kɛ táa a bhóo lúman.

Yaya Bátizelikɛbhaa wóo ko ó

⁵⁷ Elizabɛti wóolo ŋó nan sé, aa dhyénjɛ kée ŋwóo.

⁵⁸ A siiɲɔɔn ólu ní a yɛ́ mɔɔn ólu ó myɛ́n mínngɛ ko Mantii ó wɛ́ɛ a yɛ́ hínnɛn ó bwóɲan a fán nvɛ́, i nisɔ é dhyáa kɛ́ fala Elizabɛti ka.

⁵⁹ A tée sɛ́ɲin ɲɔ́n lo ŋó, íi nan dhyé ŋó bhɔ kɛ́ɛn lɔ́, i tɛ́ɛ fɛ́ kɛ́ a facɛ tɔ́ɔla a lá kó Zakali.

⁶⁰ Waa a wóobhaa é fɔ kó: «Ɔn-ɔn, a tɔ́ɔ káa la lé kó Yaya.»

⁶¹ Íi a yawi kó: «I yɛ́ mɔɔn sí tɔ́ɔ tɛ́ cé.

⁶² Íi dhyé nvá ó mánɲaankɛ bhóbho ólu yɛ́ kómanseɲan ó lɔ kó aa fɛ́ ké tɔ́ɔ mínnɛɛn a lá a dhyé ŋó lá.»

⁶³ Zakali é fénɔn kófɔ i yɛ́ kɛ́ sɛ́wɛli kɛ ó ka kó: «A tɔ́ɔ kó Yaya.» I bɛ́ káwakoya.

⁶⁴ O ywáaninngee ŋó lɔ, Zakali yɛ́ bhóbhoya óo wɛ́ɛ, aa lámyaan kɛ́ kóman kɛ́ Ala tando.

⁶⁵ I siiɲɔɔn ólu bɛ́ sháan, Zude mala ó tíi ywáa ó bɛ́ mɔɔn ólu tɛ́ɛ o kó ólu lákɛɛ lá ɲɔ́ɔn ɲɛ́n.

⁶⁶ Mɔɔn min núu o kibhalo kan ŋó myɛ́n, ólu bɛ́ tɛ́ɛ i milila o mán kɛ i yɛ́ɛ mánɲaankɛ kó: «O lɔ, ó dhyé ŋó káa kɛ́ mínnɛɛn lé le wɛ́?» Tínɲan in ne, Mantii Ala tɛ́ɛ a fɛ́.

Zakali yɛ́ tandoli ó óni célaya lɔ ŋó

⁶⁷ Dhyé ŋó facɛ Zakali wɛ́ɛ fá Ní Sɛnnɛnyanin ŋó lá, kɛ́ célaya kóman ó fɔ kó:

⁶⁸ «Tandoli a kɛ́ Mantii ó yɛ, Izalayɛli yɛ Ala ó, kɛ mansɔɔ a wɛ́ɛ í yáakii tó a yɛ mɔɔn ólu lɔ́ kɛ i hɔ́lɔɲan.

⁶⁹ A wɛ́ɛ Kísibhaa báakaman náwii án ɲɛ́n, kɛ bhɔ́ a yɛ bháalakɛdhye Laula búluyi ó lɔ,

⁷⁰ óyoo a tɛ́ wɛ́ɛ o kóman ó lo a yɛ́ jónan jónan céla sɛ́nnɛnyanin ŋólu lalɔ ɲán mín mán

⁷¹ kó a yáa án ngísi án ɲúu ólu mán, kɛ́ án nataan kɛ́ án mɔ́ án ndɔ́lɔbhaa ólu bɛ́ bhóo.

⁷² O ɲán ó mán, aa hínnɛn án nvá ólu lá, a wɛ́ɛ í hákii tó a yɛ́ láheli sɛ́nnɛnyanin ŋó lɔ́.

⁷³ A tɛ wɛ́ɛ láheli ta án Nvá Bulaaman yɛ́, tínɲan in ne,

⁷⁴ kó a yáa án mbwási án ɲúu ólu bhóo, sáan án ɲóso swáanyanin ɲáan Ala bháto,

⁷⁵ a yáa án ngɛ́ mɔɔn sɛ́nnɛnyanin nu lé óni mɔɔn téenin nu lé a yɛ́ bhátoli ó lɔ́ án nzí ó bɛ́ lɔ́.

⁷⁶ Ile kwɛnnin, nyé, i yáa kíi kó Ala kɔ́ɔtanin mba yɛ́ céla, kɛ mansɔɔ i yáa táaman Mantii ó ɲánkɔɔ kɛ́ a yɛ́ sháa ó lɔ́bhyɛ.

⁷⁷ I yáa Kísili sháa ó yáa a yɛ́ mɔɔn ólu lá i yɛ́ yúumu ólu yafali sháa fɛ́,

⁷⁸ án ɲɛ́n Ala ó yɛ hínnɛn óni a yɛ sébhaaya ó bháaka lɔ. A yáa kɛ́ɛnɲan ó cé án ɲɛ́n kɛ bhɔ́ sáman, óyoo tée ó bhɔ́tɔ ó kɛ́ɛnɲan ó,

⁷⁹ kɛ́ kɛ́ɛnɲan ó bhɔ́ diwilɔmɔɔn ólu yɛ́, óni mín núu sháannan saya ó ɲɛ́n, óni kɛ́ án bhyáa hɛ́lɛ sháa ó ka.»

⁸⁰ Sísan, dhyé ŋó tɛ́ɛ bwóɲanla, ale ní a hákii ó tɛ́ɛ bwóɲanla kéene. Aa tó dhyɛ́ ó kɔɔnnɔn fɔ kɛ́ táa sé a yɛ́ɛ yáa lo ŋó mán Izalayɛlidhye ŋólu lá.