Bìoball air-loidhne

Kɛ́wɛɛ 6 - Mahou

Céladhye ŋólu dhyɛ́manbhaa ólu

¹ O wáati ó lɔ, lɔ́ tɛ́ɛ táa bhyáa lé Kaamɔɔndhye ŋólu ká. Yawudhyaa mín núu Gɛlɛkikan ŋó fɔla, ólu kóman Yawudhyaa Ebulukan nvɔ́ bháa ólu man, kó i tɛ́ i yɛ́ finɲanmuso ólu myáanla cɛ́ɛne sunman nɔ táa ŋólu lɔ.

² O kósɔn, céladhye ndá ní fyáa ólu kaamɔɔndhye ŋólu bɛ́ kíi kɛ fɔ i yɛ kó: «A láanin ndɛ́ ké án ni Ala yɛ Sanmankanmɛɛ o láse o lábhyaa tó kɛ súnman ŋólu lɔ́taa.

³ O lé kósɔn Mádhye ŋólu, a gbúlu á mɔɔn wóonvyaa bhɔ́ a cɛ́man, mɔɔn olu mínnu tɔ́ɔɲwaan fɔla, Ala wɛɛ mínnu wasa Ní Sɛnnɛnyanin ŋó la óni hákii bhɛ́ɛ bhɛ́ɛ la. Án ɲáan olu bhyáa o súnman lɔ́taa ŋó la.

⁴ Án née kwɛ́nnin, án née yáa án njɛ́sii sɛ́ɛ óni Ala yɛ kóman o láse o la.»

⁵ O kóman óo dhyáa yaman o bɛ́ yɛ. Oo kɛ́ mínngɛ, íi Etiyɛni bhɔ́, o wásanin ndɛ́ɛ lánanya óni Ní Sɛnnɛnyanin ŋó la, óni Filipu, ní Polokoli, ní Nikanɔli, ní Timɔn, ní Pamenasi, óni Nikolasi kɛ bhɔ́ Antiyɔsi, o míin lo Yawudhyaaya o lɔ.

⁶ Ii nán ile céladhye ŋólu saala, céladhye ŋólu i bhóo lá í ká tó kɛ́ Ala dɛ́li i yɛ́.

⁷ Ala yɛ Saaninkan ŋó tɛ́ɛ búubhɛɛla, kɛ táa ɲɛ́n, kaamɔɔndhye ŋólu tɛ́ɛ sháaya la kúdɛyi Yeluzalɛmu. Faanlɛɛɲansebhaa olu shɛ́ɛman ŋé lá Ɛnza nan, tó kɛ a bwóɲan.

Etiyɛni myaanko ó

⁸ Etiyɛni wásanin ndɛ́ɛ Ala yɛ nɛ́nmɛn óni a yɛ sébhaaya o lɔ; a tɛ́ɛ káwananngo bába lu ní tɔ́ɔmanse bába lu kɛ́la yaman o cɛ́man.

⁹ Mɔɔn lɔ́lu bhɔ́ sɛ́ɛbho nɔ la aa fɔla mín mánko yɔ hɔ́lɔɲanin ŋólu yɛ sɛ́ɛbho ŋó. O mɔɔn olu tɛ́ɛ Silɛninnga óni Alɛsandilika óni Silisika óni Azika léelu lé, ii nán kíti lamyaan ní Etiyɛni né.

¹⁰ Wáa i mán faan sɔ́ɔ Etiyɛni man, kɛ mansɔɔ a tɛ́ɛ kómanla ní hákiimanɲan óni Ní Sɛ́nnɛnyanin ŋó le.

¹¹ Oo kɛ mínngɛ, ii mɔɔn lɔ́lu sála kɛ olu lɔ́lo, kó olu a fɔ kó a tɛ́ɛ Ala ní Musa tɔ́ɔ cáannan.

¹² O kɛ́ɲan o man, ii cɛba olu ní sɛliya kaamɔɔn olu ní yaman olu lɔ́lo, olu í mángbaa Etiyɛni nan kɛ a myáan, kɛ́ táa ni ale kítitɛɛbhaa ólu sáala.

¹³ Ii nan ní sɛ́ɛya fwɔ́nɲan fɔ́ lú le. Olu fɔ́ kó: «Cɛ míin ndɛ́ kóman cɛ́yoo nvɔ o lábhyaala án ɲɛ́n ywáa sɛ́nnɛnyanin ŋó mán, óni Musa yɛ sɛliya o mán.

¹⁴ Án ní myɛ́n ko aa fɔla kó Ɛnza Nazalɛtika yáa ywáa míin njé, óni Musa é laanan mínnu ndí án mán kɛ olu yɛ́ɛman.»

¹⁵ Mɔɔn óo mɔɔn tɛ́ɛ kítitɛɛlaa o lɔ, olu í ɲán gbáan a lɔ. Oluu a ɲánlɔshaa ó ye óyoo malɛɛka ɲánlɔshaa.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan