Bìoball air-loidhne

2 Timote 4 - Mahou

Sanmankanmɛɛ o láse o

¹ Ní o fɔla á yɛ kɛ mángbɛya Ala ni Ɛnza Ngílisi ɲankɔɔ, mín ngaa kítitɛɛ ɲáanman ŋólu ní su ólu bɛ́ ka, óni a nanko óni a yɛ mansaya o tɔ́ɔ o la:

² Kóman o láse, a fɔ wáati bhyɛnin ŋó lɔ óni wáati gbɛ́yanin ŋó lɔ, kɛ mɔɔn olu yɛ fii o yáa i la, kɛ i yáatɛɛ, kɛ i ládhye, kɛ i kála yósoswaanya o lɔ wáati bɛ́.

³ Kɛ mansɔɔ wáati lɔ yáa sé mɔɔn ólu táa sɔ́n kɛ káa nzɛ́nnɛnyanin ŋó lɔ́myɛn, wáa i gbúlu dhyáaɲɛnngo ó kósɔn, i yáa kaamɔɔn shɛ́ɛman ɲíin i yɛ́ɛ yɛ́, ké mín ngaa dhyáa i tóo o yɛ, o yáa o fɔ́ i yɛ.

⁴ I yáa i tóo o mánbhɔ tínɲan o la, kɛ kóman kóo ŋólu lɔ́myɛn.

Pɔli yɛ bwée o lá ŋó

⁵ Wáa íle, í yɛ́ɛ lɔmyaan kó o bɛ́ lɔ, tɔ́lɔya ólu lɔ́myaan, sanmankanmɛɛ o láse, Ala wɛɛ bháala mín ngɛ́ɛfa í mán, o bɛ́ kɛ́ cɛ́ɛne.

⁶ Wáa né kwɛ́nnin, né lóo óyoo gbɛ mín ŋwɛ́ɛn bwɔ́ faanlɛɛ le, ne táa wáati o wɛ́ɛ sé.

⁷ Né wɛ́ɛ kɛɛbhɛɛ kɛ, né wɛ́ɛ ɲɛ́n bwée o kɛ́ kɛ wɛɛ, né wɛ́ɛ lánanya o lámala.

⁸ Kwáalenin, kunnan yáa míin sɔ́ɔla téeɲan o lɔ o lamalanin ŋé né yɛ. Mantii o, o míin kítitɛɛbhaa téenin ŋó le, o yáa o dí né mán o ló ŋo la, né kée ndɛ́, mínnu wɛ́ɛ a nan o mánkɔɔn ní dhyáaɲɔɔnya o le, a yáa o dí olu man.

Kóman lábha míin fɔ́ Timote yɛ

⁹ Í lɔ́ja kɛ́ nan né sɔ́ɔ ya jónan.

¹⁰ Kɛ mansɔɔ Kɛlɛsan ŋwɛ́ɛn táa Galati, Tite wɛ́ɛ táa Dalimati. Demasi wɛ́ɛ i bá né lɔ, dínɲankɛdhyaa o kósɔn, a wɛ́ɛ táa Tesaloniki.

¹¹ Luka kée mbé lée né fɛ ya. Maki tá, íle ní ale á nan ɲɔ́ɔnnvɛ, kɛ mansɔɔ tɔɔn é Maki la kɛ né dhyɛman ɲɛ́n bháala o mán.

¹² Né wɛ́ɛ Tishiki bhyáashaa Efɛzi.

¹³ Ní í kɛ́ kɛ nánla, ɲɛ́n déekeba míin tó Kalipusi fɛ́ yé Tolowasi, óni ɲɛ́n kitabu ólu á nan í bhóo. Mín ngúu a gbɛ́ɛ o lée gboolaman ŋólu le.

¹⁴ Alɛkisandili míin nuunaka le, o wɛ́ɛ kóyoo nzhɛ́ɛman ngɛ́ né la. Mantii o le káa a yɛ kóyoo ŋó saa o dí a man.

¹⁵ Íle, í yɛ́ɛkɔɔsi a man, kɛ mansɔɔ a mulutinin née án ɲɛn kóman ólu mán.

¹⁶ Né táako jónan o, kɛ ɲɛ́ɛ kwɔkɔɔdhyɛ kítitɛɛlaa o lɔ, mɔɔn sí mán né dhyɛman, bɛ́ɛ i bá né lɔ. Ké Ala aa yafa i man.

¹⁷ Mantii o lée né dhyɛman, óni ale lée fáan dí né mán, ké né a Sanmankan ŋó láse cɛ́ɛne, ké síya gbɛ́ɛ ólu bɛ́ a a myɛ́n. Ala é né bwási kɛ bhɔ́ yála o lá lɔ.

¹⁸ Ala yáa né bwási mɔɔn ólu yɛ kɛwɛliyoo ŋólu bɛ́ mán, óni a yáa né kísi, kɛ né lalo a yɛ sángboo ó mansaya o lɔ. Kunnanwee ŋoo ale tá lé wáati ó bɛ́. Amiinan.

Twáali o

¹⁹ Pilisili ní Akilasi twáa né yɛ, óni Onesifɔni yɛ lúmanmɔɔn ólu.

²⁰ Elatusi é tó Kolɛnti, ní Tolofimu tó yangalo o lɔ Mile.

²¹ Í lɔ́ja kɛ́ nan sannin nɛ́nnɛn wáati o cɛ. Ebulusi óni Pudansi óni Linusi óni Kulodiyasi óni bhádhye ŋó tɔ́ ólu bɛ́ɛ í twáala.

²² Ké Mantii o á kɛ í ní o fɛ. Ké Ala yɛ nɛ́nmɛn o á kɛ á fɛ́.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan