2 Tesalonikika olu 2 - Mahou

Kó mínnu káa kɛ sánnin Mantii o á nan

¹ Mádhye ŋólu, míin nan kɛ Mantii Ɛnza Ngílisi nanko o le, óni án ɲɛn ɲɔ́ɔnnandhyɛ ŋo a tɔ́ɔfɛ, án ni ɲiinnan á fɛ́ ko:

² á kɛ́nan tó ké mɔɔn sí a á kɔɔnnɔnmuu ywáa nín ngée ŋo lɔ, wáman kɛ á mánshaan, kɛ táa fɔ́ le kó, Mantii o nánlo ŋó wɛ́ɛ wɛɛ séla. Á kɛ́nan lá o la, aa kɛ célayakoman lɔ le, wáman sanmankan nɔ le, wáman sɛ́wɛ lɔ le, kɛ fɔ kó án ne lée o sɛ́wɛ o sɛ́wɛ.

³ Á kɛ́nan tó ké mɔɔn lɔ́ á á láfii ɲán sí mán, kɛ mansɔɔ sánnin Mantii o nánlo ŋó á sé, mɔɔn ólu yáa i bá Ala lɔ ótun, o kwɔ, mɔɔn mín ndɛ́ táaman kɛ́la sɛ́liya o ka, tó a bhyaanin ŋé hálaki o kanman, o yáa bhɔ́ gbɛ́ lɔ.

⁴ Ii fé ŋóo fé ngíila kó Ala, óni mɔɔn ólu fé ŋóo fé mátola, a yáa i wíi olu kánman, kɛ a yɛ́ɛ lɔ́fisaya olu man, fɔ́ kɛ táa lo Ala bhatobhomba o gbú o kɔ́ɔnnɔn, kɛ í síi yé, kɛ fɔ a yɛ́ɛman kó Ala.

⁵ Ndɛ́ɛ ni ále wáati mín nɔn, ndɛ́ɛ o le fɔla á yɛ́. Á hákii tɛ́ o lɔ a?

⁶ Wáa kwáalenin, áa lɔ ŋoo aa ɲáannan ko mín nan ótun, ké aa bhɔ́ gbɛ́ lɔ a wáati lɔ dɔlɔun.

⁷ Kɛ mansɔɔ, gbondo mín ndɛ́ bhyɛ́nan ni sɛ́liya o le, oo a yɛ bháala o lá, wáa áa ɲáannan mín nan yáanin bí, a ɲáannin ngáa tó o lá le, fɔ́ o á bhɔ́ yé.

⁸ Ní o kɛ bhɔ́ yé, mɔɔn mín ndɛ́ táaman kɛ́la sɛ́liya o ka, o yáa bhɔ́ gbɛ lɔ. Mantii Ɛnza ɲáan a fáa a láfwɛɛn o la, óni Mantii o nan o nɔlɔya o le káa a cáan.

⁹ Mɔɔn mín ndɛ́ táaman kɛ́la sɛ́liya o ka, o yáa nan, Sɔtaannan yɛ sébhaaya o bháaka lɔ. A yáa tɔɔmansii lu ní káwananngo lu ní kóba lu ní

¹⁰ lánɛɛnngo bɛ́ súu kɛ, mɔɔn mínnu fii sháa o ka olu kanman. Olu fii o lɔ, kɛ mansɔɔ tínɲan mín ndɛ́ kaa i kísi, o mán dhyáa i yɛ, i mán sɔ́n o mán.

¹¹ O le kósɔn Ala é sébhaaya lɔ́ lánanla i ka kɛ i láfii, ké ii lá o fwɔ́nɲan o la.

¹² Aa o kɛla, ké mɔɔn mínnu mán lá tínɲan o la, téemɛɛya o á dí mínnu yɛ, ké aa ólu tá kíti o tɛ́ɛ.

Cɛ́sii o lánanya o man

¹³ Wáa mádhye ŋólu, án nee kákan né kɛ bálika bhɔ́ Ala yɛ álee lú kósɔn wáati bɛ́, álee mínnu á dí Mantii o yɛ. Kɛ mansɔɔ, Ala wɛ́ɛ álee bhɔ́ jónan kísili o kánman, Ní Sɛ́nnɛnyanin ŋó yɛ́ sɛ́nnɛnyali o sɔ́ɔbu la, óni á yɛ́ lánanya o tínɲan o sɔ́ɔbu la.

¹⁴ Án ni Sanmankanmɛɛ mín nvɔ́ á yɛ́, Ala é á kíi o le bháaka lɔ, o kísili o kanman, ké áa á nín nzɔ́ɔ án Mantii Ɛnza Ngílisi yɛ́ nɔ́lɔya o lɔ.

¹⁵ O lɔ, mádhye ŋólu, áa i lɔ́ja, án ni káa mín ndí á mán ní án ngómankan ólu le, wáman ní án ɲɛ́n sɛ́wɛ ólu le, áa i cɛ́sii o la.

¹⁶ Án Mantii Ɛnza Ngílisi gbú, óni án Nvá Ala, án ni dí mín ɲɛ́n, kɛ yósolagbɛya wɛ́ɛbhɛɛ o dí án man, óni yeesiilaabhɛɛ á kɛ án nan a yɛ nɛ́nmɛn o bháaka lɔ.

¹⁷ Ké Ala á á yóso o láyii, kɛ á fáan ló ké áa bháalabhɛɛ lú kɛ, óni kɛ kómankanmɛɛ lú fɔ.