1 Timote 6 - Mahou

Yɔ ŋolu

¹ Lánanbhaa mínnuu yɔɲan o lɔ, olu kákan ne kɛ i kaamɔɔn olu yacesii, kɛ i bwóɲan gbútuukɛ, ké mɔɔn si kɛ́nan Ala tɔ́ɔ óni án ɲɛn kaa ŋo cáan.

² Yɔ ŋo mínnu kaamɔɔn é lánanbhaa le, olu kɛ́nan jɔ ólu mán, ko i wɛɛ kɛ bhádhyeman nu le. Wáa i kákan ne kɛ lɔbhyaa i yɛ bháala o lɔ bhée, kɛ mansɔɔ ii bháalakɛla mínnu yɛ olu lánanbhaa le le, óni ii dí yɔ ŋolu yɛ. Í kákan kɛ mɔɔn olu kála kó mínnu la, oni kɛ i fáan ló, o lée lúu nin.

Kaa mín ndɛ́ táala ni téeɲan o le

³ Ni mɔɔn lɔ kɛ táa kaa ngbɛ́ɛ fɔ, mín nín án Mantii Ɛnza Ngílisi yɛ́ kaa nzɛ́nnɛnyanin ŋo tɛ kéene, óni kaa mín ni lánanya o táa ɲɔ́ɔnnvɛ,

⁴ o tii o yɛ yɛ́ɛlɔbwoɲan o wɛɛ a kɛ fyóo ne. O tii o man fóyi lɔ, sɔ́sɔli kɛ yangalo lée o tii o la, óni kɛ kɛɛ kɛ́ kóman olu ka, o lée nánla nin ɲánngboya o le, óni kɛɛ ó, óni tɔ́ɔ cáan ŋolu, óni síka lɔ́koo ŋólu,

⁵ óni sɔ́sɔli wɛ́ɛbhɛɛ o mɔɔn hakiilagbo olu cɛ́man, mínnu tɛ tínɲan o ka mée. O tíi o ɲanla, kɛ dínɲanlɔtɛɛ o kɛ óyoo aa dí Ala yɛ ɲán mín man, oo nanfoo ɲíin nzéɲan lé le.

⁶ Tínɲan in né, kɛ dínɲanlɔtɛɛ o kɛ óyoo aa dí Ala yɛ ɲán mín man, oo nanfooba le le, ni i ta bhóo ta o kɛ i bhɔ́.

⁷ Kɛ mansɔɔ mɔɔn si man nan ni fé nɔ le dinɲan lɔ, o ɲán kée ŋo man mɔɔn si man fáa táa ni dinɲan lɔ fé ŋo lɔ le.

⁸ O bhóo o man ní sunman ŋo ní fɛ́ɛyabhɔ o kɛ kɛ án móo, o kákan ne kɛ án mɔ́.

⁹ Wáa mɔɔn mínnu fɛ kɛ nanfooba o sɔ́ɔ, lɔ́swaannin yáa sé olu man, gée ɲáan síi olu la, óni i yáa tó nɛ́li yóo kunnda olu lɔ míin i mandiinnan, óni kɛ i cáan, tó kɛ i lafii.

¹⁰ Kɛ mansɔɔ wɛ́ɛ o tá dhyáaɲɔɔnya o lée kóyoo ŋo bɛ́ díin ne, lɔ́lu wɛ́ɛ tó o nɔ́nfɛ háanin kɛ i yɛ́ɛ lafii, kɛ bhɔ́ lánanya o lɔ péu, kɛ tɔ́lɔya shɛ́ɛman náse í yɛ́ɛman.

Pɔli yɛ ladhyeli kóman o Timote yɛ

¹¹ Wáa í lé Timote, íle mín ŋé Alamɔɔn le, íle kákan kɛ bwée o kó olu kɔɔ le, kɛ í lɔ́ja kɛ téeɲan o ɲíin, óni kɛ dínɲanlɔtɛɛ o kɛ óyoo aa dí Ala yɛ ɲán mín man, óni lánanya o, óni dhyáaɲɔɔnya o, óni lɔ́jali o, óni yóso swáanya o.

¹² Kɛ́ɛ bhɛɛ o kɛ, mín ŋé lánanya o ta kɛ́ɛ o le. Ɲáanmanɲan wɛ́ɛbhɛɛ o myaan cɛ́ɛne, kɛ mansɔɔ Ala é í kíi o le kósɔn, óni í lo ŋé o sɛ́ɛya bhɛɛ o ládi mɔɔn shɛ́ɛman ɲánla.

¹³ Ní o fɔla í yɛ́ Ala ɲánla, mín ŋé ní o díla lánve ŋolu bɛ́ man, óni Ɛnza Ngílisi ɲánla o mín ŋé tó Pɔnsi Pilati ɲánla kɛ sɛ́ɛya bhɛɛ ladi:

¹⁴ Ala yɛ tɔ́ ŋo lamala, fyɛn kɛ́nan kɛ́ í lá, sɔ ngóo ngɛ́nan sɔ́ɔ í lá fɔ́ kɛ́ nan se án Mantii Ɛnza Ngílisi nan wáati o mán.

¹⁵ Ala gbú le káa a lánan a wáati lɔ, mín ŋe nisɔdhyaa o tii o le, mín ŋé fé ŋo bɛ́ tii le, mín ŋé mansa olu bɛ́ tá mansa o le, Mantii olu bɛ́ tá Mantii o le.

¹⁶ Ale kéene tɛ sayakɛ la, a síinin ŋé kɛ́ɛnɲan mínnɔn mɔɔn si tɛ se kɛ i mangbaala o la, Adamandhye ŋo si mán a yé i ɲandhye ŋo la bha, mɔɔn si lo ndɛ́ sé a yéla, bwóɲan óni sebhaaya wɛ́ɛbhɛɛ oo ale le ta le wáati o bɛ́ lɔ! Amiinan!

Nanfoo tíi olu

¹⁷ A fɔ dínɲan nanfoo tíi olu yɛ kɛ a mángbɛya ko: i kɛ́nan i yɛ́ɛ lɔ bwóɲan, nanfoo mínnu tɛ myɛ́nnan, i lo ngɛ́nan i yée síi olu le, wáa ii í yée síi Ala le le, mín ŋe fé ŋó bɛ́ dila án man shɛ́ɛman né, ké án ni se kɛ olu dhyáabhɔ.

¹⁸ A fɔ i yɛ ko íi kóbhɛɛ kɛ, i yɛ nanfootiiya o á kɛ́ kóbhɛɛ kɛ o le, i lɔ bhyɛnin ŋán kɛ kɛ mɔɔn olu lɔdhyɛman, kɛ i bhóofe ŋolu lɔtaa ni mɔɔn tɔ olu lé.

¹⁹ Ní i kɛ o kɛ, o ɲán o mán, i yáa nanfooba lamala, o yáa kɛ i yɛ ɲáanmanɲanbhɛɛbhɛɛ o zúsii o le cɛ́ɛne síin.

Kóman labha ŋolu

²⁰ Timote, Ala wɛɛ mín ngɛ́ɛfa í man, í lɔ́ja kɛ o lamala cɛ́ɛne, í kɛ́nan í yɛ́ɛ bhyáa mɔɔn olu yɛ kóman lɔ́koo ŋolu lɔ, óni sɔ́sɔli mín ŋé bhɔ́la lɔninya kóo ŋolu lɔ.

²¹ Lɔ́lu wɛ́ɛ tó o lɔ́ninya o ka háanin i wɛɛ bhɔ́ lánanya o lɔ. Ké Ala yɛ nɛ́nmɛn o á kɛ á fɛ́!