1 Timote 5 - Mahou

Lánanbhaa olu bɛ́ ládhye séɲan o

¹ Ní í kɛ́ kɛ cɛba olu ládhyela, í kɛ́nan kóman olu yɛ́ gbɛ́yanin ne, i faan ló óyoo í fá, íi káwee ŋolu faan ló óyoo í bhádhye nú.

² Íi musokɔɔnin ŋolu faan ló óyoo í wóobhaa, íi sínngbiidhye ŋolu faan ló óyoo í lɔ́ɔmuso lu, íi olu kɛ ni í yóso sɛ́nnɛnyanin ŋo le.

Finɲanmuso olu

³ Mɔɔn tɛ́ finɲanmuso mínnu bhóo, í yáakiito olu lɔ.

⁴ Wáa dhyé ŋé finɲanmuso mínnu bhóo, wáman mwáannin ŋé mínnu bhóo, dhyé ŋolu ní mwáannin ŋolu á i lée kɛ dínɲanlɔtɛɛ o kɛ óyoo aa dí Ala yɛ ɲán mín man i bhóo bhónan ótun. I wóobhaa olu yɛ yúu míin i la i kaa o sála o ɲán o lé mán, o lé ló ŋán dí Ala yɛ.

⁵ Finɲanmuso o, to mɔɔn tɛ bhóo, o yée síinin ŋe Ala le le, kɛ i sɛ́ɛ óni kɛ Ala dɛ́li sú ni tée.

⁶ Wáa finɲanmuso mínnu miliya é fasisoo o labhyaa o ka, olu wɛ́ɛ wɛɛ sayakɛ la, kɛ i to í ɲánla.

⁷ Í kákan kɛ i kala kó míin nee la, ké sɔ ngóo ngɛ́nan sɔɔ i la.

⁸ Ní mɔɔn mín man kɛ gbáamyaanla a yɛ mɔɔn ólu la, o bɛ́ɛ lɔ le wé, a yɛ́ɛ la bhóngɔɔnnɔnbhaa olu la, o tíi o wɛɛ bhɔ́ lánanya o lɔ péu, háanin lananbhɛɛ o á fisaa o tíi o le.

⁹ Finɲanmuso mínnu tɔ́ɔ kákan kɛ sɛ́wɛ ké Egilizi o á i yáakii tó olu lɔ, olu kákan kɛ kɛ finɲanmuso le le mínnu wɛ́ɛ sanɲin bíwɔɔlɔ sɔɔ, mínnu mán cɛ gbɛ́ɛ lɔ i cɛ kwɔ.

¹⁰ Ké bɛ́ bɛ a kɛ a yɛ kóbhɛɛ olu kɛ́laman: A dhyé ŋolu lámwɔnseɲanbhɛɛ o, a yɛ́ mɔɔn lɔ́myaanɲanbhɛɛ o, Ala mɔɔn olu se ŋo kwó o, dɛ́sɛbhaatɔ olu dhyɛman o, óni kóbhɛɛ bɛ́suu kɛ o.

¹¹ Wáa finɲanmuso mín mán kɔɔ bha, í kɛ́nan olu tɔ́ɔ sɛ́wɛ. Kɛ mansɔɔ, ní cɛ lɔɔ o kɛ olu myáan, olu sé kɛ bhɔ́ Kílisi kwɔ, kɛ táa síi cɛla ko kwáa kɛ.

¹² O bhóo o mán olu yáa i yɛ́ɛ bhyaa kíti lɔ, kɛ mansɔɔ olu tɛ́ wɛɛ lákan mín ndá i man o mánfa.

¹³ O yɛ́ɛ kwɔ́, ii í léenan lakɛbhɛɛya o la, olu i yáala la bhó ní bhó njɛ. Lakɛbhɛɛya o dɔlɔun ŋó tɛ; ii táala a kɛla kóman shɛ́ɛman né le, kɛ í lá bhyaa mɔɔn o láa bhónan ko olu lɔ, ko mínnu tɛ i fɔ kóman le.

¹⁴ O le kósɔn finɲanmuso mínnu mán kɔɔ bha, ní fɛ ké olu á fúu cɛ gbɛ́ɛ man, kɛ dhyé nu sɔ́ɔ kɛ gbáamyaan í yɛ́ bhó ŋo la, o bhóo o man án ɲúu olu tɛ se kɛ kóman yóo nvɔ́ án man.

¹⁵ Kɛ mansɔɔ finɲanmuso lɔ́lu wɛ́ɛ bhɔ́ sháa téenin ŋo ka kɛ bhyaa Sɔtaannan kwɔ.

¹⁶ Wáa finɲanmuso lu kɛ kɛ lánanbhaa muso mín móo, ké o á olu dhyɛman. O bhóo o mán olu síinin ndáa kɛ Egilizi o la. O bhóo o mán mɔɔn tɛ́ mínnu bhóo Egilizi o yáa se kɛ olu lɔdhyɛman.

Ɲɛ́nmɔɔn olu

¹⁷ Egilizi o ɲɛ́nmɔɔn min núu Egilizi o bhyaala sháa bhɛ́ɛ ka, mɔɔn kákan kɛ olu bwóɲan gbútuukɛ, mínnuu gbɛya lála i yɛ́ɛ ka kɛ mɔɔn olu kala óni kɛ sanmankanmɛɛ o láse.

¹⁸ Kɛ mansɔɔ sɛ́wɛli o kó: í kɛ́ nisi mín ndá kɛ sɛɛn mánfe ŋo gbási, í mánngan kɛ o la o sili. A sɛwɛnin ŋé ikwɔ ko: bháalakɛbhaa o saa o kákan kɛ di a man le.

¹⁹ Ní lɔ́ kɛ́ ko lɔ́ fɔ́ Egilizi o ɲɛ́nmɔɔn o mán í kɛ́nan sɔ́n o mán o ywáaninngee ŋo lɔ, fɔ́ mɔɔn fyáa wáman mɔɔn sawa á kɛ́ sɛ́ɛya le.

²⁰ Mínnuu kóyoongɛla, i wɛɛ mín ngɛ o gbáan i man bɛ́ ɲanla, ké mɔɔn tɔ olu a sháan.

²¹ Ní fɔla í yɛ tínɲan in ne Ala ɲankɔɔ, Ɛnza Ngílisi ɲankɔɔ, óni Ala wɛɛ malɛɛka mínnu tá olu ɲankɔɔ: Ké, í kɛ kɛ o ko olu bɛ́ kɛla, í kɛ́nan lɔ bhɔ́ lɔ lɔ, ké mɔɔn bɛ́ á kéeɲan í mán.

²² Í kɛ́nan kɔ́lɔtɔ kɛ í bhóo lá mɔɔn si ka, kɛ o tíi o bhyáa bháala la Egilizi o kɔ́ɔnnɔn. Í kɛ́nan kɛ mɔɔn sí twáanva le kóyoo ŋo lɔ, í yɛ́ɛ lásɛnnɛnyanin ndo.

²³ I kɛ́nan kɛ jí gbáanzan ŋo minnan, i kɛ lɔ kɛ íi duvɛn ŋo dɔ́ɔnin min i yɛ kɔ́ɔn díin ŋóni yangalo mínnu kɛ lá í lá swáaswaa olu kósɔn.

²⁴ Mɔɔn lɔ́lu ta yúumu lanin ŋe gbɛlɔ le, sannin olu ta kíti o á tɛɛ, wáa lɔ́lu ta e lɔ́nan kwɔ́la le.

²⁵ O ɲán kée ŋo man, kóbhɛɛ olu lanin ŋe gbɛ́lɔ, háanin mínnu lanin ndɛ́ gbɛ́lɔ, olu táa se tóla lóonɔn.