1 Timote 2 - Mahou

Ala dɛ́li séɲan o

¹ Ni mín ɲíinnan ótun, o lée ko: áa Ala dɛ́li, kɛ í sɛ́ɛ, kɛ a mandhyaa, kɛ a bálika bhɔ Adamandhye ŋolu bɛ́ kósɔn.

² Aa í sɛ́ɛ mansa olu yɛ óni ɲɛnmɔɔn olu yɛ, o bhóo o mán án ɲáan án ɲɛn dínɲanlɔtɛɛ o kɛ yóso swáanya o lɔ, láha o lɔ, ɲán mín ŋan dí Ala yɛ, ɲánbhɛɛ mán.

³ O le káɲin, o le a di Ala yɛ, án ngísibhaa o,

⁴ o mín ŋé fɛ ké Adamandhye ŋólu bɛ́ á kísi, óni ké ii tínɲan o lɔ,

^5-6 kɛ mansɔɔ Ala kée née ye óni cɛ́lɔbhyɛmaa kée née Ala ní mɔɔndhye ŋolu cɛ. O lée Ɛnza Ngílisi le, mɔɔn mín ŋe a yɛ́ɛ di kúnmanka le bɛ́ yɛ. O sɛ́ɛya o lée bhyɛ o wáati o man.

⁷ O le kósɔn Ala é ne kɛ o kóman o lásebhaa le óni céladhye ne, ni tínɲan le fɔla, ndɛ́ fwɔnɲan la o le, Ala wɛɛ ne kɛ síya gbɛ́ɛ olu yɛ kaamɔɔn le, kɛ olu kala lánanya óni tínɲan o la.

Cɛ olu ni muso olu táamankɛ seɲan o Egilizi o la

⁸ O le kósɔn née fɛ ké cɛ olu a i sɛ́ɛ ywáa bɛ́ lɔ, kɛ i bhóo láwii ní i yósogbɛnin ŋo le. Mwɛ́nnɛnya óni sɔ́sɔli kɛ́nan kɛ i yóso o lɔ.

⁹ O ɲán kée ŋo mán, muso olu mánsii séɲan o bhyɛnin ŋán kɛ, óni i kɛ́nan fáanin lo kɛ i yɛ́ɛ yaa, óni ii sé i yɛ́ɛlɔmyaanla i yɛ fáanin lo nzéɲan olu lɔ. I yɛ cɛ́ɲan o kɛ́nan kɛ yɛ́ɛlɔbwoɲan kun ngɛ olu le, wáman sɛ́ɛn nó nu le, wáman kɔ́ɔnngoo ló nú le, óni fé nágbɛɛ ló nu le.

¹⁰ Wáa i yɛ cɛ́ɲan o á kɛ́ kóbhɛɛ kɛ́ lu le, óyoo muso mínnuu sháannan Ala ɲɛn.

¹¹ Muso olu kákan ne kɛ káa ŋolu lɔ́myɛn mányiili óni lumandhye o lɔ.

¹² Ne tɛ́ fɛ ké muso lɔ á kɛ cɛ o kaamɔɔn le, wáman kɛ a yɛ faan o á bwóɲan cɛ o ta o le, a lúmandhyenin ne kákan kɛ tó.

¹³ Kɛ mansɔɔ Ala é nva Adaman lé la jónan, kɛ tó Maanwa lala.

¹⁴ Sɔtaannan man nva Adaman lánɛɛn kɛ a bhɔ́ tínɲan o ka, aa muso o le a lánɛɛn, muso o lafiinin ŋo lée Ala yɛ sɛliya o cáan,

¹⁵ wáa muso o yáa kísi wóo o kósɔn. Muso olu yáa kísi, ní i kɛ tó lánanya o lɔ, dhyáaɲɔɔnya o lɔ, sɛ́nnɛnyali o lɔ, óni kɛ i yɛ́ɛ lɔmyaan.