1 Timote 1 - Mahou

Twaali o

¹ A fáanan Pɔli la. Án Ngísibhaa Ala óni án ɲée é Ɛnza Ngílisi mín ne, o léelu ne kɛ Ɛnza Ngílisi yɛ céladhye ne,

² kɛ a dí Timote man, míin nyénjɛ gbútuu le lánanya o lɔ. Ké án Nva Ala óni Ɛnza Ngílisi án Mantii yɛ nɛ́nmɛn óni hínnɛn óni láha o á kɛ í fɛ́.

Kaa mɛ́ɛbhɛɛ o

³ Ndáatɔ o le Masedwanin yamaan o lɔ ní í mándhyaa ngo íi tó Efɛzi, mɔɔn mínnuu yénɔn tó ii mɔɔn olu kalanan kaa ngbɛ́ɛ la ké íi fɔ olu yɛ ko ii o labhyaa.

⁴ A fɔ i yɛ ko ii i kwɔ́kɛ o tɛ́ɛn ŋolu la óni la ndɛ́ bhyɛman tɔ́ɔ fɔ mín nan, kɛ mansɔɔ o lée nánla ni kiti lɔkoo ŋolu le. Ala wɛɛ bháala mín ngɛ́ɛfa án mán lánanya o lɔ, o tɛ́ o látaala ɲɛn.

⁵ Kóman míin ngún ŋo lée dhyáaɲɔɔnya o le, dhyáaɲɔɔnya míin bhɔ́la yóso sɛ́nnɛnyanin ŋo lɔ, yáakii sii o lɔ, óni lánanya sɛwɛman ŋo lɔ.

⁶ Lɔ́lu wɛɛ bhɔ́ o sháa o ka, kɛ i yɛ́ɛ bhyáa kiti lɔkoo ŋolu lɔ kɛ i yɛ́ɛ lafii.

⁷ Olu fɛ kɛ kɛ sɛ́liya kaamɔɔn lu le, ii mínnu fɔla, óni ii kómanla mín nga ni tɛ́ɛnga ne, i tɛ bhɔ́la olu ɲánle.

Tɔ́ ŋo mín ngɛla

⁸ Án ni lɔ ŋóo sɛliya o káɲin, ní án ngɛ a lataaman a ɲán o man.

⁹ Án ngákan kɛ a lɔ ŋóo sɛliya o mán sii mɔɔn téenin ŋolu kósɔn, wáa aa sii sɛ́liya látaamanbhɛɛ o léelu kósɔn, mɔɔn mulutinin ŋolu kósɔn, mɔɔn mín nú tɛ Ala bwóɲanla óni yúumu tɔ olu kósɔn, mɔɔn mínnu tɛ fé nzɛ́nnɛnyanin ŋolu yacesiila óni mɔɔn mínnuu í yɛ́ɛ bhɔ́la Ala lɔ, fafaabhaa o, manfaabhaa o, óni mɔ́ɔnfaabhaa olu kósɔn,

¹⁰ kaanngɛbhaa olu, cɛ mínnu i lala ni i cɛ ɲɔɔn ólu le, mínnu bháala é yɔ julaya o le, fwɔnɲan fɔ olu, lákan ndɛ́ mɔɔn mín nú la, óni mɔɔn óo mɔɔn tɛ́ táaman kɛla kɛ kéeɲan ni kaa nzɛnnɛnyanin ŋo le.

¹¹ O kaa ŋóni Ala nɔ́lɔman nisɔdhyaanin ŋo yɛ sanmankanmɛɛ o táala ɲɔ́ɔnnvɛ, mín ŋe kɛ́ɛfa ne man.

Ala kóɲwaan lɔ ŋo

¹² Ní bálika bhɔ́la án Mantii Ɛnza Ngílisi yɛ, o mín ŋwɛ́ɛn faan dí né man. Ni bálika bhɔ́la a yɛ, kɛ mansɔɔ a wɛɛ né yáce lákanndii le, kɛ ne ta kɛ ngɛ a yɛ bháalakɛdhye ne.

¹³ Ne mín ɲɛ́ɛ tɛɛ Ɛnza ndɔ́ɔ o cáanmaa le, ne mín ɲɛ́ɛ tɛ́ɛ a tɔ́lɔbhaa le, ne mín ɲɛ́ɛ tɛ́ɛ nɛ́ɛnninkɛbhaa le, wáa o yɛ́ɛ bɛ́ kwɔ Ala é hínnɛn ne la, kɛ mansɔɔ ndɛ́ɛ o bɛ́ kɛla kólɔmɛɛya óni lánanbhɛɛya o le lɔ.

¹⁴ Án Mantii oo a yɛ nɛ́nmɛn o kɛ ɲɛn shɛ́ɛman ne, ni lánanya le óni dhyáaɲɔɔnya le, mín ŋe sɔɔla Ɛnza Ngílisi la.

¹⁵ Kóman míin ŋé tínɲan le le, mɔɔn kákan kɛ sɔ́n mín bɛ́ man: Ɛnza Ngílisi e nan dinɲan lɔ le kɛ nan yúumutɔ ólu kísi, ne Pɔli le yɛ́ɛ yé o mɔɔn jónan o le.

¹⁶ Wáa o le yɛ́ɛ kósɔn Ala e hínnɛn ne la, a tɛɛ fɛ le ké Ɛnza Ngílisi a tinmin né mán, né mín ɲɛ́ɛ é yúumu tɔ olu ɲɛn, kɛ a yɛ yósoswaanya o yáa mɔɔn ólu la, ké o á kɛ́ sɛ́ɛya lé, mɔɔn mínnu kaa la a lá, ɲáanmanɲan wɛ́ɛbhɛɛ o kósɔn.

¹⁷ Mansa míin yénɔn wáati ó bɛ́, mansa mín ndɛ́ saya kɛla, mín ndɛ́ yéla, Ala kéembe o, bwóɲan óni kunnanwee ŋoo ale le tá le wáati bɛ́! Amiinan!

Kɛ́ɛ bhɛ́ɛbhɛɛ o kɛ

¹⁸ Nyénjɛ Timote ni ladhyeli kan míin nvɔla í yɛ, kɛ kéeɲan ni céla olu wɛɛ ko mínnu fɔ í ta fa ŋo fɛ kɔ́ɔ o le, ké o kóman olu a fáan di í man kɛ kɛ́ɛ bhɛ́ɛ kɛ,

¹⁹ ni lánanya o le, óni yáakiisii o le. Lɔ́lu wɛ́ɛ i bá o man, olu wɛ́ɛ kɛ́ i yɛ́ɛ la lánanya o bé jí lɔ́ o sɔ́ɔbu le.

²⁰ Himene ni Alɛsandi é o sɛɛ ó lɔ, ŋwɛ́ɛn olu labhyaa Sɔtaannan la, ké Ala lɔtɔɔsi o á bhɔ́ i bhóo fɛ́.