1 Tesalonikika olu 4 - Mahou

Táamankɛ sé mín ŋa di Ala yɛ

¹ O lɔ, mádhye ŋolu, á kákan kɛ táaman ɲán mín man, ké á táaman seɲan o á dhyáa Ala yɛ, án ŋwɛ́ɛn á kála o la. Tínɲan lée wé, áa táamanla cé. Wáa án ni o fɔla á yɛ́ kɛ a mangbɛya Mantii Ɛnza ndɔ́ɔ la ko áa táa ɲɛn nvɛ ni o le.

² Án ni cé mínnu fɔ́ á yɛ́ Mantii Ɛnza ŋan fɔ́li lɔ, áa olu lɔ.

³ Mín ŋan dí Ala yɛ, o lée á yɛ́ sɛ́nnɛnyali o le: Ké áa a yɛ́ɛ myaan kaanngɛ o man.

⁴ Bɛ́ kée ngée nán á sé gbáamyaanla á yɛ́ɛ la, kɛ dínɲanlɔtɛɛ o kɛ́ sɛ́nnɛnya o lɔ, ni bwóɲan le.

⁵ Á kɛ́nan tó nɛ́li yóo ŋolu kwɔ, óyoo síya gbɛ́ɛ mínnu man Ala lɔ.

⁶ Mɔɔn sí kɛ́nan lo a mɔɔnɲɔɔn la, kɛ nánmaan bhyaa a la, kó míin ŋwé o lɔ. Án ndɛ́ wɛɛ o kó ólu fɔ́ á yɛ́ kɛ a mangbɛya, ko Mantii o le kaa o ko olu yáacɛ bhɔ́ mɔɔn olu lɔ.

⁷ Kɛ mansɔɔ Ala man án ngíi nɔ́ɔn o kánman, aa án ngíi sɛ́nnɛnyali o le kánman.

⁸ O le kósɔn ní mɔɔn mín ngɛ í bá o kóman ó mán, o tíi ó mán í bá mɔɔn lɔ, wáa a wɛɛ í bá Ala le lɔ, Ala mín ŋwɛ́ɛn a Ní Sɛ́nnɛnyanin ŋo dí á mán.

⁹ Mín ŋé nan kɛ dhyáaɲɔɔnɲɛn o le, mɔɔn tɛ́ sé kɛ lɔ fɔ á yɛ́ o ko o lɔ bhée. Kɛ mansɔɔ Ala wɛɛ á lée gbúlu kala ko áa dhyáaɲɔɔnɲɛn.

¹⁰ Á lo ŋe o le kɛ́la bhádhye ŋolu cɛ́man Masedwanin yamaan o ywáa bɛ lɔ. Wáa án ni á dɛ́lila ko áa táa ɲɛ́n o lɔ kúdɛyi.

¹¹ Áa í lɔ́ja kɛ tó láha o lɔ ɲɔɔn nvɛ, áa á yɛ́ kó ó lée lu ɲánbhɔ dɔ́lɔun, kɛ bháala kɛ ni á gbúlu bhóo le, óyoo án ni fɔ á yɛ́ tɛnmɛn.

¹² O ɲán o man á táaman seɲan o yáa bhyɛ lánanbhɛɛ olu ɲánla, á síinin ndáa kɛ́ mɔɔn sí la.

Mantii o nán kó o

¹³ Mádhye ŋolu, mínnu wɛ́ɛ sayakɛ, án ndɛ́ fɛ ké áa kɛ kólɔmɛɛ lu le olu ta fá ŋo fɛ, ke á kɛ́nan í ɲanlasii óyoo yeesiilaa tɛ́ mínnu la.

¹⁴ Ní án ngɛ lá a la ko Ɛnza ŋwɛ́ɛn sayakɛ kɛ kúun, o ɲán o man án nánnin ŋé a la ko mínnu wɛɛ sayakɛ, Ala yáa olu mángbaa Ɛnza nan, Ɛnza ngósɔn.

¹⁵ Kɛ mansɔɔ, án ni mín nvɔla á yɛ́ kɛ kéeɲan ni Mantii o yɛ kóman o le, ko Mantii o nán o káa mínnu sɔ́ɔ i ɲanla án njɛ́man, olu táa lo mɔɔn sayakɛnin ŋolu ɲɛn.

¹⁶ Kɛ mansɔɔ Mantii o gbú yáa i yíi kɛ bhɔ́ sángboo o lɔ, gbáangan ŋo myɛn wáati o lɔ, ni malɛɛka olu kúnndii o kómankan ŋo le óni Ala yɛ búufyɛkan ŋo le. Óni mínnu wɛɛ sayakɛ ní Kílisi le, o lée lu káa kúun jónan.

¹⁷ O kwɔ, án nee mínnu ɲáanman ŋwɛ́ɛn tó, án ne ní olu yáa yɛ́ɛ kɛ táa ɲɔ́ɔn nvɛ́ sángawa ólu lɔ Mantii o kún myɛ náa o lɔ fwɛ́ɛn ó lɔ. O bhóo mán án ɲáan tó ní Mantii o le kúdɛyi.

¹⁸ Áa ɲɔ́ɔn ɲóso swáanya ni o kóman ólu le.