Hibru 1 - Laulau na Vinalu mine Salemo

Natune Salemo ei bilii e eitou a inade

¹ Lisa Salemo ei vei le eisusune eitou mapapaina na asene sou a profet na matamatana vea seasea.

² Moni ilala na punuluna malada ie Salemo ei ademuada ane eitou na asene Natuna. Salemo ei matoalesi e Natuna mina gualena golugolu vuso. Me na limane ei Salemo ei mapale a magamaga ma langi tamai.

³ Natuna do ei a muada mina malasana buo mine Salemo, mei tomane moni e Salemo oto. Inade mine ei isa a sagagalina, me na inadena do ei iteale a golugolu vuso ni muina kuba. Ei mapuliosi a pipigona mina taulelena sinusu mine sou a vanunua ma tavivine vuso ne sou palea alaba, seido ei ugu na lima gata mine Salemo, ei a Munugana Mapana ei ino oata oto sele.

Natune Salemo ei vululusi e sou a bineanea

⁴ Salemo, Tamana ei toe e Natuna ei palea buo mamau lou ane sou a bineanea, tomane moni ei bilii e ei a aisa i buo mamau lou ana aisane sou.

⁵ Salemo ei vei ane Natuna maido, “Oo e Natugu. Seidei eau paleasi e tamamu.” Me ei vei lou maido, “Eau na muigu e tamane ei, me ei ni muina e natugu.” Moni sei ilala Salemo ei vei a matana inade maido usino ne sei bineanea minei? Boa vuso sele.

⁶ Moni ilala ei peltase Natuna matalagu usinani na magamaga, Salemo ei vei maido, “Bineanea vuso mine Salemo ne sou masalalai e ei.”

⁷ Salemo i damutale sou a bineanea me ei vei maido, “Salemo toe e sou a bineanea minei a avivili, me ei toe e sou a vanunua na pipigona minei a niluluna oavi.”

⁸ Moni ei ade e Natuna maido, “Salemo, o no muimu a mapana taliuliu taliuliu. Oo iteale a vanunua ma tavivine vuso minio na inigogona i bilesi moni.

⁹ O kalekale moni a inigogona bilesi, me oo ma kale sape ete a inigogona pagu. Maido me Salemo minio oto ei singi a wel mina munongena muata ne oo, na inigogona iedo ei maite maido oo a mapana, me oo vululusi e tamtamaimu vuso.”

¹⁰ Laulau mine Salemo ei vei lou maido, “Bibi Taula, sinokona o mapale a magamaga ieli me ei muina sagali. Me na limamu oto o mapale a langi tamai.

¹¹ Ne sou buale vuso, moni oo no muimu taliuliu. Ne sou masisinge tomane a kinainai mumugu.

¹² Me oo no vilitatai e sou tomane a malo, me ne sou sauvuvule tomane a kinainai. Moni oo no muimu moni simaido taliuliu taliuliu. Ma ilala minio ei ma mapigogoi ete ni pulu.”

¹³ Salemo ei vei le Natuna maido, “Oo ugu na limagu e gata mapigogoi eau na tau e sou a butu minio ne sou matano moni ne oo.” Moni sei ilala Salemo ei vei a matana inade maidolo usino ne sei bineanea minei? Boa vuso sele.

¹⁴ Sou a bineanea sou a nunu, me sou goligoli a pipigona mine Salemo. Salemo ei peltatase sou usino mina buloine sou a vanunua ma tavivine ei kale ni gualeliu.