Zep. 3 - BUKO SIPUNENAN

Jerusalem tuukumake

¹ Tutelei le' Jerusalem laggai sikatai sioba' masisaggangi si Tuhan samba sipaoreiji sikalaggaijatnia!

² Makatainangan te laggai sitaioba' masisilo' paasekat Tuhan, samba sitaimaletcei kapatekakatNia, sitai sege'ake' purimanuaiatnia kai Tuhan, samba sitaitiddou paroman katubuNia!

³ Sangamberi siabeu tiboi tubu ka laggai nenda kele' singa sipurorou. Sipasiukumnia kele jojot leleu simalaje: bulat maalau bagadda bailu berisara tolat tak aralegeiake komen mancep.

⁴ Tai nabi ta anai ukut bagadda samba tamomoi tukatonemi; tai imam leu rapalolit leu kaunen kai Tuhan samba rapabailok le surukat Taikamanua bailiu puuktunganda.

⁵ Tapoi aile' si Tuhan ka laggai nenda, sarat katubulanan le igagalai samba ta'babara simasele. Senen simanseman sarat iake' le katuroipoat ka laggai nenda mariuriu le ragalai katai takmamaila sia.

⁶ Kuanangan si Tuhan, “Maigingan Akutataake bangsa. Laggai leuet Kupakatai samba kekre, pujagoadda Kubailiuake simararagat. Lagaira leu amatangeuan ta'anai sikudduijinia samba enungan amatangeuan.

⁷ Kupaatu poi, “Kineneiget bulatnia sapamianku masisuru Aku samba ralelek ake' sangamberi paasekatKu. Bulatnia rarerepdep sigelaiakenen katubudda. Tapoi amatoila geti, makope le aragalai sikatai bele peile siboiki.

⁸ Tapoi jago! Ngenaake gogoinia kupurio ibailiu Aku sipangangandu. Aipoi Akuteuakean masiruruake' bangsa-bangsa samba purimataat kukau golukku katubudda. Sangaliot polak tata' le kalulut ikomnia oloi golukku.

⁹ Tapoi Kubauake' le patuatda tai bangsa-bangsa, bailiu katubukkungan le rapaninindou, tat katubut taikamanua bagei. Bangsa-bangsa leu Akukuangan le rarereddet.

¹⁰ Sibabara ka simareunan ka Sudan paamianKu simasaragai nenda momoi sia samba masipanguruat ake' buluakenen ka tubuKu.

¹¹ Kateteret nenda, ale kam sapamianKu, buian numaila kam kalulut anugalaiake' kam masisaggangi Aku. Kutuituiake' le' poi senen sirimanua simabuak patuat, samba nusaggangi kam Aku minca' ka leleu sipunenan.

¹² Sedda te kuoobaake mukuddu simariuriu bangsa simaepe patuat, sipasisiddoni paromanKu. Momoi rakuddu sedda.

¹³ Tai israel sipulelegei ta'an paboboko sia minca' katubut kaseipa', samba ta'an mupajojoat sia puririmanuanda ta anai magulai samba maaban samba ta anai kaloto'akenen.

Urai Puangkakat Baga

¹⁴ Ale Israel, puangka' kam baga samba muurai! Ale Jerusalem, puangka' kam baga sangaliot patuatmui!

¹⁵ Kalulut aiariake'an si Tuhan masiukum kam; Aituituiake'an sangamberi saggakmui. Aipasisikeli kam rimata Israel, Taikamanuamui. Kineneiget buian numaloto' kam.

¹⁶ Babara te teterenia rakuania sirimanua, “Oi Jerusalem, buinumaloto' kam samba mabele' bagamui.

¹⁷ Ai jajago kam Tuhan Taikamanuamui Sipulugege. Amamanang an kam kalulut gegeNia. Mangka bagania si Tuhan kalulut kam, kakatet bagaNia iake' kakam purimanuaiat sibau.

¹⁸ Kalulut kam, puurainangan angkat baga, kele' sirimanua sipupupunen.” Ngangan Tuhan, “Kutataake' le pugejaat baga katubumui. Paloloiat katubumui kutataake'.

¹⁹ Babara te gogoinia kutataake' sipaoreiji kam, Kuujaake' le sirimanua simasakit; sangamberi sirimanua siribbaiakenen kutoiliake'. Paloloiat katubudda kubailiuake' katuumunanda; ka senen kudduat, samba ka sangaliot polak, raabeuake' le sia samba raumun sia.

²⁰ Babara te teterenia, taikalaggaiatmui simasasaragai Kupalulu sia ratoili. Kuabeuake' leu kam ka sangaliot polak, samba purimanuaitmui simaeru' kupaeru' minca'.” Kise' te ngangan Tuhan.