Zep. 2 - BUKO SIPUNENAN

Pananakat masibauake patuat

¹ Oi kam bangsa sitaiagai puailaat, agai pei kam

² kepei ilaju samba numagarak kam kele ogok, seseake kam kepei iaili gogoi pugolukat Tuhan samba iorak kam golut Tuhan sipujujuluu.

³ Toili ake kam kai Tuhan, oi kam sangamberi sirimanua simaepe patuat sikuddu ka laggai nene samba sangamberi sipasirereddet parentaNia. Puparaboat kam siripot siobat Tuhan samba paepe kam tubumui kamataNia. Bule tak iorak kam ukumnia kagogoi ipakoinong golunia.

Pateleijat ka bangsa sigoilik Israel

⁴ Ka laggai Gaza tak anai berisara sirimanua muririmanua. Mutangeu le laggai Askelon kalulut tak anai sikudduijinia. Sikuduiji Asdod tukekele le sia kalulut pasaggangan sigege sinago samba sikudduiji Ekron tukoini ake sia ratuitui ka laggaira.

⁵ Tutelei le kam, oi kam tai Filistin, bangsa sikudduiji ka bebet koat. Aiteuakean si Tuhan ukumanmui. Isusubuake kam geti, tak anai kam berisara sibebela.

⁶ Laggaimui kabebet koat ibailiu le simaturu-turu, luglugra sipasijago tarimeu samba gelit biribiri tugalai sedda.

⁷ Sia sebebela sibara ka Jehuda kudduijirangan laggaimui nenda. Putarimeurangan geti ka polakmui nenda samba sinoibo merep leu sia kasenen lalepda tai Askelon. Kalulut Tuhan, Taikamanua ijajago sia minca Taikamanunda samba bailiuakenangan purimanuaidda tak anai magulai.

⁸ Kuanangan Taikamanua Sipulu gege, “Akuarepman bangsa-bangsa Moab samba tai Amon masipaloloi samba masigegei paamianku. Rapatiboiji masioppu polakra sapaamianKu.

⁹ Ka onin Aku Sipuririmanua, Taikamanuan bangsa Israel, Kutataake le tai Moab samba tai Amon kele tai Sodom samba tai Gomora ibailiu le sumur-sumur garam samba timbunan karagatat teret buruburu tutukinangannia parou. Sipulelegei sapamianKu sibebela masiraurau geti sikudduijinia samba oppurangan leu polakra tai moab samba tai Amon.

¹⁰ Kisedda te geti tai Moab samba tai Amon tuukum kalulut buak patuatda, ialeuet kalulut arapaloloi pamian Tuhan Sipulugege.

¹¹ Si Tuhan ikau geti sia muloto'. Ipakatai le sangamberi sabulungan ka polak. Iageti sangamberi bangsa panindourangan leu kai Tuhan kalaggaira senesenenda.

¹² Ialeuet sikuddu ka Sudan matei leu sia kalulut ukuman Tuhan.

¹³ Kapplu nenda pakeinangan leu gegeNia si Tuhan bule ipakatai tai Asyur. Ibailiuake le laggai Niniwe simatangeu samba su'su' simalio ta anai sipututu'tu'.

¹⁴ Sedda te parurukat paleiti-leiti samba sangamberi tarimeu merep samba muari. Uma popo purumunnangan geti ka pulaggaiat nenda samba ipunau kasenen jendela. Uma kailea punaunangan kasilittengan matat baliu gugurukat. Loina cemara sikuddu kasenen bangunan laggai nenda tubuka isappru.

¹⁵ Iate sipuaaili geti ka laggai simangaka' baga samba siaddeake tubunia maarau. Rakua poi laggaira iate laggai sabeu ka polak. Bulat matangeu laggai nenda, tak anai sikudduijinia, sarat paleiti-leiti sipururumun sedda! Senen sirimanua situsasabau sedda tugege samba maloto sia.