Zep. 1 - BUKO SIPUNENAN

¹ Si Zepanya iate togat Kusyi. Tiboitubunia barania ka simaepe' iei ka simabuak iate Kusyi, Gedalya, Amazia samba Rimata Hizkia. Nene le sikuat Tuhan kamatat Zepanya kateteret Rimata Josia togat Amon masiparenta tai Jehuda.

Gogoi Pasiukuman Tuhan

² Kuanangan si Tuhan, “Kususubuake' le geti sangamberi sibabara ka polak,

³ sangamberi sirimanua samba leiti', samba leu uma samba iba, kumamatei ake leu sirimanua sikatai. Sangamberi sirimanua kumateiake beri sia sara mulegei murimanua. Kise te ngangan Tuhan.

⁴ Kuukum ake tai Jerusalem samba sangalio Jehuda. Sipulelegei katukelat masipanindogi sabulungan Baal kutataake kakudduat nenda. Imam-imam sipasikeli sabulungan Baal bulat tairepdeprangan sia sirimanua.

⁵ Kusappruake le kasei pa situsasakai ka teitei lalep sipanindogi sulu, laggo samba panyanyat. Kutataake leu sia sipanindogi Aku samba sipususuppa sim ariuriu katubukku, tapoi musuppa leunia ka onin bulungan Milkon.

⁶ Kusubuake le sia sitaiooi katubukku ele masitiddou pasopoatKu samba sikaddiuake Aku samba taan araoba masitut Aku.”

⁷ Amalegerengan gogoi Tuhan. Kagogoi nenda Taikamanua masiukum geti simasele. Lulut nenda putangoan kam kamataNia. Amatarekngan te' si Tuhan masipamatei paamianNia kele buluakenen pusurakat samba aisogaian sisaggangi tai Jehuda kagogoi pasijajakat nenda.

⁸ Kuanangan si Tuhan, “Kuukum le siabeu tiboi tubu, sia tatogat Rimata samba sangamberi sirimanua situt katukelat puririmanuanda siooiake.”

⁹ Kuukum le sangamberi sirimanua sipususuru kele sirimanua sitaiagai Aku, samba sirimanua sipananangkou sioba pamatei bule rasut ake lalep tuandra bibilet siraurau.

¹⁰ Aikua si Tuhan, “Kagogoi nenda kise' aikua si Tuhan, maarepnangan pusosou Kagugurukat Iba. Kalaggai sibau maarep geri, samba nau karaganan simakope' ailounangan leu patinambu-tinambu.

¹¹ Pureureu kam baga samba mugeri bagei ke' nuarep kam nenda, kam sikuuduiji laggai ka su'su', aipoi sangamberi sirimanua sipasisasakiake' samba sipasibabaleake' bulagat amateian sia!

¹² Kateteret nenda, “Kuala te tutugan samba pulelekkungan laggai Jerusalem. Kuukum le' geti sia sipulaggai sitaimaletcei samba sisegeake' puririmanua ka siobat bagania, samba sipaatu aipoi Aku Tuhan ta'anai akugalai kele' kisene ele kisedda.

¹³ Pukaioatdra turaurau samba lalepdra leu tupakatai. Ragagalai lalep tapoi tak rakukudduiji. Rabesiake' leu ragalai monen anggur, tapoi tak ralo anggurnia.”

¹⁴ Amalegrengan gogoi pasiukuman Tuhan, bulania amalegrengan, itcoat babaranga le simaruei. Kagogoi nenda sarat besit patuat, bailiu tai saladdu simagege leu muaile' kalulut belet bagadda!

¹⁵ Gogoi nenda, gogoi pugolukat te, puokkiman samba gejat baga, gogoi katuraganan samba katukataikat, gogoi pugepgeman samba sikatai, gogoi simagepgep samba simatinobut,

¹⁶ kasanganantat gogoi nenda maarep ngangan pipiau samba katsiddra sipasasaggak sisaggangi laggai sibara kekre bukku samba sibara kudduat pujagoat simabuak.

¹⁷ Kuanangan si Tuhan, “Kubabaraake' te geti maigi gejat baga kasangamberi sirimaua ka polak, bule' ibailiu patuptupakenendra kele' sirimanua simapeset. Aipoi amajongan sia ka tubukKu. Kineneiget mapilinangan geti logaura kele' oinan, samba mabute'nangan akkula'ra ka uddut polak.”

¹⁸ Kagogoi pulotokat nenda ipatoila goluNia si Tuhan, iageti sangamberi mas samba perakdra tamomoi irimanuaake' sia. Sangalioat polak katai ilabonia oloi golut Tuhan. Sinulut alanangan geti si Tuhan engan sirimanua ka palak nene.