Zakh. 9 - BUKO SIPUNENAN

Pasiukuman ka sangamberi laggai pabebeakenen Israel

¹ Nene te patonekat Tuhan. Aiteuakean iukum laggai Hadrakh samba laggai Damsyik. Tasarat suku Israel tapoi inan Laggai Siria leu et si Tuhan le sibakkatNia.

² Hamat sipasosong ka Hadrakh leu si Tuhan sibakkatnia, kasedda leu et sangamberi laggai Tirus samba Sidon samba sangamberi puagaiat sipulaggai sedda.

³ Ai galaian Tirus irip laggai pasiddonannia samba bulat maigi iruru'ake mas samba perak pat bailiunangannia sabbangan le bibilet simalabbei saki kele ngai samba loti ka enungan.

⁴ Tapoi ibailiuake le nia si Tuhan si mageba. Sangamberi pukayoat laggai nenda ribbaiakenangannia ka bagat koat samba laggai nenda tata' le geti ilabonia obengan.

⁵ Laggai Askelon samba Gaza geti itcona lenia bailiu malotonangan. Kisedda leu Ekron ka sia tata' ron patuatnia murimanua. Laggai Gaza tatata' le geti rimatania, samba Askelon ibailiu geti matangeu ta'an sikudduijinia.

⁶ Asdod rakudduiji sia sibara ka bangsa simagalu. Kuanangan si Tuhan, “Tai Filistin simabuak paatuat nenda leu et Kusappruake le geti.

⁷ Taan rakokom minca akkula simalogau ele komen bagei keraet. Sangamberi sirimanua sipulelegei bailiunangan geti sia paamianKu samba tuoniake le sia sibailiu rubeiat sibara ka suku Jehuda. Ekron geti ibailiu le geti laddou paamianKu, kele tai Jebus kateteret siburu.

⁸ Kujago le geti polakKu samba masikekre sangamberi saladru sibara ka bangsa bagei sioba masienunginia. Ta'an Kuobaake sia sipaoreiji paamianKu masikupkup paamianKu. Aipoi akuitcoan pangoringandra.”

Rimata sioi geti

⁹ Ale, sipulalaggai ka Sion, pugora kam baga! Ale, sipulalaggai ka Jerusalem, kau imangka bagamui! Itco kam, amoian rimatamui ka bagat kamanangan! Nia rimata puroipoat siambit katuaraugat. Tapoi sun purepekat paatuat aioi sipukakalidei kalidei ta'kabelai sibau tubu.

¹⁰ Kuanangan si Tuhan, “Sangamberi kereta pakeiet pasaggak sibara ka Efraim geti Kuriribbaiake le, sangamberi kuro ka Jerusalem geti Kutataake le samba sangamberi silogui Kupakakatai le. Rimatamui geti le paabanan ka talagat bangsa-bangsa. Ka sangaliot koat Nia sibakkat teu, barania ka bagat oinan Efrat teret aili ka tu'tut polak.”

Masitoiliake minca puririmanuan paamian Taikamanua

¹¹ Kuanangan si Tuhan ka tubut paamianNia, “Lulut palelengan sigalaiKu pasambamui, palelengan sironnakenen pasamba logau buluakenen pusurakat, Kubebelaake te geti sasarainamui sipangongorik ka kudduat katuribbaiat sirimanua situugguk ka bagat uggungan simagarak.

¹² Toiliakean kam ale sirimanua siribbaiakenen, kineneiget aian karonanmui. Toiliake kam ka kudduat pukunemanmui, mariuriu le geti Kupanukani kam. Oto Arepmake kam: rua ngaoleat te geti Kupanukani kam, Kalulut sangamberi pangoringan siorikmui.

¹³ Kupakei le geti Jehuda sibailiu rourou ka pasaggangan, samba Israel sibailiu silogui simatarek tupanaake. Sipulaggai ka Sion kupakei le sia sibailiu lanjau; Lanjau nenda tupakei te geti masisaggangi sangamberi tai Junani.”

¹⁴ Ipatoila te geti tubunia si Tuhan ka tubut paamianNia, kele bila le ipanaake siloguiNia. Tuhan Sipulubeunan iulup te geti terompet toggaiat pasaggak Lepa einangan leu et iailiake pasaggangan ka rusa jurungen sibara ka kaiaman.

¹⁵ Bulat ipasikeli le paamianNia bailiu sangamberi saggak momoi rakalaake. Kele gereira sirimanua simapuineng kalulut lo simapuinengen, kisedda te gereira kabagat pasaggangan. Kele imapili logau tarimeu sibuluakenen ka uddut kudduat pasibuluat, kisedda te imapili logaura tai saggak.

¹⁶ Kebai amuailingan gogoi nenda, paaraunangan te geti paamianNia si Tuhan, kele sipasijago ipaarau tarimeunia ka sipasisasabbak. Mutotoro te geti sia ka polak Tuhan, kele ipukirisau sangamberi pulaingean ka kirit pubebeunan.

¹⁷ Apate eru polak Tuhan ka gogoi sibabara, apate eru samba lainge! Simakope ruei le iputu'tu anggur samba gandum sedda, sibailiu situppai ron tubudra tailainge samba taiokko.