Zakh. 8 - BUKO SIPUNENAN

Palelengan Tuhan masigalai minca Jerusalem

¹ Tuhan Sipulugege masiake patonekat nene ka tubuku,

² “Bulat kuoba le masiropmake Jerusalem kalulut bulat manuntu poi bagakku ka sipulaggaijinia samba kalulut punununtut bagaKu nenda, tuppainangan oloi patuatKu ka tubut sangamberi saggak laggai nenda.

³ Toili le geti Aku minca ka Jerusalem, laggaiKu nenda samba mukuddu sedda. Agairangan te geti Jerusalem sibailiu laggai simariuriu mutopit, samba leleu Tuhan Sipulugege kuarangannia geti Leleu Sipunenan.

⁴ Ka gerat puujaat laggai Jerusalem, mukuddu te geti minca sasibbua simanteu samba sinanalep simakope baja' bailiu rapuenung sibara tutura'.

⁵ Sangamberi enungan ka laggai sun le geti minca tatoga sipaguguile.

⁶ Pagalaiat nenda ka sia sangamberi sipuririmanua kineneiget sibara ka bangsa nene raitco'nia kele sitaiooi tugalaiake, tapoi kaku ta anai sita'moi Kugalai.

⁷ Kupaarau le geti paamianKu sikuddu ka sangamberi tobbou laggai sibara ka laggai bagei ka kudduat kaipa aituala sia,

⁸ samba tuambit sia ratoili minca baratda ka bare samba sibara ka sikaleleu, bailiu rakuddu minca ka Jerusalem. Bailiunangan geti sia paamianKu samba bailiunangan Aku Taikamanuandra. Paneineikungan sia pasamba topit samba puroipoat.”

⁹ Kuanangan si Tuhan ka tubut paamianNia, “Ronake kam paatuatmui, bule ioi nugalai kam minca UmangKu!” Tiboiet siarepmui nene iate tiboiet sitiboakenendra tai nabi sipuboiki kateteret aitugalakngake bongen Uman Tuhan.

¹⁰ Kepei iaili teterenia nenda ta'anai siooi masikau upa ka sirimanua ele tarimau, samba ta'anai simaarau tubu ka pageugeuatdra tai saggak. Sarapei, kateteret nenda Kuobaake pagolu pasambadra.

¹¹ Tapoi kineneiget ka sia sipuririmanua peile sibara ka bangsa nene galaiakenenKu ta'an te geti kele siboiki.

¹² Karapmakerangan te geti karamen ka bagat aban. Sangamberi loinat anggurdra mubua geti, belaakenangan buania polak, samba bele le geti urat simariuriu. Sangamberi panukanan nenda kukau ka sangamberidra ka tubut sirimanua sipuririmanua peile ka bangsa nene.

¹³ Ale, sipulalaggai ka Jehuda samba ka Israel! Kateteret siburu ke siooiake patelei ka tubu, kuarangan, “Bule pateleiat siorak Jehuda samba Israel leu muaili leu ka tubum!” Tapoi Kupaarau te geti ekeu, bailiu kuarangannia pasambatdra siooiake nenda, “Bule panukanan situuru ka tubutda tai Jehuda samba Israel tuuru leu ka tubum!” Lulut nenda paron le paatuatnu samba bui te numaloto!”

¹⁴ Kuanangan si Tuhan Sipulugege, Ka teteret arabaraake goluku taikebbukatmui, teuakekungan Kuukum sia simakope oru'. Ta Kusisili siteuakenenKu nenda, tapoi masigalaiakean le.

¹⁵ Tapoi kineiget Kuoba le masipanukani sipulalaggai ka Jerusalem samba sipulalaggai ka Jehuda. Oto, bui numaloto kam.

¹⁶ Nene te sangamberi parenta' bulat galaiakenenmui: Ke manibo ekeu, kua sibulatnia ka pasasambamui. Enungake siteuakenen ka bagat puroipoat samba sibaraake aban.

¹⁷ Bui' nuisiake sikatai ka pasasambamui. Bui nupusuppa ta sibulatnia. Malaga bagaKu ka tubut boko samba sitaimaroipo samba pukakatai baga.”

¹⁸ Tuhan Sipulugege masiake patonekat nene katubukku sisege' ka sapaamianNia,

¹⁹ “Puaso sigalaiakenen ka bagat laggo sikaepat, sikalima, sikapitu samba sikapulu ibailui te geti punen sabeu simasun angkat baga samba pusanangan ka tubutdra sipulalaggai ka Jeduda. Pununtuki kam baga puroipoat samba aban!”

²⁰ Kuanangan Tuhan Sipulugege, “Babara te geti teterenia sibara ka sene-senen laggai moi geti sia ka Jerusalem.

²¹ Sipulaggai sibara ka laggai sisara masikua ka tubut sipulaggai ka laggai bagei, “Kauan taei kam masipanindogi si Tuhan Sipulugege samba masitiddou panukananNia. Tut le kam kai!”

²² Oto maigi te sirimanua samba bangsa siooi geti bangsa simagege ka Jerusalem bule rapanindogi Aku Tuhan Sipulugege samba masitiddou panukananKu.

²³ Ka gogoi nenda pulu sirimanua sioiake geti moi ka tubut sara tai Jahudi samba masikua, Kuoba kumaungtuk kai kele ekeu; aipoi akuarep kai Taikamanua aisukatnakean ekeu.” Kisedda te ngangan Tuhan Sipulugege.