Zakh. 7 - BUKO SIPUNENAN

Tuhan masipaloloi puasotda sipatataju

¹ Ka gogoi sika epat laggo Kislew, iate laggo siba, ka rura sika epatnia puparentaat Rimata Darius, akenangan minca si Tuhan patonekat ka tubuku.

² Sipulaggai ka Betel arakoniakean si Sarezer samba si Regem-Melekh pasamba paguguletdra ka uman Tuhan Sipulugege bule masitiddou panukananNia.

³ Koiniakerangan leu et sia rarere' tai imam samba tai nabi, kise, “Ai peileu pa lulunia kusoibi kai Uman Tuhan simakakatai pasamba pupupuaso ka senen laggo sikalima kele sigalaiakenenmai sipururura burunia?”

⁴ Nene te patonekat Tuhan siooi ka tubuku.

⁵ KuananganNia, “Segeake kam ka tubutda sangamberi sipulaggai ka laggai nene samba ka tubutda sangamberi tai imam, puaso samba geri sigalaiaakenendra ka laggo sika lima samba sikapitu ka bagat pitu pulu ngarura buru'nia nene ta te kalulut pususuru katubukKu.

⁶ Kisedda leu et ka teteret ai sia mukom samba mulo, sarat masisege'ake bagatdra saratdra le.”

⁷ Iate nenda sikuat Tuhan sisege'akenendra tai nabi ka teteret siburu ai pei le rakukudduji Jerusalem samba silaggaijinia taanai simagulai. Kateteret nenda sirimanua tasarat ka laggai sigoiso ka legret Jerusalem rapukuddu tapoi pat aili isit ka kaiaman samba ka senen leleu isit sikaleleu.

Kalulut taimareddet paamian Israel turibbaiake

⁸ Tuhan Sipulugege masiake patonekat nene ka tubuku,

⁹ “Amururangan Kukau sangamberi perenta nene ka tubutdra sapaamianKu, “Bui' ta muparaboat kam simaroipo, panuntu baga samba mueru paatuat ka pasasambamui.

¹⁰ Bui'an nuorei tailumang, siputataina, sirimanua sioiake siturere ka talagamui, ele kasei paai kabagat okkip puririmanua. Samba bui leu “nuisiake kam sikatai ka pasasambamui.”

¹¹ Tapoi paamianKu makela le paatuatda samba bulat ta'an raoba masiarepake, seksekrangan talingandra bule tarapasiarep.

¹² Aratata'akean pununtuat baga samba tat nanai bagai baga. Bulat makope le goluKu kalulut taimareddetdra ka tiboiet sikauku ka tubutdra sinege'akenenda tai nabi sipuboboiki.

¹³ Kalulut nenda, taakualegi panindogatdra, aipoi taraarepmake Kupanibo.

¹⁴ Kele rusa simaron, Kusabuake sia pat kuddu sia ka sangamberi tobbou laggai sitaiagaijetdra. Oto polak simagabru nene bailiunangan matangeu ta'an anai sikudduijinia samba magarakngan.”