Zakh. 5 - BUKO SIPUNENAN

Itcotmata sika enem: pagalaiat buko sipurutnakenen si tububurut

¹ Lelekngakekungannia minca, samba ia pei nene akuitco sara buko sipurutanakenen sitububurut ka pata.

² Malaika nenda masinounou apa kuiitco. Alegikungannia, “Sara buko sipurutnakenen sitububurut ka pata. Nantania rua pulu eto samba lionia pulu eto.”

³ Lepa kuanangan ka tubuku, “Ka bagat buko sipurutnakenen nenda tusurat pateleiat ka sangalio tobbou laggai nene. Ka elau siboiki tusurat senen sipananangkou tubebelaake le geti ka tobbou laggai nene. Samba ka elaunia bagei tusurat senen sirimanua sipususuppa ta sibulatnia tubebelaake leu et.

⁴ Si Tuhan Sipulugege masikua, pateleijat nenda tuorakngake le geti ka lalepdra senen sipananangkou samba ka lalepdra senen sirimanua sipususuppa ta sibulatnia. Sangamberi lalep nenda riuriu le iorak pateleijat nenda teret katai.”

Itcotmata sika pitu: pagalaiat sinanalep ka bagat karakjak

⁵ Tulotcitnangan minca Malaika nenda samba masikua, “Itco! Ai pei le minca siooi!”

⁶ Lepa rere'kungannia, “Aponia nenda?” Aleginangannia, “Sara karakjak. Iate te nenda tularat jo sibara ka sangalio tobbou laggai nene.”

⁷ Karakjak nenda takkenia tima. Ai kulelekngake, takke nenda tuakkatnangan samba makoinongnangan kabagat karakjak nenda ai muundet sara sinanalep.

⁸ Kuanangan Malaika nenda, “Sinanalep nene iate masitularatnake pukakatai.” Lepa geti neineiakenangan sinanalep nenda ipukuddu minca ka bagat karakjak samba takkeakenangan karakjak nenda.

⁹ Teilakungan ka pata samba itcokungan rua sinanalep sitububurut ka ipoku. Ai kappora simaron kele kappot seggu. Alarangan karakjak siitcoku nenda, iageti ambitrangannia ratuburut.

¹⁰ Rere'kungan Malaika nenda, “Kaipa le raambit karakjak nenda?”

¹¹ Aleginangan, “Ka Babilonia, sedda ragalai le geti umania. Kebai alepaan uma nenda, galakakerangan karakjak sedda ibailiunia nenda buluijietdra.”