Zakh. 4 - BUKO SIPUNENAN

Itcotmata sika lima: pagalaiat reret alito

¹ Malaika sipaninibo katubukku nenda tulotcit minca samba masisuruake aku kele masisuruake sipeperep.

² Iageti nounounangan aku, “Aponia nuitco?” alegikungannia. “Sara reret alito mas.” Ka rubeiat buttet alito ai kudduat tulania, samba ai pitu alito sigoiliknia, senen alito ai kudduat kapenia.

³ Ka isit kai katsiu samba kai kattoet reret alito nenda ai rua loinat zaitun.”

⁴ Lepa nounoukungan malaika nenda, “Aponia katukolobat sangamberi nene, Tuan?”

⁵ Iageti aleginangan aku kaparerekat: “Ta pa nuagai?” Alegikungannia, “Ta kuagai Tuan.”

⁶ Malaika nenda masikoiniake aku bule kusegeake patonekat Tuhan nene ka tubut Zerubabel, “Ta kalulut gegetdra saladdu samba ron tubum aibara puuktungannu, tapoi sibara ka paroman ka ketsatKu le.

⁷ Pasailaat kele beunan leleu ka matam leu et turitsi te geti. Galainungan geti minca umangKu, samba kateteret nenda galakakenungan bukku sipuboiki ka kudduatnia, sangamberi sirimanua masisogaake geti, “Apa te lainge!”

⁸ Lepa geti akenangan minca si Tuhan patonekatnia bagei ka tubuku.

⁹ Kuanangan “Aigalakngakean bongen umangKu si Zerubabel, samba lepaakenangan leu te geti sangamberi pasigagalai UmangKu. Ke' alepaan pasigagalai UmangKu nenda, seseakerangan geti paamianKu Aku te sipasikoiniake ekeu Zakharia ka talagadra.

¹⁰ Aipoi kasei sipuarak gogoi sipuaaili sigoiso nene, muangka baga le sia geti masiitco bukku sipili ka Zerubabel. Si pitu alito iate pitu matat Tuhan sipasiitcoake sangaliot polak.”

¹¹ Lepa nounoukungannia minca ka tubunia, “Apa katukolobat ruangaloina zaitun sikuddu kai kattoet samba kai katsiu reret alito nenda?”

¹² Ialeu et apa katukolabat rua rubat zaitun kabebet rua pipat mas sipasigugurukake tulat zaitun nenda?”

¹³ Aleginangania, “Ta pa' nuagai?” Alegikungannia, “Ta kuagai Tuan.”

¹⁴ Ia leuet masikua, “Nenda iate rua sia sipilit Tuhan Taikamanua sibakkat manua samba polak samba sibailiu paguguletNia.”