Zakh. 3 - BUKO SIPUNENAN

Itcotmata sika epat: pagalaiat Imam Sabeu samba Sanitu

¹ Ka itcotmataku minca bagei, pakoinongnangan si Tuhan ka tubuku Imam Sabeu Josua ainia muririo ka matat malaikat Tuhan. Ka bebet Josua ai muririo sanitu simatarek masikau pasuksungan ka tubunia.

² Kuanangan malaikat Tuhan ka tubut sanitu, “Bule si Tuhan masiukum ekeu ale sanitu! Bule si Tuhan sipununtuki baga Jerusalem masiukum ekeu. Itco pei ta pa sirimanua nene kelean le loina silabokat siapeiakenen ka obengan.”

³ Aipurio sedda si Josua leppeinia simalolit.

⁴ Iageti kuanangan malaika nenda ka tubutdra sapaguguletnia, “Golok kam leppei simalolit nenda ka tubut sirimanua nene” Samba kuanangan leu et ka tubut Josua, “Jom akuribbaiakean, kuake le geti kekeu leppei sibau pupunen.”

⁵ Ia leu masiparentaake sapaguguletnia bule rasorotnake ka utet Josua sorot simalina. Reddetrangannia, kaurangan sorot utenia samba leppei sibau ka tubunia, ainangan malaikat Tuhan muririro masiitcoake sia.

⁶ Lepa segeakenangan tiboiet Tuhan malaika nenda katubut Josua,

⁷ “Kenureddet bai sangamberi surukatKu samba nugalaiake sangamberi galajet siakeKu katubum, oto riuriu tuake kekeu galajet masiuteake umangKu samba masipasikeli galaiakenen ka ulaunia. Arepikungan leu geti sangamberi panindogatnu, kele Kuarepi panindagatda samalaika ka bebeKu.”

⁸ Arepmake ale Imam sabeu Josua, ia leu et kam tai imam sibailiu paaleiakenennia, kam sangamberimui iate tularat gogoi simaeru ka sibabara. Kateteret nenda koiniakekungan te geti paguguletKu kuanenta “Silibetat”.

⁹ Bulatnia te kugalakngake ka matat Josua sara bukku sipitu tukdak kugalai geti surat simalainge. Ka bagat sangagogoi kuribbaiake le geti jot tobbou laggai nene.

¹⁰ Kebai aiailingan gogoi nenda, senen sirimanua masisogai geti pabebeakenennia lalep bule raoi masinanam aban samba arau baga ka talagat monen anggur samba sangamberi loinat sileumui.”