Zakh. 2 - BUKO SIPUNENAN

Itcotmata sika telu: pagalaiat tali pasikire

¹ Ka itcotmataku minca itcokungan sara simanteu sipasiukka tali pasikire.

² Nounoukungannia, “Kaipa nuei?.” Aleginangannia, “Mei masikire Jerusalem, “kuoba kuagai piga nanta samba liot laggai nenda.”

³ Lepa geti itcokungan malaika sipaninibo kaku, ibakkouake rerenia iei ka mata, samba malaika bagei mei masiailiakenia.

⁴ Malaika siboki masikua katubut malaika sika rua, “Kenan kam simaruei ka tubut silainge nenda, samba kua kamatania maoongkip te geti Jerusalem kopet igit sirimanua samba tarimeu bailiu taioinangan tugalai irip laggai sigoiliknia.

⁵ Amupalelekngan si Tuhan, Nia le ibailiu geti irip laggai kele obengan sipujujuluu masigoilik laggai nenda ijagonia samba pukuddunangan leu sedda ka bagat sangamberi gege samba pubebeunanNia.”

Sangamberi sirimanua siribbaiakenen tusogai ratoili

⁶ Kuanangan si Tuhan ka tubut paamianNia, “Aku pasabungan kam ka sangamberi matat rusa. Tapoi kineneiget katuitui kam ka Babilonia

⁷ Ale sangamberi sirimanua siribbaiakenen katuitui kam ka Babilonia samba toiliake kam ka Jerusalem.

⁸ Kasei sipasisaggangi kam, aisaggangi le kilibet bagaKu.” Iate lulunia Tuhan Sipulugege aikoiniake aku masisegeake patonekat nene ka sangamberi bangsa sipasiraraurau paamianNia,

⁹ “Sarania si Tuhan le masisaggangi geti kam! Sia paguguletmui siboiki sipususum ka tubumui bailiu geti sipasirarau kam. Ke amuailingan sangamberi nenda, agaimuian te geti Tuhan Sipulugege le amasikoiniake aku.”

¹⁰ Kuanangan si Tuhan, “Puurai kam sialei gorat baga, ale sipulalaggai ka Jerusalem! Momoi te Aku mukuddu ka talagamui!”

¹¹ Kateteret nenda maigi le bangsa siooi ka tubut Tuhan addeat ibailiu paamianNia. Mukuddu le Nia geti ka talagamui, samba agaimuian si Tuhan le amasikoiniake aku ka tubumui.

¹² Samba iala le' geti Jehuda si Tuhan bailiu bakkatNia ka polak sipunenan, samba Jerusalem ibailiu te geti laggai kilibet bagaNia.

¹³ Pulelek kam tubumui sangamberimui ka matat Tuhan! Kalulut amoian poi si Tuhan barania ka kudduatNia sipunenan.