Zakh. 14 - BUKO SIPUNENAN

Jerusalem samba bangsa-bangsa

¹ Amalegrengan te gogoi pasiukuman Tuhan. Iageti parauraugirangan Jerusalem samba sangamberi sirauraura nenda parubeirangannia ka matam.

² Ruru'akenangan te geti si Tuhan sangamberi bangsa bule rasaggangi Jerusalem. Laggai nenda geti raoppu, sangamberi lalepra tuparauraugi samba sia tainanalep ka laggai nenda rapaeleti. Sitenga ka sipulaggaijinia tuambit sia ka kudduat katuribbaiat, tapoi legeinia mukuddu le geti ka laggai nenda.

³ Lepa ei si Tuhan pasaggak masisaggangi bangsa-bangsa nenda, kele sigalaiNia ka teteret siburu.

⁴ Ka gogoi nenda purionangan geti ka leleu Zaitun, ka isit kabelaiat sulu Jerusalem. Iageti masila'nangan leu leleu Zaitun kalulut su'su simalio, barania ka kabelaiat sulu teret ka kabelekat sulu. Iletalagat leleu nenda turitci le ka bare, samba iletalagania minca ka kaiaman.

⁵ Putuituimuian te ka su'su sirubei leleu nenda ibailiu rua. Putuituimuian te kele taikebbukatnu kateteret aibara teteu kateteret pamarentaat Uzia, rimata Jehuda. Lepa oi si Tuhan Taikamanuangku, rapaalei le nia samalaika.

⁶ Kebai iaili gogoi nenda, taan te geti babara minca gogoi simaleppet ele es.

⁷ Ka gogoi nenda ta'an babara minca pugepgeman. Gogoi sarat mutorongan le, ia leuet kateteret sinoibo. Tapoi Sarat si Tuhan le iagai teterenia iaili gogoi nenda.

⁸ Ka gogoi nenda, oinan purimanuaiat muguguruk te geti barania ka Jerusalem; iletalaga oinan nenda muguruk le ka Koat Simamatei samba iletalagania minca ka Koat Tenga. Oinan nenda muguruk le nia ka sanganantat rura, kateteret simaurat samba leu ka legeu.

⁹ Iageti si Tuhan muparenta leu sibailiu rimata ka sangaliot polak. Senen sirimanua masipanindogiNia sibailiu Taikamanua samba masiagaiNia ka oni simakere.

¹⁰ Sangalio tobbou laggai barania ka Geba ka bare teret ka Rimon ka kaiaman ibailiu le geti simagaktuk. Tapoi Jerusalem musubbulat geti, sisaliu buak polak ka bebenia. Laggai nenda malilio geti barania ka matatbaliu Benjamin teret ka matatbaliu Sudut, iate kudduat gugurukat siboiki samba barania ka Menara Hananel teret ka kudduat pasipionan anggur bakkat rimata.

¹¹ Sangamberi sirimanua mukuddu le sia geti ka bagat aban ka laggai nenda, ta'an anai sipamamatei kalotoakenen.

¹² Ibaraake le geti si Tuhan besi sikatai ka sangamberi bangsa sipasisaggangi Jerusalem. Mata samba jalaira, kisedda leu sangaliot tubudra mabute geti kananen ai peile sia muririmanua.

¹³ Ka gogoi nenda, igalai te geti si Tuhan bulat maingo samba maloto sangamberi bangsa bailiu senen sirimanua masilaba aleinia sikukuddu ka bebenia samba sagganginangannia.

¹⁴ Sangamberi taimanteu ka Jehuda pasaggak le geti sia addeat masiropmake Jerusalem. Sibailiu bibilet rauraugetdra alarangan sangamberi pukayoat sangamberi bangsa ka bebera kele mas, perak samba bibilet sipususukra.

¹⁵ Sara besi simapali' leu iorak kuro, bagal, unta samba kaliddei samba leu sangamberi tarimeu ka pusapougatdra tai saggak.

¹⁶ Lepa geti sangamberi sirimanua sipuririmanua ka talagat sangamberi bangsa sipasisasaggangi Jerusalem, mei sia ka laggai nenda bule masipanindogi Rimata, Tuhan Sipulugege, samba bule masiabeuake Punen Sapou Buluk.

¹⁷ Kebai ai bangsa sitaioba mei ka Jerusalem addeat manindou ka Rimata, Tuhan Sipulugege, iageti ka tobbou laggainia ta'an bebele urat.

¹⁸ Kebai tai Misir taraoba mesiabeuake punen Sapou Buluk, iageti oraknangan leu sia besi sibaraakenen Tuhan ka tubut senen bangsa sitaioba mei ka parurukat.

¹⁹ Iate ukuman katubutda tai Misir samba ka sangamberi bangsa sitaioba masiabeuake punen Sapou Buluk.

²⁰ Ka gogoi nenda sangamberi jijining ka leppei kuro rasuratnake sara tiboiet “Tukokoiake addeat kai Tuhan.” Sangamberi panci ka uman Tuhan rasuru' geti kele sangamberi mangko panguruat ka matat kudduat pasibuluat.

²¹ Sangamberi panci ka Jerusalem samba ka sangalio Jehuda tukokoiake le geti ibailiunia bakkat Tuhan Sipulugege. Sipulaggai sipanguruatnake buluakenen pakeirangannia geti bule ragokgok akkula sipanguruatakenen. Kebai aiailingan teterenia nenda, ta'an te babara sipasisasaki ka uman Tuhan Sipulugege.