Zakh. 13 - BUKO SIPUNENAN

¹ Kuanangan si Tuhan Sipulugege, “Ka gogoi nenda mubura te geti sara bubuakat bule ipalina sapunuteteu David samba sipulaggai ka Jerusalem ka jo samba sigalaiakenendra pasibubuluiji sabulungan sigalaiakenendra.

² Ka gogoi nenda Kutata'ake le geti onin sabulungan ka polak nene, pat beringan sara sirimanua sirepdepnia. Sangamberi sirimanua sikau tubunia nabi Kututuituiake le geti pasamba leu sia, siguruki ketsat sikatai.

³ Keai pei le geti sia sikua tubuna, sisegeake patonekat Tuhan, ukkui samba inania te geti masikua ka tubunia, bui ta tuukumake ukuman matei, aipoi sitiboakenennia ia te boko le. Kebai ikau tubunia sibailiu nabi leuet, punurangannia ukkui samba inania teret matei.

⁴ Ka gogoi nenda, sia tai nabi bara geti ailatdra masienungake galajet punanabi. Taan te raleleppeiake leppei nabi addeat mupatajuat samba masiatciake sangamberi puitcot matadra.

⁵ Bailoknia minca, kuadrangan, ‘Aku ta nabi. Aku sipumomone le sipugagalai ka mone ka ujut puririmanuangku.’

⁶ Samba kebai ai sia sipanonounou ka tubunia, ‘Siorangan apa nenda karu'ru'katnu?’, aleginangannia, ‘Iate mauju siorak aku ka lalepdra saaleiku.’ ”

Parenta masimateiake sipasijajago sikoiniakenen Taikamanua

⁷ Kuanangan si Tuhan Sipulugege, “Ale lanjau suruake ekeu, samba saggangi sipasijago sipugagalai ka tubuKu! Mateiakenia, iageti pusabunangan sangamberi biribiri. Saggangingkungan leu et paamianKu,

⁸ samba ka sangamberi laggai rua pertelu sipulaggaijinia sappru tumateiake.

⁹ Sarat sara pertelungan le tupaarau geti. Kupalina le sia geti kele perak silatcatnakenen obengan. Kusibo le geti sia kele sara sipasisibo mas. Lepa panindourangan geti katubukKu, samba alegikungan sia. Kuakungan katubudra, sia iate paamianKu samba sia leu et masimunengake, Aku te Tuhan Taikamanuandra.”