Zakh. 12 - BUKO SIPUNENAN

Katuaraugat Jerusalem

¹ Nene te patonekat Tuhan pagalaiat Israel. Tuhan sigalai manua, sigalai polak samba leu siake purimanuaiat ka sirimanua, masikua,

² “Kugagalai te geti Jerusalem kele pulokat sibara suat anggur; ka bagania sangamberi tobbou laggai pabebeakenennia lo'rangannia geti samba pare're'nangan leu sia kele sirimanua simapuineng. Kebai aragoilikngan raalounia Jerusalem, kisedda leu te raalou sangamberi laggai sipulelegei ka tobbou Jehuda.

³ Ke' iailingan gogoi nenda, galaikungan te geti Jerusalem kele bukku simasane'. Ke' ai bai bangsa sibara kaipa pa' masisibo masiakkatnake bara le geti mauju' simalabbu. Sangamberi bangsa ka polak musara geti bule rasaggangi Jerusalem.

⁴ Ka gogoi nenda sangamberi kuro' kukau maingo samba sipukukuro' Kubailiuake sia siroro', sipulalaggai ka Jehuda geti Kujago le, tapoi sangamberi kurora tai saggak kugalai imapeset.

⁵ Lepa sangamberi muntogat Jehuda masikua kapaatuatdra, “Si Tuhan Sipulugege le sipasikakau puroron ka paamianNia sipulelegei ka Jerusalem.”

⁶ Ka gogoi nenda sangamberi muntogat Jehuda kubailiuake geti kele obengan ka silabbukat loina purusu ele kele solo sipuobek ka tei rurukat siperakat gandum. Rapasubu le geti sangamberi bangsa sibokko sia. Tapoi sipulaggai ka Jerusalem riuriu le rapukuddu ka laggai ka bagat aban.

⁷ Aku, si Tuhan, masiboikiake masikau geti kamanangan ka saladdudra tai Jehuda, bule pubebeunan sisilot punu teteu David samba sipulaggai ka Jerusalem ta isaliu pubebeunandra ka Jehuda sabagei.

⁸ Ka gogoi nenda kunemingkungan geti sipulaggai ka Jerusalem, samba bulat sitaioi tubu ka talagatdra ibailiu te geti kele ron tubut David. Palulurangan te geti sapunuteteu David kele ipupasikelat MalaikaKu, kele Kupupasikelat.

⁹ Ka gogoi nenda kusubuake te geti senen bangsa sisibo masisaggangi Jerusalem.

¹⁰ Iageti sapunuteteu David samba leu sipulaggai ka Jerusalem Kukau le geti paatuat sioba mununtu baga samba sioba manindou. Puletceirangannia geti sipunundra nenda samba rasoibinia kele sirimanua sipugegeri masisoibi kamateiat toga si sasara. Pugerirangan geti kopet reureu bagatdra kele sirimanua sisoibi katatakat toga sikebbukat.

¹¹ Ka gogoi nenda babara le geti geri simalabbu ka Jerusalem kele geri katubut Hadad-Rimon ka su'sut Magido.

¹² Iageti senen sipulalalep ka laggai nenda mugeri le geti sia senenda: lalep sapunuteteu David, lalep sapunuteteu Natan,

¹³ lalep sapunuteteu Lewi, lalep sapunuteteu Simei samba sangamberi sipulalalep bagei.

¹⁴ Senen lalep geti mugeri, samba sangamberi taimanteu ka senen lalep sipugegri rasaraake tubudra ka tai tainanalep.”