Zakh. 11 - BUKO SIPUNENAN

Kabebele'ra sipuute sikatai golu'

¹ Ale, Libanon, buka'akean matatbaliunu, bule obengan ipalaboki sangamberi loina arasnu!

² Ale, loina daru, pugeringan, aipoi amaibungan loina cemara, loina simaron amabukkatnan. Ale sangamberi loina sabeu ka Basan, pusou kam, aipoi sangamberi bakkat loina simalio amabaoian aitugarat.

³ Arepmake le geritdra sangamberi sipuute' sibaragege, Atata'an pubebeunan tiboi tubudra! Arepmake rou singa ka bakkat loina aipoi amakataian te kudduatdra ka sanganantat bagat oinan Jordan.

Rua sipasijajago

⁴ Kuanangan si Tuhan Taikamanua katubukku, “Galaiake ekeu nene kelean le ekeu sipasijago sijago biribiri jajaket.

⁵ Sia sipasisasakinia masimateiake sangamberi biribiri nenda ta anai bagai bagadra katai pamamateira. Sipasisakiake akkulat sangamberi biribiri nenda masikua, “Umun si Tuhan! Kineiget ituppai le kayotta!” Sipasijajago nenda beringan nuntut bagadra ka sangamberi biribiri pasikelietdra.

⁶ Taan kuoba minca kupununtuki baga kasei pa ka tobbou laggai nene. Aku saraku masisege'ake te geti sangamberi sipulaggaijinia katubutda saute. Sia nenda pakatairangan geti laggai nene, samba ta'an kuoppu minca ka kabeira.”

⁷ Aku, si Zakharia, lepa geti sia sipasisakiake biribiri rapupaiji aku bule kupasijago biribiri jajaket. Tutura'ku ai rua; siboiki kuoniake “Aggai baga” samba sikarua “Aapra.” Lepa taddaakekungan masijago samba masipasikeli biribiri nenda.

⁸ Ai sia telu sipasijago sipulagaki aku baga rasapruake om bagaku. Tuituiakekungan sia ka bagat sangalaggo.

⁹ Lepa geti kuakungan ka tubut mungkuat biribiri nenda, “Taan kuoba minca masijago kam. Simateu matei eddangannia imatei, samba simateu tata edangannia itata. Iageti sipulelegei momoi le rapamatei katubu.”

¹⁰ Iageti tutura oniakenenku “Anggai baga” nenda kuala samba kubakbakngake bule ta ipuriuriu itugalaiake palelengan sigalai Tuhan pasamba sangamberi bangsa.

¹¹ Ka gogoi nenda leu palelengan nenda ta'an turiuriuake. Sia sipasisasakiake biribiri nenda masiitco'ake aku, samba raseseake si Tuhan ainia maninibo ka sangamberi si galaiakenenku.

¹² Kuakungannia ka tubutdra, “Kebai pasese ka bagamui ale tuan-tuan, akemuian leu upaku. Ke taa, pa'an boiki.” Lepa akerangan telu pulu perak.

¹³ Kuanangan si Tuhan katubukku, “Kau bulagat nenda kabagat peti umangKu.” Oto kaukungan telu pulu bulagat perak nenda ka bagat peti Uman Tuhan. Sarat kele igit nenda pususura'ra ka tubuku!

¹⁴ Pasat nenda bakbakngakekungan tutura'ku sikarua iate oniakenenku “Appra”, iageti maragatnangan pusaraat Jehuda samba Israel.

¹⁵ Iageti kuanangan si Tuhan katubukku, “galaiake le minca ekeu nene kele'an le sipasijago biribiri, tapoi kineneiget galaiake le kele sipasijajago sitaimaeru.

¹⁶ Bulatnia te Kuririroake' sipasijago bule ijago mungkuat biribiriKu, tapoi tak ipuletcei biribiri simalilimai, tak igagaba biribiri simasasaigo, tak leuet ilalaggek biribiri sibara siorangan, samba tak ikakau kan biribiri sipuririmanua peile. Bailoknia, sarania le masipakomi akkulat biribiri simamo'mo' samba patoktoknangan sulet tarimeu nenda.

¹⁷ Tutelei le sipasijago sita' paluluat nenda! sikaddiuake mungkuat biribirinia. Pasaggangan geti masikappluake pugegeatnia. Parania geti ibailiu masaggo samba matania kai kattoet ibailiu mapeset.”