Zakh. 10 - BUKO SIPUNENAN

Palelengan Tuhan ipaarau geti PaamianNia

¹ Ke iailingan teterenia gogoi tutaddaake pangureman, tiddoumuian urat kai Tuhan. Ia geti ruru'akenangan leu si Tuhan tanai rusa simainep samba akenangan leuet urat simatirit bailiunangan sangamberi mone malibbut samba masa'sa le ka sangamberi sirimanua.

² Sangamberi sirimanua sieei masitiddou enungan ka tubutda sabulungan samba ka tai kerei, tapoi alegiet sisilo'ra iate tiboiet pabokoat samba leu tiboiet sitapaluluat le. Ai sipasikokolouake pangamutet, tapoi sangamberi katukolobat siake'ra sarat sipapepe kam le, samba pusuibiat siakenia taanai katukaunannia. Kalulut nenda masaragai le rakyat kele biribiri. Mangorik lesia kalulut taanai sijago sia.

³ Kuanangan si Tuhan, “Bulat magolu le aku ka sipuute sipasipaparenta paamianKu, samba sia geti kuukum le. Tapoi sipulaggai ka Jehuda sia te bakkatKu, samba Aku, Tuhan sipulugege masipasikeli geti sia. Kubailiuake te geti sia kuro pasaggak simaron tubu kaku.

⁴ Ka talagatdra geti Kupilih le siukkaake gege, sipuut, siute'ake saladdu siparentaake geti paamianKu.”

⁵ Sipulaggai ka Jehuda mamanang te geti sia kelean le loti ka enungan rapaperaki tai saggakra. Pasaggak le sia kalulut Aku, si Tuhan, masirop sia, samba sangamberi tai saladdu saggakra sipukukuro' rakakalaake le geti.

⁶ “Kuparon le geti sipulaggai ka Jehuda, paamian Israel geti Kupaarau le. Kuambit le sia ratoili minca ka tobbou laggaira kalulut manuntu poi bagaKu ka tubutdra. Kuaddeake le sia kele sara bangsa si taanai puseleat. Aku te si Tuhan Taikamanuandra, sangamberi panindogatda leu Kupuletsei le geti minca.

⁷ Paamian Israel kele sipasasaggak simagege, kele sirimanua sipulo anggur, rapuangka baga. Reddenanda barania ka sara tetere aili ka tetere bagei ta rakakalipogi kamanangan sikauKu nene. Muangka baga le sia kalulut sigalaiKu ka tubutda.

⁸ PaaminKu kusogai le geti samba kururu'ake le sia rapusara ibailiu sia sara bangsa. Ku ujaake le sia samba kugalai igitdra kele siboiki.

⁹ Kenanen Kupasaragai sia ka talagat bangsa-bangsa, sedda leu mariuriu le rarepdep Aku. Maarau le sia, kisedda leuet tatogatdra samba toili le sia simakere ka tobbou laggaira.

¹⁰ Barania ka Misir samba Asyur, Kutoiliake le geti sia. Ka tobbou laggaira saratdra kupauddet sia. Kuambit le sia minca ratuguru' ka Gilead samba ka Libanon, bailiu sun sangalio tobbou laggai sarat sia.

¹¹ Kebai ratalipoki koat pugejaat baga, Aku, te Tuhan, masibobobo' sangamberi lektuk onu; iageti saisai bagat oinan Nil bailiu magaraknangan. Bangsa Asyur simabuak paatuat tuparepe le geti samba Misir simaron tubu tata' mapepe le geti gegenia.

¹² Kuparon le geti paamianKu, mareddeddrangan samba muuku baga ka tubuKu. Kisedda te ngangan Tuhan.”