Ur.Sab. 8 - BUKO SIPUNENAN

¹ O, ke sarainangku simanteu bai ekeu, sitottoni tottot inangku, bulat kusisigguk le ekeu ke kuaili ekeu ka enungan, samba ta'anai sirimanua sipalololoi aku!

² Palulukungan samba abbitkungan ekeu ka lalep inangku, bule nugelaiake aku. Akekungan lo'nu anggur simasingin, samba suat buat delima.

³ Kabeinia sikatciu ai ka tei uteku, kabeinia sikattoet masilakkaiake aku.

⁴ Kusupaake kam, ale tainanalep Jerusalem, ta nugegeugeu kam nuntut baga, teret isege bagania.

Urai sikaenem

⁵ Kasei pa nia sibabara ka simatangeu, sipuaaddai katubut simanuntu bagania? Suruakekungan ekeu ka tei loinat apel, sedda teaiuruketake ekeu inam samba aitu'tuake matam.

Sinanalep

⁶ Bailuake le aku buat patuatnu, bui' nulakkaiake kasei pa ke ta aku, kalulut nuntu baga nenda kele ron kamateiat, samba kiddit baga kele laggaira taikabaga. Julunia kele julut obengan, kele juluu obengan Tuhan!

⁷ Oinan simigi ta momoi masipeake nuntut baga, samba eba ta momoi iloulouakenia. Ke sara sirimanua masiake sangamberi pukayoatnia isaki nuntut baga, bulat paloloiat le siloketnia.

Talimouakenen sinanalep samba baginia

⁸ Ai sara bagimai sinanalep, magoiso peile tottotnia. Aponia galaiakenenmai katubut bagimai sinanalep kateteret ratunanganakenia?

⁹ Ke irip bukku bai nia, rioakemaian tobat perak ka uddutnia, ke matatbaliu bai nia, kaumaian lelelekkrenia loinat aras.

¹⁰ Aku nene iate sara irip bukku, samba tottotku pujagoatnia. Ka matania, kateteret nenda aku kele sirimanua sisese puuktungan.

Simanteu

¹¹ Si Salomo ai monen anggurnia ka Baal-Hamon, mone nenda aikauan katubutda sipasijago. Sene-senenda masilului sangaribu bulagat perak puuktungannia.

¹² Monen anggurku, bakkatku, ai kamatakku, rubeiatnu le sangaribu nenda, Rimata Salomoo, samba rua ngotu ka sipasijajago monem.

¹³ Ale sikudduiji mone, raoba saalei masiarep ngangam, paarep le katubukku!

Sinanalep

¹⁴ Olaake, simanuntu bagakku, kau le tubum kele kijang, ele kele togat simatsura ka uddut leleu siureman pusinginan.