Ur.Sab. 7 - BUKO SIPUNENAN

Simanteu

¹ Apate laingen bakkounu nupakei kasum nenda, sinanalep sipupatuat simalina! Leingut tengam kele pulaingean, sigalai kabei siagai mugalai urai.

² Pusounu kele pulokat simamuine, sitaitatata anggur simagalu. Balugunu kele gandum sitobbouakenen, sikekre paogo-ogo kainau.

³ Tottonu kele rua togat simatsura, kele togat kijang sirua.

⁴ Lolokkatnu kele pujagoat bat matam kele kolam ka Hesybon, ka bebet matatbaliu Batrabim. Asaknu kele pujagoat ka leleu Libanon, simatai ka laggai Damaskus.

⁵ Utenu kele leleu Karmel, alainu siappra simasurau tubu, simaala bagat rimata.

⁶ Bulat malainge tubum, ale pununtukiet baga ka sangamberi obaket.

⁷ Putubuatnu kele laingen loinat korma samba tottotnu totoat buania.

⁸ Kuakungannia, “Makiddi kabagaku masikarai loinat korma nenda, samba masirape totoatnia. Bule tottotnu kele totoat buat anggur, samba engam kele singin buat apel.

⁹ Putitiboatnu mananan kele suat anggur!”

Sinanalep

¹⁰ Aku sibakkat simanuntu bagakku, nia masikiddi aku.

¹¹ Konan, simanuntu bagakku, mei sita ka polak simalio, mugogoi katalagat ogo pacar!

¹² Konan, mei sita simanseman ka monen anggur samba masiitco amusibotcoan leu pa anggur, aingangaan leu pa sibotconia, amusibotcoan leu pa delima! Sedda te kuaake nuntut bagakku katubum!

¹³ Loina arak simasingin, ka bebet matatbaliuta ai senengamata bua simananam, siappek siburu samba sibau. Akukoiriakean nenda kekeu, simanuntu bagakku!