Ur.Sab. 6 - BUKO SIPUNENAN

Tainanalep

¹ Kaipa aiei simanuntu bagam, ale simalainge tubu katalagatda tainanalep? Kaipa aiei simanuntu bagam, bule tagaba kamnia sambatta?

Sinanalep

² Simanuntu bagakku ameiannia ka monenia, ka mone pusinginan masijago biribiri ka mone, samba masiappek ogo kainau.

³ Aku bakkat simanuntu bagakku, samba nia bakkatnia, nia masipasikeli biribiri ka talagat paogo-ogo kainau.

Urai sikalima

⁴ Malainge ekeu, simanuntu bagakku kele laingen laggai Tirzah, kele laingen laggai Jerusalem. Bulat maala bagatta, kele mungkuat saladdu pasamba benderatda.

⁵ Pisikake matam katubukku, kalulut ipaingo le aku numattai aku. Alainu kele mungkuat kambing sigorosoni leleu Gilead.

⁶ Sotnu mabulau kele mungkuat biribiri, sisimaruei tusapu samba turau, sipaalei kele biribiri sirua toga, ta'anai berisara simapepepe.

⁷ Bailatnu kele iluk buat delima, malipput ka beliu tabbot matam.

⁸ Kenanen ai enem pulu sinanalep rimata, samba balu pulu sinanalepnia kabebe, samba taiokko simakope igi,

⁹ tapoi sara le ngorutku, repdemenku, toga sisasara kilibet bagat inania. Taiokko masiitco samba masiumunnia, tainanalep rimata samba tainanalepnia kabebe masiumunnia.

¹⁰ Kasei nia sioi kele ibela matatsulu, malainge kele laggo sabeu mutoro kele sulu, kele mungkuat saladdu pasamba benderatda?

¹¹ Moi aku tugorosot ka monen kenari, masiitco sibotco ka peleu leleu, masiitco amusibotcoan leu pa anggur samba loina delima.

¹² Bulat makiddi bagakku nuntut bagam, kele kukiddi kukudduiji kereta pasaggakda siabeu tiboi tubu.

Tainanalep

¹³ Puturuan, ale okko Sulam, Patopoi tubum, bule kuumunake katubut ekeu! Angoi nuoba masimattai siokko Sulam, kele nuinco turut saggak?