Ur.Sab. 5 - BUKO SIPUNENAN

¹ – Moi aku ka monengku, bagikku, talimouakenenku, kururuake mur samba pusinginanku, komkungan rumun mani samba suat maningku, lokungan angggur samba susukku.

Kiddiet bagat talimouakenen sinanalep

² Perep aku, tapoi mumata le patuatku. Arep pei, simanuntu bagakku kupaloklok matatbaliu. “Bukaake matatbaliu, bagikku, simanuntu bagakku, ngorutkku, kilibet bagaku, kalulut asutan tinobut ka utekku, samba alaiku asutan lolo sinoibo!”

³ Akugolokan leppeiku, kupapakei pa minca? Akubuian rerekku, kupalololit pa minca?”

⁴ Simanuntu bagakku masikau kabeinia ka lobok matatbaliu, pugeretnangan leu patuatku.

⁵ Suru aku masibukaake matatbaliu ka simanuntu bagaku, pubaibainangan mur ka kabei samba ka singongaiku masuanangan ukkapet lelekkret matatbaliu.

⁶ Bukaakekungan matatbaliu ka simanuntu bagakku, tapoi amutuituian simanuntu bagakku. Kele sikalapui aku kateteret aimapepe. Gabakkungannia, tapoi ta akusesenia, sogaikungannia, tapoi ta aialegi.

⁷ Seserangan aku sipasijajago laggai, bobo'rangan aku samba besikirangan aku, rauraurangan salendangku sia sipasijajago irip laggai.

⁸ Kusuppaake kam, ale tainanalep Jerusalem, ke nusese bai kam simanuntu bagakku, paagai kam katubunia, mangelei bagakku!

Talimouakenen sinanalep masiumun talimouakenen simanteu ka matatda tainanalep Jerusalem

⁹ – Malainge peile pa simanuntu bagam ka simanuntu bagatda sabagei ale siokko bulat simalainge tubu? Aponia atciakenennu ka simanuntu bagam nupabele sia sabagei ka simanuntu bagatda, pat suppaakenungan katubut kele kisene?

¹⁰ – Simanuntu bagakku simalainge tubu, simakoinong ka talagatda sangaribu sirimanua.

¹¹ Utenia kele mas, mas simakirisau, alainia makoilut, mapusu kele segguk.

¹² Matania kele ngorut ka bubuakat oinan, murau ka bagat susu, mukuddu ka bebet kolam.

¹³ Bailatnia kele monen pusinginan simasingin, bibonia ogo kainau sibaibaiake mur simaeru.

¹⁴ Kabeinia malainge, sipusipsip mas pulaingean permata Tarsis, tubunia sitularani sibara ka bat, sigaraiji bukku nilam.

¹⁵ Rerenia iate arigit marmar simabulau, murio ka apot mas simakirisau. Putubuatnia kele leleu Libanon, kele paloina-loina aras sipili.

¹⁶ Bulat mananam putitiboatnia sangamberi katubunia maala bagatta. Kisedda te simanuntu bagakku, kisedda te aleiku, ale kam tainanalep Jerusalem!