Ur.Sab. 4 - BUKO SIPUNENAN

Talimouakenen simanteu masiumun talimouakenen sinanalep

¹ Itco pei, laingem, simanuntu bagakku, bulat malainge ekeu! Matam kele matat ngorut ka beliu kekret matam. Alainu kele mungkuat kambing sigorosoni leleu Gilead.

² Sotnu kele mungkuat biribiri sisapu sibau, sibebela ka kudduat pasibuijat, siputu'tutu mata sirua sangamberinia, ta anai sitaiputotoga.

³ Bibom kele sara pita simabonan, samba malainge ngungum. Bailatnu kele iluk buat delima, ka beliu tabbot matam.

⁴ Lolokkatnu kele pujagoat David, sigalai kudduat pangoirikat pamatei. Sangaribu korabbi mutoak katubunia sangamberinia bobo'bora saladdu simagege.

⁵ Tottotnu kele rua togat simatsura, kele togat kijang sirua sipukokom parou katalagat ogo kainau.

⁶ Kepei muboroi rusa kasoibokat samba imapepe sangamberi ailiggou, aiobaku mei ka leleu Mur samba ka leleu kumanyang.

⁷ Bulat malainge tubum, simanuntu bagakku, ta'anai katai katubum.

⁸ Gorosotake ekeu nuoi katubukku baram ka leleu Libanon, talimouakenenku, Konannan katubukku baram ka leleu Libanon, gorosotake ekeu baram ka uddut leleu Amana, sibara ka uddut leleu Senir samba Hermon sibara ka ngaliu kudduat singa, sibara ka leleu kudduat singa simagurik.

⁹ Ekeu masipaala bagakku patuatku, bagikku, talimouakenenku, nupaala bagakku ka pasiitconu, pasamba pulaingean inu simalainge ka lolokkatnu.

¹⁰ Apate nanam nuntut bagam, bagikku, talimouakenenku, bele peile nanam anggur ka nuntut bagam, samba masingin peile tulam ka senengamata pusinginan.

¹¹ Mananan putitiboatnu, talimouakenenku, kele suat mani simaeru samba susu, samba leppeinu kele singin leleu Libanon.

¹² Simanuntu bagakku iate mone situpapatpat, mone situpapatpat samba bubuakat oinan situluluplup.

¹³ Sangamberi sinulam sibailiu mone loinat delima simananam bua, ogo pacar samba narwastu,

¹⁴ narwastu samba kiniu, kole samba loina simananm ka senengamata loina kumanyang, mur samba simoite, samba leu senengamata pusinginan sipili.

¹⁵ Ale, bubuakat oinan ka mone, bakkat oinan sipuririmanua, sipuguguruk sibara ka leleu Libanon!

Patekak sambatda ka rua siputatalimou

¹⁶ Suruake ekeu, ale rusa bare, samba konannan, ale rusa sikaiaman, puboroiat ka monengku, bule imasingin pusinginannia! Bule moi simanuntu bagaku ka monenia samba ikom buania simananam.