Ur.Sab. 3 - BUKO SIPUNENAN

Besiakenen talimouakenen sinanalep

¹ Ka sinoibo, ka peremanku ka pangamutetku kugaba simanuntu bagakku, gabakkungannia, tapoi siboboi, sogaikungannia, tapoi ta aialegi.

² Koba tusuru samba masibokko laggai, masigejengi sangamberi enungan samba polou. Kugabania, simanuntu bagakku, gabakkungannia, tapoi ta akusesenia.

³ Ailiakerangan aku sipujajago ka laggai samba rerekungan sia, “Taleu anuinso kam simanuntu bagakku?”

⁴ Simaruei le akukaddiuake sia, sesekkungan simanuntu bagakku; ukkuaakekungannia, samba ta kuobaake pat abbitkungannia ka lalep inangku, ka bilik pututukat matakku.

⁵ Kusuppaake kam, tainanalep Jerusalem, ka onin kijang ele ka onin simatsura sinanalep ka polak simalio: bui' nusuruake kam samba nugeugeu kam nuntut baga ke ta'pei asege bagania!

Mungkuat talimouakenen sipatutut

⁶ Aponia nenda siooi sibara ka simatangeu, kele kujuk simakeppu? Singinnia kele mur samba kumanyang, samba singin senengamata bada' sibara ka sipasisasakiake.

⁷ Itco iate jolit Salomo, sibokko enen pulu sia simagege, tai Israel simagege.

⁸ Sangamberitda masiabbit lanjau, simaagai pasaggak, sene-senenda ai lanjau katenganda kalulut kalotoakenen sinoibo.

⁹ Si Salomo masigalai ka sia sara pasibairatnia sibara ka loina Libanon.

¹⁰ Galainangan ariginia sibara ka perak, tukkenia sibara ka mas, tubut korosinia simalebbe, rubeiat ka baga tupalainge pasamba loina arang. Ale taiokko Jerusalem.

¹¹ Belaake kam, ale taiokko Sion, itco kam Rimata Salomoo pubebeunan sikau inania katubunia ka gogoi putalimougatnia, ka gogoi puangkakat bagania.