Ur.Sab. 2 - BUKO SIPUNENAN

¹ Ogo mawar sibara ka Saron le aku ogo kainau ka sangamberi peleu leleu.

² – Kele ogo kainau katalagat sese simarui, kisedda te simanuntu bagakku katalagatda taiokko.

³ – Kele loina apel katalagat loina ka leleu, kisedda te simanuntu bagakku katalagatda tailainge. Mangka bagakku mukuddu katubunia, mananam buania.

⁴ Abbitnangan aku ka lalep pupunenan iitco aku simasun nuntut baga.

⁵ Ronake le aku ka buat anggur simananam, arauake le aku ka buat apel, kalulut mangelei bagakku.

⁶ Kabeinia sikatciu masitukke aku, kabeinia sikattoet masilakkaiake aku.

⁷ Kusuppaake kam, ale taiokko Jerusalem, ka onin simatsura samba kijang-kijang ka polak simalio, bule ta nugegeugeu kam nuntut baga, teret isege bagania.

Ka matatbaliu talimouakenen sinanalep

⁸ Arep pei! Simanuntu bagakku! Itco pei, amoiannia, Ipajakjak tubunia ka uddut leleu, Ipaattat tubunia ka tinambu.

⁹ Simanuntu bagakku kele kijang, ele kele togat simatsura. Itco pei, ainia muririo ka beliu rupitta, ainia masigagaba samba ainia masitataiko ka lobok jandela.

¹⁰ Taddaakenangan manibo simanuntu bagakku katubukku, “Suruake ekeu simanuntu bagakku, konannan, simanuntu bagakku!

¹¹ Itco, atusabauan tetere simaleppet, atusabauan gogoi simaurat.

¹² Amatoilaan paogo-ogo ka mone, aiailingan gogoi pasigetaiat, nau pisaksak amaarepan ka polakta.

¹³ Loina ara aitaddangan mubua, samba sibotcot anggur masingin ituping. Surungan, simanuntu bagakku, konannan, simanuntu bagakku!

¹⁴ Ngorutku ka polou bukku, pulippunannia ka gilak leleu, lelekake pei pumataatnu! Paarep pei ngangam! Kalulut malainge ngangam samba malainge pumataatnu!”

¹⁵ Lalau pei lamasek nenda, lamasek sigoiso, sipakatai monen anggur, monen anggurmai sipubobotco!

¹⁶ Simanuntu bagakku bakkatku, samba aku bakkatnia sipasijajago biribiri ka talagat ogo kainau.

¹⁷ Kepei muboroi rusa kasoibokat samba imapepe sangamberi ailiggou, toiliake ekeu, simanuntu bagakku, kau le tubum kele kijang, ele kele togat simatsura ka leleu Beter.