Ur.Sab. 1 - BUKO SIPUNENAN

¹ Urai Sabeu sigalai Salomo.

Talimouakenen sinanalep samba tainanalep Jerusalem

² – Sigguk le aku ka nuntut bagam, kalulut nanam nuntut bagam bele peile nanam anggur!

³ Singin tulam, kele tula pusinginan simapipili onim, iate lulunia raoba ekeu taiokko!

⁴ Tiktik le aku kateiteinu, sitangan tatuitui simaruei! Aiabbitan aku si Rimata ka pubebeunannia. Mugora baga le katubut samba muangka baga kalulut ekeu, kuumunake le katubut nuntut bagam bele pei ka anggur! Aisesengan raoba ekeu taiokko!

⁵ Kirenangan mapusu aku, tapoi malainge tubukku, ale tainanalep Jerusalem, kele sapoura tai Kedar, kele kekre komak uma purimataat Salomo.

⁶ Bui nulelekngake pusunia tubukku, kalulut oloi sulu itoroiji aku. Sakebbukku mugolu katubukku, bailiuakerangan aku sipasijago monen anggur, monen anggurku geti ta kupasisikeli.

⁷ Kua le, ale simanuntu bagakku, kaipa nupasijajago biribirim, kaipa nupeperepake sia kateteret kasoibokat? Kalulut apa aibailiuake aku kele sipueeppak ka bebet mungkuat biribiritda saaleinu?

Simanteu

⁸ Kipangan le ta nuagai kudduatnia, ale simalainge tubu katalagatda tainanalep? Tut le siperakat mungkuat biribiri, samba jagongan biribirim ka bebet pusapougatda sipasijago tarimeu.

⁹ Simanuntu bagakku, kele kuro sinanalep le ekeu sipasititiktik kurot rimata Misir.

¹⁰ Malainge bailatnu katalagat pulaingean, malainge lolokkatnu katalagat inu simakirisau.

¹¹ Galaimaian pulaingeannu mas, pasamba manik-manik sibara ka perak.

¹² – Kateteret aimemerep rimatakku ka peremannia, pusinginnangan tula pusinginanku.

¹³ Simanuntu bagaku kele mur singinnia, kateteret iperep ka uddukku.

¹⁴ Simanuntu bagakku kele sangaappra ogo pacar ka monen anggur En-Gedi.

¹⁵ – Bulat malainge tubum, simanuntu bagakku, bulat malainge ekeu! Matam kele ngorut.

¹⁶ – Malainge tubum, simanuntu bagakku, bulat malainge ekeu! Peremanta ka kudduat simaarau.

¹⁷ Loina Aras bailiu arigit lalepta, samba lapparania loinat pinilok.