Tit. 3 - BUKO SIPUNENAN

Paraboatda tai Kristen ka polak nene

¹ Parepdep sia bule rapusum ka sapamarenta samba ka sibara gege mareddet samba matarek masigalaiake sene ngamata galajet simaeru.

² Bui masiasa sabagei, bui pajoggolo, tapoi mueru baga le samba muleppe baga ka sangamberi sirimanua.

³ Aipoi sita leu siburu sitaiagai paatuat le, sitaimareddet, simapepepe, bailiu pagugulet ka sene ngamata pubotbonan samba siobat tubu, murimanua ka bagat pukataikat samba sisit baga, kasitsitnakenen, palaga baga pasasamba.

⁴ Tapoi kele aimatoila anggai bagat Taikamanua, Sipaarau sita, samba nuntut bagania ka sirimanua,

⁵ arauakenangan sita, ta kalulut galajet simaroipo sigalaiakenenta, tapoi kalulut katet bagania le ka pasiraukat pasitutut mata sibau samba ka pasibaugat Ketsat Sipunenan,

⁶ siuruakenennia taimagulai ka sita kalulut Jesus Kristus Sipaarau sita,

⁷ bule sita pinaroipot kiliu bagania, bailiu sipasiikep purimanuaiat sitaitatata, siripot pukakaronanta.

⁸ Karonan te tiboiet nene samba kuoba bule nuronake nia, bule sia simatonem baga ka Taikamanua rapasikeli masigalaiake galajet simaeru. Ia te simaeru samba sibailiu uktuk ka sirimanua.

⁹ Tapoi ka pagalaiat paukelat tiboiet si ta galai samba paninikat, pajoggolat samba pagolukat pagalaiat Surukat, areuake tubum. Aipoi sangamberinia nenda siboboi le ta anai kauta nia.

¹⁰ Sirimanua sibaraake pasaraat, lepa nupanganturu nia sangaminca ele rua ngaminca, katsiliake nia.

¹¹ Anuagaian poi sirimanua kele nenda bulat amapepengan samba jonia masiukum tubunia.

Patonekat pasilepa samba salam

¹² Ke akukoiniakean si Artemas samba si Tikhikus raoi kekeu, olaake nuoi nuailiake aku ka Nikopolis; aipoi akupaatungan mukuddu sedda ka tetere simaleppet.

¹³ Pasikeli nuromake si Zenas guru Surukat, samba si Apollos ka bagat puenungananda, bui bara simagulai ka sia.

¹⁴ Samba sia saaleita leu kau ragelai mugalai galajet simaeru, ibara pakeiet ka besiakenen, bui si ta bua rapurimanua.

¹⁵ Sangamberi saalei sipaalei aku se masisegeake salam kekeu. Segeake salamku ka sia simanuntu baga ka sita ka bagat tonem baga. Kiliu bagat Taikamanua masipaalei kam sangamberimui!