Tit. 1 - BUKO SIPUNENAN

Salam

¹ Sibara kai Paulus, pagugulet Taikamanua samba apostel Jesus Kristus masipasikeli tonem bagada sirimanua sipilit Taikamanua samba puaagai pubulanan siripot aratta,

² samba mubongen ka pukakaronan purimanuaiat sitaitatata, sinibalaakenen Taikamanua si ta boko, enan tapei abara tetere,

³ samba ka tetere siteuakenennia aipatoilaan tiboietnia ka bagat pasipaareman Katuareman Simaeru sinegeakenen kaku siripot patonekat Taikamanua, Sipaarau sita.

⁴ Masiailiake si Titus, togaku sipulelelek siripot keret tonem bagata: Kiliu baga samba aban sibara ka Taikamanua Ukkui samba Kristus Jesus, Sipaarau sita masipaalei ekeu.

Galajet Titus ka Kreta

⁵ Lulunia akugalak ekeu ka Kreta, ia te bule nupagaba pagabaet pei le samba nurioake tai baja gareja ka senen laggai, kele sitonekenenku ka matam,

⁶ ia te sia si ta kuat tubu, buita sara le sinanalepnia; tatogania tai Kristen simatopit samba ta anai katuareman pagalaiat pubotbonan tubu samba kelat paatuat.

⁷ Aipoi sipaneinei paamian, kele sipasikeli lalep Taikamanua, buita si ta kuat tubu, bui simabuak paatuat, bui simagolu, bui simalo simapuinengen, bui simagege, bui simaalau baga,

⁸ simaletsei tairauma le, simaoba ka simaeru, simasiku paatuat, simaroipo, simasuru, siagai masipasikeli tubu,

⁹ samba siometnake tiboiet simaeru siripot sigelaiakenen, bule ioi leu ipanganturu sirimanua mubongen ka nganturat simaeru samba masiase sipasilalawan.

¹⁰ Aipoi amaigingan sia simakela paatuat, sitiboi tiboiet si ta galai samba sipatataju, sara pei sia sibara ka arat Jahudi.

¹¹ Sia nene buita tupetpetnake ngungunda, kalulut arapakataian lalep sirimanua gegelaiakera sitaipasese, masigaba uktuk simalolit.

¹² Sara ka talagada, ia te nabida masikua, “Sarat paboko le tai Kreta, tarimeu simasakbak, simereu kokom sitaimamala.”

¹³ Pasimunengan nene sibulatnia. Kalulut nene susui matada, ba pagugulai, bule ramaron mutonem baga,

¹⁴ samba buian rapuletsei pumumuanda tai Jahudi samba patonekat sirimanua sikaddiuake pubulanan.

¹⁵ Ka sirimanua simalina sangamberinia le malina; ka sirimanua simalolit geti samba sitaimatonem baga beri sara simalina, aipoi paatuatda samba bagai bagada malolit le.

¹⁶ Rakua raagai Taikamanua, tapoi ka galai tubuda ai le raputatata nia. Kasitsitnakenen le sia samba sitaimareddet samba sitaioi masigalai apa pa galajet simaeru.