Sou. 5 - BUKO SIPUNENAN

Panindogat masitiddou pukatekat baga

¹ Repdep le, oi Tuhan, aponia sipuaaili katubumai. Lelekake kai, samba itco le katuloloiatmai.

² Ikepakenenmai aiat ka kabeira sirimanua sabagei, sangamberi lalepmai arakudduijingan siooiake.

³ Ukkuimai aramateiakeat tai sagggak, kineneiget inamai silumang, samba kai sitaukkui.

⁴ Oinan lo samba loina paneu buita kusaki le kai.

⁵ Kele tarimeu, raubbuake kai mugalai simasane, amasaggongan kai, tapoi ta araake tetere kupuari kai.

⁶ Mei le kai pabiddeu ka Misir samba masitiddou komen ka Asyur.

⁷ Taikebbukatmai sijo le, kineneiget taan anai sia; tapoi buita mangorik le kai, kalulut sangamberi jotda.

⁸ Rapakoini le kai sirimanua simakere kele sara pagugulet; taanai simagege sibelaake kai ka kabeira.

⁹ Ka ujat laggai, mugejek le sipamamatei; malegre le kumatei kai kateteret kugaba kai komen.

¹⁰ Mangorik le kai pulalaje, bailiu maoloinangan kulitmai kele purakaat.

¹¹ Tainanalep ka Sion ragalai sikatai katubutda, samba taiokko ka Jehuda rapajo.

¹² Sangamberi sipaneinei kai tulaba samba tutiggotake, samba sibebbukat laggai taan tusuru sia.

¹³ Sangamberi tailaingemai tuubbuake mugalai ka panundukat, tatoga taimanteu ireddet le sia loina pasibairat pat kalapuinangan sia.

¹⁴ Sikebbukat laggai taan aparuru sia minca ka matatbaliu gugurukat, tailainge taan aranauake sipaalei ka urai.

¹⁵ Puangkakat bagamai amapepengan; sangamberi turu aisilingan bailiu pureureugat baga.

¹⁶ Taan anai pubebeunanmai, matei le kai kalulut jo.

¹⁷ Kalulut nene te aimabesi patuatmai, kalulut nene te aimaramun matamai;

¹⁸ kalulut leleu Sion simagarak, ka pugejengan jojot leleu.

¹⁹ Tapoi Ekeu, oi Tuhan, mariuriu murimata, mupaneinei le Ekeu teret buruburu.

²⁰ Angoian le anukaddiuake kai simakope buru? Ta leu pa Nukakalipogi le kai ka sanganantat tetere?

²¹ Oi Tuhan, ambit le kai minca toili katubum, baugi le purimanuaiatmai kele siboiki!

²² Ele bulat anuribbaiakean pa kai? Bulat magolu pa Ekeu katubumai?