Sou. 4 - BUKO SIPUNENAN

Katukataikat samba pangoringan Jerusalem

¹ Mas simakirisau aibailiuan simakamung sangamberi bukkut Uman Taikamanua musaragai ka enungan.

² Siburu sibau tubu ka laggai Sion kele mas simakeppu saki, tapoi kineneiget tuaddeake le sia kele koali polak sigalai sirimanua.

³ Beringan inan lamusek leu itottoni le togania, tapoi paamianKu bulat sikatai kele uma' sabeu sitaipuletsei attelunia ka kudduat simatangeu.

⁴ Tatoga sipututumata sibau ta tutottoni, bailiu matei sia kabagat oggou. Tatoga masitiddou komen, tapoi taanai sipasikakau.

⁵ Sia simatukkle masinanam komen simananam, samba sipurimanua kabagat pusanangan, kineneiget mugurui masigaba komen ka pasiribbaiat simalolit, samba matei ka enungan kalulut laje.

⁶ Paamianku atuukumakean masane peile bele peile ka sipulagai ka Sodom ka sangapeipeikat mata makatainangan kalulut kabei Taikamanua, ta kalulut kabei sirimanua.

⁷ Siburu sipaneinei kai matopit sia kele kapu' simabulau simalina. Putubuatda malainge samba maron, makula samba maarau.

⁸ Tapoi kineneiget pumataatda bulat mapusuk bele peile jelaga murappo ka enungan, berisara sirimanua siagai sia. Kulitda atutapplongan ka sangamberi tolatda, kele loina simagarak simamantei.

⁹ Mangorik samba matei le sia simamoile kalulut bulat taanai komenda; simamatei ka pasaggangan mautuk pei le simamatei kalulut laje.

¹⁰ Bulat makope le pugejaat baga nenda siorak paamianku bailiu saina simaeru baga masigokgok togania addeat komenda.

¹¹ Tuhan masibelaake goluNia samba labonangan Laggai Sion pat maaponangan ka polak.

¹² Katalagat tai rimata samba sirimanua ka polak, berisara simatonem baga, sangamberi matatbaliu gugurukat laggai Jerusalem momoi ragurukinia tai saggak.

¹³ Tapoi pagalaiat nenda amuailingan, kalulut jotda tai imam samba tai nabi. Apamateian sia, ramateiake sirimanua sitasele.

¹⁴ Kele sirimanua simapeset ipagejeknia ka senen enungan kisedda te sangamberi sipaneinei laggai Jerusalem. Leppeira malolit kalulut logau, bailiu taanai sioba masirape sia.

¹⁵ Kuarangan sirimanua, “Tuituiake ekeu sene! Kasitsitnakenen le ekeu, bui' nurape kai!” Iageti tuitui sia samba mujaujau ka laggai-laggai, tapoi berisara sia siobaake rapukuddu sedda.

¹⁶ Si Tuhan taan aipuletsei paamianNia; Nia le amasisaragaiake sia tai imam taan atusuru; saute taanai sipukateki sia baga.

¹⁷ Amasaggongan matamai masimattai, masingena paroman sitaibabara. Kukaroni le kai paroman sara laggai, bulat siripokatnia tamomoi raake paroman.

¹⁸ Tamomoi kubela kai ka enungan, kalulut mariuriu le rataiko kai tai saggak. Amalegrengan kamateiatmai, kalulut atukapplungan gogoimai.

¹⁹ Sipasikukru kai bulat maola bele peile uma' manyang ka manua. Rakukru le kai ka leleu, samba rakekreake kai ka kudduat simatangeu.

²⁰ Ralaba le rimata sinulaijit Tuhan karonietmai sipasiaake purimanuaiat, samba sipasisakkeri kai ka saggak.

²¹ Ale tai Edom samba Us, pugagaan kam, puangka kam baga, ke momoi peile! Momoi le geti pugejaat baga katubumui samba kalulut puineng nubulututake le geti tubum.

²² Sion aienungingan ukumannia kalulut sangamberi jo sigalainia; kineneiget taan iobaake kai si Tuhan samba taan tuambit minca ka kudduat katuribbaiat. Tapoi ekeu, ale Edom, iukum le geti ekeu si Tuhan. Sangamberi jom ipoiliat le geti si Tuhan.