Sou. 3 - BUKO SIPUNENAN

Ukuman samba karonan

¹ Aku te sirimanua sinanam pangoringan, kalulut aiorak aku golut Taikamanua.

² Makokope le reunan igiritake aku ka kudduat simakope gepgep.

³ Ipaboboki le aku simareirei, kabagat tatat nuntut baga ka sanganantat gogoi.

⁴ Galainangann tubukku ibara mauju simakope, samba imabakbak sangamberi tolatku.

⁵ Salukinangan aku reureu baga samba pangoringan.

⁶ Ubbuakenangan aku mukuddu ka pugepgeman kele sirimanua simamatei kateteret siburu.

⁷ Appranangan aku pasamba palenggui simaron, bailiu taanai enungan kabelaiatku.

⁸ Mukatsi le aku masitiddou paroman, tapoi taioba Taikamanua masiarepi.

⁹ Kekrenangan enunganku pasamba rupi irip bukku.

¹⁰ Ngenanangan aku kele ipasingena harimau, kekrenangan aku kele ipasikekre singa kisedda te ikekreake aku.

¹¹ Kukrunangan aku pat tusoipkungan ka enungan, lepa pabiritnangan aku samba kaddiuakenangan aku.

¹² Betekakenangan rourouNia, samba bailiuakenangan aku orangen siloguiNia.

¹³ SiloguiNia masipunu tubukku pat pununangan teinungku.

¹⁴ Ka sanganantat gogoi ragagati le aku sangamberi sirimanua, samba tubailiuake aku sailuket.

¹⁵ Sarat simapongit le aike katubuku komen samba loketku.

¹⁶ Matakku oggoiakenanganNia ka polak, sotku luuluuakenanganNia ka bukku pat bakbak.

¹⁷ Amaburuan ta akunanam simaeru; akukalipogingan kipa nanam puaangkakat baga.

¹⁸ Taan akubakkati puaabeu, samba asapprungan karonanku kai Tuhan.

¹⁹ Ke kupuaatu pangoringan samba pujaujaugatku makere le kele kukom simapongit samba tuba nenda.”

²⁰ Pagalaiat nenda mariuriu le kupaatunia, bailiu mabesinangan patuatku.

²¹ Kenanen kisedda tusuru le minca pukakaronanku, kateteret kurepdep pagalaiat nene:

²² Nuntut bagat Tuhan matom teret buruburu, katet bagaNia ta sasappru,

²³ mariuriu le sibau senen simansep bulatnia, Tuhan simariuriu topit!

²⁴ Si Tuhan iate sarania le pukayoatku. Kalulut nenda, mukaronan le aku katubuNia.

²⁵ Matopit le si Tuhan ka sirimanua sikaroniNia, samba ka sirimanua sipasigagabaNia.

²⁶ Oto, maeru le tapasingena kabagat putangoan teret ioi si Tuhan masiake paroman;

²⁷ maeru le tapasigelai muombaga kateteret silainge peile.

²⁸ Kateteret iake si Tuhan pangoringan, kau le tapukuddu mutangoan.

²⁹ Kau le taepeake patuat samba tubauake patuat, bule ai peile karonan.

³⁰ Kenanen rabobo samba rapaloloi sita, kau le tasilo sangamberinia nenda.

³¹ Kalulut, ta ikekeraake geti sita si Tuhan teret buruburu.

³² Lepat aiake pangoringan Nia leu masipukateki baga, kalulut mariuriu le ipununtuki sita baga pasamba nuntut baga sitaanai puteterat.

³³ Ta ioba bagaNia iobaake sita mangorik samba mureureu baga.

³⁴ Ke mangorik ketsatta kabagat tangsi,

³⁵ ke mapepe pubabakkatta siaket Tuhan,

³⁶ kalulut itupabailok puroipoat, bulat iagai le si Tuhan samba aile ilelelekake.

³⁷ Ke ta ioba bagania si Tuhan ka aponia pa, bulat tamomoi ragalai sirimanua aponia pa.

³⁸ Simaeru samba sikatai tuenungake sarat kabagat pakoinian Tuhan le.

³⁹ Angoi buita muhoihoi sirimanua ke tuukumnia kalulut sangamberi jonia?

⁴⁰ Kauan taitco samba talelekake kam puririmanuanta, samba tatoili kai Tuhan.

⁴¹ Kauan tasuruake kam paatuat samba kabeita ka Taikamanua ka manua:

⁴² “Oi Tuhan, akusaggangingan kai Ekeu samba amajongan kai samba ta anuake katuappekat.

⁴³ Nukukru samba Numateiake kai, pukakatet bagam malipput le kabagat goluNu.

⁴⁴ GoluNu kele tanai rusa bulat simakeppu bailiu sangamberi panindogatmai tamomoi isege.

⁴⁵ Nubailiuake le kai kele siribaiat kamatat sangamberi sirimanua.

⁴⁶ Rapaloloi samba ragagati le kai saggakmai;

⁴⁷ oraknangan kai pugejaat baga samba katusubuat, murimanua kai kabagat karat baga samba pulotokat.

⁴⁸ Elukku muguruk kele bagat oinan kalulut amakataian paamianku.

⁴⁹ Musou le aku sitaipuari,

⁵⁰ teret nulelekake kai, ale Tuhan ka manua.

⁵¹ Patuatku ibailiu mureureu baga masiitco purimanuaiatda tainanalep ka laggaimai.

⁵² Kele uma', ikukru aku saggak sitapaluluat rapulagaki aku baga.

⁵³ Raribbaiake aku sipuririmanua ka uggungan simagarak lepa labburangan aku bukku.

⁵⁴ Oinan mukuiluk teret ka uteku samba kupaatu: “Matei le aku.”

⁵⁵ Oi Tuhan, musoga aku katubum, sibara ka saisai uggungan simakeru.

⁵⁶ Nuarep le sogakku! Bui nupetpet talingam ka hoihoiku samba gereiku masitiddou paroman!

⁵⁷ Malegre le Ekeu kateteret kusogai Ekeu, Kuanungan: “Bui numaloto!”

⁵⁸ Oi Tuhan, moi Ekeu masipasikeli pakarokku anuarauakean purimanuaiatku.

⁵⁹ Oi Tuhan anuitcoan sitaimaroipo sigalaira katubukku; ake le katuroipoat!

⁶⁰ Anuintcoan sangamberi lumunra, sangamberi siisiakenenda katubukku.

⁶¹ Tuhan, anuarepman rapaloloi aku; anuagaian sangamberi sipinaatutda.

⁶² Ratiboi le aku ka sanganantat gogoi, bule ramateiake aku, galairangan leu isia sikatai.

⁶³ Barania simansep pat soibo, tubailiuake le aku gagatiet.

⁶⁴ Oi Tuhan, ukum le sia siripot sigalaira.

⁶⁵ Pateleiji le sia, samba obaake le rakuddu kabagat belet baga.

⁶⁶ Kukru samba subuake le sia sangamberitda teret sappru sia ka polak.”