Sou. 2 - BUKO SIPUNENAN

Ukuman katubut Jerusalem

¹ Galaiakenangannia si Tuhan kabagat golu, salukinangan Sion pasamba gepgep. Puaabeu Israel kele buak manua airibbaiakean ka polak. Kateteret aipugolu si Tuhan ta aipuletsei umaNia ka Sion.

² Senen polak simaturuturu ka laggai Jehuda, pakatainangannia kabagat tatat katet baga. Kabagat goluNia tukkluakenangan imabukkat sangamberi irip bukku kekret laggai nenda. Purimataat nenda pasamba siuteakenia beleakenanganNia pat bailiunangan katuloloiat.

³ Kabagat goluNia sabeu, bakbakakenangan geget Israel. Kateteret saggak masisaggangi sita, ta ioba iake paroman. Kele ipujulu obengan masilabo senengamata, kisedda te ipugolu si Tuhan katubutta sangamberitta.

⁴ Kele saggak, ibetekake rourouNia samba ipoakenangan katubutta siloguiNia. Sangamberi sirimanua siangkaake bagatta, sapru imateiakeNia. Buraakenangan goluNia kele obegan kabagat laggai Jerusalem nene.

⁵ Si Tuhan ibailiu kele saggak; bobonangan Israel pat mabukkatnangan. Pakatainangan sangamberi irip samba uma purimataat, samba tuppainangan pangoringan ka sipulaggai Jehuda.

⁶ Pakatainangan umaNia kudduat parurukat paamianNia rapanindou katubuNia. Galainangan si Tuhan ramakalipou gogoi Sabat samba sangamberi punen sabeu. Kalulut kopet goluNia, imam samba rimata ta aisilo sia.

⁷ Keraakenangan si Tuhan kudduat pasibuluat katubuNia sipunenan, samba kaddiuakenangan UmaNia; obaakenangan saggak si Tuhan rabukkatake sangamberi rupi uma purimataat. Ka kudduatta siburu manindou samba mupunen, mugorabaga le saggak kalulut kamananganda.

⁸ Aiteuakean si Tuhan buita tubukkatake le sangamberi rupit laggai Sion. Sangamberi rupi irip nenda aikirekingan si Tuhan, bule ioi ipakatainia sangamberinia. Sangamberi rupit irip laggai samba kudduat pujagoat, kineneiget sangamberinia aibailiuan siragatat.

⁹ Sangamberi matatbaliu gugurukatnia aitabbuian polak, sangamberi lelekkrenia amabakbakngan; rimata samba siabeu tiboi tubu aturibbaiakean sia. Surukat Tuhan taan atugelaiake; tai nabi taan arasilo pamoilianan sibara kai Tuhan.

¹⁰ Sia sikebbukat laggai mukuddu mumengmeng ka polak; rakarapake le abu ka utera, samba raleppeiake le komak goni toggaiat reureubaga. Taiokko leu masilukkukake ute pat aili ka polak.

¹¹ Matakku mugo kalulut taipuaari musou, ketsatku mangorik simakope. Besi le patuatku masiitco karagatat laggai; masiitco tatoga samba leu toga simaruei mututumata ikalapui sia ka enungan laggai.

¹² Kabagat taioi tubu pusourangan ratiddou komen samba lo ka sainanda. Kele sirimanua sibara mauju, rapurappo ka enungan lepa matei sia ka kupkupra sainanda.

¹³ Oi Jerusalem, Laggai Sion kilibet baga, karagatatnu bele peile kele liot koat. Aponia momoi kukua kuake pusuibiat bagam? Kalulut, tapei anai sipangongorik kele ekeu. Bulatnia taanai sioi masiarauake ekeu.

¹⁴ Sisegeakenenda tai nabi katubum, sarat patajuat samba pabokoat le. Ta arapakoinong jo sigalainu, bailiu taibauakenungan patuatnu. Tapoi rasegeake le katubum tiboiet pabokoat samba pasipepe.

¹⁵ Sangamberi sirimanua situsasabau, masiasa ekeu, kalulut bulat amakataian ekeu. Rapagilik le utera samba masikua, “Nenda pa laggai simakope lainge, laggai abeuakenenda tai kapolak?”

¹⁶ Sangamberi saggaknu masikinere ekeu kabagat lagat baga, gagatirangan ekeu samba siksikakerangan sotda. Kuarangan, “Laggai nenda akusubuakean kai! Kalepakatnia ailinangan leu teterenia simaburu ngenaenmai!”

¹⁷ Aigalaiakean si Tuhan palotokatNia, sipinatuNia siburu samba siparepdepakenenNia katubutta. Ipakatai sita kabagat tatat nuntut baga, ikau kamanangan ka saggak. Igalai sia muangka baga masiitco kabebeleta.

¹⁸ Ale rupit irip laggai Jerusalem, pusoga le kai Tuhan! Gurukake elut mata kele ipuguruk bagat oinan sinago samba sinoibo. Riuriuake musou, bui' nupuari pat masaggonangan tubum!

¹⁹ Suru le simareirei ka sanganantat soibo mugerei masibelaake sibara kabagat paatuatnu kai Tuhan. Tiddou le bule imakate baga ka tatogam sipulalaje samba sikalapui ka senen bibilukat enungan.

²⁰ Tuhan, itco samba lelekake pei sia sipaoreiNu nenda! Ai leu pa anugalaiake kisedda? Ina masikom togania simanuntu bagania, imam samba nabi tumateiake kabagat Umam sipunenan.

²¹ Simabaja samba sibau tubu murappo ka enungan, tailainge samba taiokko matei ka lanjau. Kateteret pugolukatNu, teleginungan sia kabagat tatat nuntut baga.

²² Sogainungan tai saggak kalotoakenenmai bule tubaraake punen pukataikat ka bebemai. Mateiakerangan sangamberi sipasikelimai samba simanuntu bagamai. Ka gogoi pugolukatNu, taanai berisara siarauake tubuna.