Sou. 1 - BUKO SIPUNENAN

Pangoringan Jerusalem

¹ Kineneiget Jerusalem bulat matangeu siboiki laggai nene magaugau. Siboiki abeunia katalagat sangamberi laggai, kineneiget ibailiu kele silumang. Siboiki laggai nene abeuakenen kineneiget ibailiu pagugulet.

² Ka sangantat malam musou le nia simakope elu muguruk ka bailatnia. Berisara katalagat simanuntu bagania sioba masipusuibinia. Sangamberi saaleinia masipajonia, aibailiuan sia saggaknia.

³ Jehuda arakaddiuakeannia silaggaijinia kalulut pangoringan samba paoreat simasane. Kineneiget mukuddu le sia katalagat sangamberi lagai tapoi ta arasese pusanangan. Saggak masialou sia kateteret ai sia kabagat pangoringan.

⁴ Ka senen punen sabeu berisara sia sioi ka Uman Taikamanua. Sangamberi taiokko sipuurai mangorik sedda, samba sangamberi tai imam muhoihoi le sia. Taanai sirimanua ka sangamberi matatbaliu gugurukat, laggai Sion ilakkup le nia reureubaga.

⁵ Sangamberi saggaknia muangka baga kalulut aioi arakupkupakenia. Tuhan masigalai ipangorik, kalulut makope igi jonia. Silaggaijinia aratangsiakean, samba tuambit ka kudduat katuribbaiat.

⁶ Puaabeu laggai Jerusalem kele pumumuan siburuan le. Sangamberi siuteakenia aibailiuan sitaioi tubu kele simatsuara simakope laje. Taanai gegetda ka saggak sikukru sia.

⁷ Kele aibele samba aipangorik, turepdep le Jerusalem siburu, kateteret aipeile masigi pakayoatnia; turepdep le kipa arakupkupake silaggaijinia tai saggak, samba berisara sirimanua sioi siparorom. Sangamberi saggaknia mugaga masiitco karagatatnia.

⁸ Jerusalem masipalolit tubunia, igalaiake jo simigi sikatai. Sangamberi siabeuakenia siburu, kineneiget rapaloloinia, kalulut masiitco pububulutunia; samba muhoihoi le nia, kalulut ailania.

⁹ Katusitsinannia makope koinong tapoi ta ipuletsei aponia sipuaaili geti katubunia. Bulat makope le karagatatnia, tapoi berisara sipusuibinia. Oto tiddounangan katet baga sibara kai Tuhan, kalulut kamanangan sangamberi saggaknia.

¹⁰ Sangamberi pukayoatnia araraurauan tai saggaknia. Sarapei buita iitco le sia raguruki Uman Taikamanua, sara galaiakenen keraet Tuhan ka sirimanua sitaiaddeakenen paamianNia.

¹¹ Kabagat puhoihoiatda pasigabarangan komen; pukayoatra rakau le silit roti, bule ramariuriu murimanua samba bui' ramatei. Pusoganangan Jerusalem, “Oi Tuhan, itco aku, bulat kopenia katuloloiatku.”

Ngunyut Jerusalem

¹² “Ale sangamberi sirimanua situsasabau ka enungan, itco samba lelekake kam! Ai leu pa pangoringan kele kopenia siorikku kineneiget, paoreijat siorakakenen Tuhan katubukku, siorakngakenen Tuhan katubukku kalulut goluNia sabeu nenda?

¹³ Sibara ka manua Igorosatake le obengan sipasilabo pat aili ka unou tolatku. Kaunangan sesere kamatakku sibailiuake aku kubele. Lepa obaakenangan aku kupusara mangorik ka sanganantat gogoi.

¹⁴ Alanangan sangamberi jokku, lepa apprananganNia bailiu sara, samba ngalouakenangannia ka lolokkatku, bailiu sanenia nenda sisaggoake tubukku. Kaunangan aku si Tuhan ka saggakku; taanai ronku kusaggangi sia.

¹⁵ Si Tuhan masiputata saladdukku simagege. Akenangan saladdu bule ramasubu sangamberi sibau tubu. Si Tuhan masipaperaki taikaumangku pat mabuburangan, kele rapiot buat anggur sirimanua.

¹⁶ Iate lulunia ipuguguruk elukku, taanai siake ron patuat samba pusuibiat; taan anai sibabara ka laggaiku, kalulut kopet geget saggakku.”

¹⁷ Totoiakekungan kabeiku masitiddou paroman, tapoi taanai siake pusuibiat. Ka senen matat rusa, si Tuhan masiake saggak; moi sia masisaggangi aku. Bailiuakerangan aku kele siribbaiat, bibilet kasitsitakenen katalagatda.

¹⁸ Tapoi si Tuhan le sineseat, kalulut akupasabau surukatNia. Arepake kam aku ale sangamberi sirimanua, samba itco kam pureureugat bagakku. Tailainge samba taiokkoku tutangsiake, samba tuambit ka kudduat katuribbaiat.

¹⁹ Kusogai le sasuruakku tapoi arapajo le aku; tai imam samba sikebbukat laggai amateian sia sangamberitda ka sangamberi enungan laggai, kateteret airagagaba komenda masituppai puririmanuanda.

²⁰ Oi, Tuhan puletsei le aku, patuatku ta masanang samba malalu, mabubu le kalulut kataiku siburu. Ka senen enungan ai pamamatei, samba kabagat lalep ai kamateiat.

²¹ Oi Tuhan! Arepmake hoihoiku, taanai sipusuibi aku. Sangamberi saggakku muangka baga kalulut anuukumake aku. Olaake ioi gogoi sipalelekNu nenda; galai le rapangorik kele aku.

²² Lelekake sangamberi pukakataira nenda, samba galaiake katubutda kele sigalaiakenenNu kaku, kalulut sangamberi jo sigalaiakenenku katubum. Mukatci le aku kabagat pangoringan; mareureu bagakku samba masou bagakku.”