Sip. 9 - BUKO SIPUNENAN

Kerenia enungan purimanuaiat sirimanua

¹ Bulatnia te, sangamberinia nene akulelekakean, sangamberi sirimanua simatopit samba sangamberi sirimanua simasiku patuat samba sangamberi sigalaiakenenda, nuntut baga ele lagat baga, ai ka kabei Taikamanua; ta raagai sirimanua aponia siloketnia.

² Sangamberinia makere le ka sia; enungan purimanuaiat sirimanua makere: sirimanua simalina patuat ele sirimanua sikatai, sirimanua simatopit ele sirimanua sikatai, sirimanua simalina ele sirimanua kasitsinnakenen, sirimanua sipanguruatake buluakenen ele sirimanua sitaipanguruatake buluakenen. Kele sirimanua simatopit, kisedda leu sirimanua sijo; kele sirimanua sipupalele, kisedda leu sirimanua sitaioba mupalelengan.

³ Nene te kamateiat kabagat sangamberi sipuaili ka tei matatsulu; enungan purimanuaiat sirimanua makere. Patuatda tatogat sirimanua sun le pukakatai, samba pukelakat patuat ai kabagat patuatda burut purimanuaiat, samba lepa geti ailiakerangan laggaira sirimanua simamatei.

⁴ Tapoi kasei addeakenen sirimanua sipuririmanua sibara karoakenen, kalulut jojo sipuririmanua peile maeru bele peile singa simamatei.

⁵ Kalulut sirimanua sipuririmanua raagai, mamatei le sia, tapoi sirimanua simamatei ta raagai aponia pa, taanai upatda, beringan repdemen katubutda asapprungan.

⁶ Nuntut bagatda, ele pulagakat baga samba tutut bagatda amaburuan aimapepe, samba teret buruburu taan anai rubeiatda kabagat sangamberinia sipuaaili ka tei matatsulu.

⁷ Kauan, kom kannu kabagat angkat baga, samba lo anggurnu kabagat sanang patuat, kalulut amaburuan Taikamanua aioba sigalaiakenennu.

⁸ Eddangan imariuriu mabulau leppeinu samba buita ibara tula ka utenu.

⁹ Nanam le purimanuaiat pasamba sikalalep simanuntu bagam burut purimanuaiatnu siboboi, sipanguruatakenen Tuhan katubum katei matatsulu, kalulut nenda te puuktungannu kabagat purimanuaiat samba kabagat galajet sigalaiakenennu kabagat besit tubu ka tei matatsulu.

¹⁰ Sangamberi siailit kabeinu galaiakenen, galaiake nenda kabagat ron tubu, kalulut taanai galajet, paatuet, puaagai samba sukut patuat kabagat laggaira simamatei, kaipa eijanannu.

¹¹ Itcokungan minca ka tei matatsulu kamanangan patakaiat ta uktuk ka simaola, samba kamanangan pasaggangan ta uktuk simaron, kisedda leu roti ta uktuk simasiku patuat, pukaioat ta uktuk simaagai, samba panguruat ta uktuk simaagai, kalulut tetere samba enungan purimanuaiat rananam le sangamberitda.

¹² Kalulut sirimanua ta raagai teterenia. Kele iba ialania jarik simateiakenia, samba kele uma' ialania saesere, kisedda te tatogat sirimanua tusere ka tetere pangoringan, ke iorak sia pagalaiat nenda sinulut.

Sikuat patuat peile maeru ka pugegeat

¹³ Pagalaiat nene leu kuaddeake sibailiu sikut patuat ka tei matatsulu samba ituitco abeu kaku;

¹⁴ ai sara laggai sigoiso, silaggaijinia ta maigi; sara rimata sabeu masisaggangi, alounangannia samba galainangan irip bukku pasialougat sabeu ka sia;

¹⁵ sedda ai sara sirimanua simageba simasiku patuat, kabagat sikut patuatnia arauakenangan laggai nenda, tapoi taanai sirimanua sirepdep sirimanua simageba nenda.

¹⁶ Kuakungannia: “Sikut patuat peile maeruka puroron tubu, tapoi sukuat sirimanua simageba tupaloloi samba tiboietnia ta raarepi sirimannua.”

¹⁷ Tiboiet sirimanua simasiku patuat le raarepi simakolou, maeru peile gerei sirimanua sibara gege katalagatda sirimanua sitaiagai patuat.

¹⁸ Sikut patuat peile maeru ka pamatei pasaggak, tapoi sara sirimasnua simasele momoi ipakatai senengamata pagalaiat simaeru.