Sip. 8 - BUKO SIPUNENAN

¹ Kasei kele sirimanua simasiku patuat? Samba kasei siagai katukolobat senen pakaraoat? Sikut patuat sibailiuake nutoro pumataat sirimanua samba silinangan pumataatnia sikatai.

Purereddet katubut rimata

² Reddet kam parentat rimata kalulut palelengannu katubut Taikamanua.

³ Bui' imaola bagam nutuitui ka matania, bui' numaburu kabagat pakaroat sikatai, kalulut igalaiake le' siobat bagania.

⁴ Kalulut kabagat parentat rimata ai gege; kasei sipasikukua katubunia: “Aponia nugagalai tuan?”

⁵ Kasei sireddet parentat rimata ta isisilo pakaroat kamateiat, samba patuat sirimanua simasiku patuat iagai pasiukuman,

⁶ kalulut ka senengamata ai tetere pasiukuman, samba pukakatai sirimanua masipaorei tubunia.

⁷ Bulatnia te, ta iagai aponia sipuaili, kalulut kasei te sikua kamatania kipa ipuaili nenda?

⁸ Taanai berisara sirimanua simagege sikeraake rusa samba berisara sirimanua simagege ka gogoi kamateiat. Taanai puariat kabagat pasaggangan, samba pukakatai ta ibebelaake sirimanua sigalaiakenia.

Galajet Taikamanua tamomoi isinouginia sirimanua

⁹ Sangamberinia nene akuitcoan samba akulelekakean sangamberi galajet sigalaiakenen ka tei matatsulu, kateteret sara sirimanua masikupkupake sirimanua sabagei pat mateinia.

¹⁰ Itcokungan leu sangamberi sirimanua sikatai rateiakenen momoii tuguru, tapoi sirimanua sipuparaboat simaeru buita mutuitui ka kudduat sipunenan samba tukalipogi kabagat laggai. Nene leuet siboboi.

¹¹ Kalulut ukuman ka mgalajet sikatai ta tugagalaiake simaruei, bailiu patuat sirimanua sun le masikiddi masigalaiake sikatai.

¹² Kenanen sirimanua sijo samba sigalaiake sikatai sangotungaminca murimanua simaburu, tapoi kiuagai, sirimanua sikalotoake Taikamanua rasilo le geti puuktungan, kalulut maloto sia ka purimataatNia.

¹³ Tapoi sirimanua sikatai ta rasesese puuktungan samba kele ailiggou ta mabuburu rurania, kalulut ta malotonia ka purimataat Taikamanua.

¹⁴ Ai sara pusiboboiat sipuaili ka polak: ai sirimanua simatopit, sisilo ukuman simateu ka galajet sirimanua sikatai, samba ai sirimanua sisilo upa ka galajetda sirimanua simatopit. Aku masikua: “Nene leuet siboboi!”

¹⁵ Kalulut nenda kuuumun le obaket baga, kalulut taanai puuktungan bagei ka sirimanua ka tei matatsulu, sarat mukom samba mulo samba leu muangka baga. Nenda te sipaaleinia kabagat besit tubunia ka burut purimanuaiatnia sikau Taikamanua katubunia ka tei matatsulu.

¹⁶ Kateteret akulelekakennia bule kuagai kolou sikut patuat samba itcokungan galajet sigalaiakenen sirimanua ka polak taimalaulau sinago samba sinoibo,

¹⁷ oto makoinongnangan kaku, sirimanua tamomoi rasinougi sangamberi sigalai Taikamanua, sigalaiakenenNia ka tei polak. Kenanen kipapa besit tubunia sirimanua igabania, ta isesese. Kenanen sirimanua simasiku patuat masikua, iagai, tapoi tamomoi isesese.